საბავშვო ბაღები სტანდარტებს არ შეესაბამება

სურსათის ეროვნული სააგენტოს ინსპექტირების დეპარტამენტმა ჩოხატაურში არსებული საბავშვო ბაღების მდგომარეობა შეისწავლა.

როგორც გაირკვა, სტანდარტს არცერთი საბავშვო ბაღი არ აკმაყოფილებს:

_ სამზარეულოს და სასაწყობე ფართს ესაჭიროება სარემონტო სამუშაოები; საწარმო არ არის აღჭურვილი საკმარისი რაოდენობის ხელსაბანი ნიჟარებით;  სამზარეულო არ იძლევა სრულყოფილი რეცხვა/დეზინფიცირების საშუალებას; ტუალეტი არ იძლევა რეცხვა/დეზინფიცირების საშუალებას; ხელსაბანი არ არის აღჭურვილი შესაბამისი ჰიგიენური საშუალებებით (თხევადი საპონი, ერთჯერადი ქაღალდი,  ხელის დეზინფექტატი); სამზარეულო არ არის აღჭურვილი მექანიკური ვენტილაციის საშუალებით; გასანათებელი საშუალებები არ არის დაფარული დამცავი ფარებით (პლაფონებით); საწარმოში არ არის უზრუნველყოფილი სათანადო სისუფთავე ყველა უბანზე; დასუფთავების და დეზინფიცირების ყოველი პროცედურა არ არის აღრიცხული თარიღის მითითებით; სამზარეულოს შესასვლელთან არ არის მოწყობილი დეზობარიერი; სადეზინფექციო, სადერატიზაციო და სადეზინსექციო სამუშაოების ჩატარებისას არ ხდება სამუშაოების აღრიცხვა;  სამზარეულოს იატაკი არაერთგვაროვანია და არ იძლევა სრულყოფილად რეცხვა/დეზინფიცირების საშუალებას და არ არის დრენაჟის სისტემა; სამზარეულოს კედელი არ იძლევა რეცხვა/დეზინფიცირების საშუალებას და შეწოვის უნარის მქონეა; სამზარეულოს ჭერი არ იძლევა ადვილად წმენდის საშუალებას; სამზარეულოში გარეთ გამავალი ფანჯრები არ არის დაფარული მწერებისგან დამცავი ადვილად გასაწმენდი ბადით; ბიზნესოპერატორმა ვერ წარმოადგინა სასმელი წყლის ხარისხის ვარგისიანობის დამადასტურებელი საბუთი; სამზარეულოში არსებული მაგიდების ნაწილის ზედაპირი არ არის ადვილად რეცხვა/დეზინფიცირებადი; სადილის მოსამზადებელი  ქვაბების ნაწილი დამზადებულია ისეთი მასალისგან (ალუმინისგან), რომელიც მინიმუმამდე არ ამცირებს დაბინძურების რისკს; დასალაგებელი ინვენტარისთვის სარეცხი სადეზინფექციო, სადერატიზაციო და სადეზინსექციო საშუალებებისთვის არ არის იზოლირებული კარადა; ბიზნესოპერატორი არ აღრიცხვას პერსონალის ჯანმრთელობის მდგომარეობის ყოველდღიურ კონტროლს; მოსამსახურე პერსონალს არ აქვს გავლილი შესაბამისი სწავლება სურსათის ჰიგიენის საკითხებთან დაკავშირებით, _ ვკითხულობთ დასკვნებში.

ჩოხატაურში არსებული საბავშვო ბაღების კრიტიკულ მდგომარეობაზე "გურია ნიუსი" წლებია, წერს. ვწერთ იმასაც, რომ რამდენიმე ბაღი სოფლის პროგრამის ფარგლებში გარემონტდა, თუმცა, ბევრი კითხვის ნიშანი დატოვა. მაგალითად,  2011 წელს, სოფელ ქვენობანში სოფლის პროგრამის თანხით შეკეთებულ საბავშვო ბაღში სველი წერტილი გააკეთეს.

იქ მისულებმა აღმოვაჩინეთ, რომ ბაღში გაკეთებული სველი წერტილი ჭერიდან ჩამოყვანილი პლასტმასის მილია, ჭერში კი წყლის ავზია დამონტაჟებული. ადგილზე გვითხრეს, რომ წყლის მოტორიც შეიძინეს, თუმცა, გაფუჭდა და ბაღის გამგემ, მანანა გოგიბერიძემ შესაკეთებლად სახლში წაიღო.

ამავე პერიოდში, სოფლის პროგრამის ფარგლებში, რემონტი ჩაუტარდა ბასილეთის საბავშვო ბაღს. რემონტი პირობითად, რადგან შენობა, რომელიც ავარიულია, გარედან მტერს უბრმავებს თვალებს, შიგნიდან კი _ მოყვარეს. სახელდახელოდ შეკეთებული ფასადის მიღმა ჩამონგრეული ჭერი და ავარიული იატაკი დაგვხვდა. სველი წერტილი კი, რომელიც ბაღის უკან მდებარეობს და საბავშვო ბაღის აღმზრდელების და აღსაზრდელების უმთავრესი პრობლემაა, მოუწესრიგებელია.

როგორც გავარკვიეთ, გამოყოფილ თანხაში ავარიული იატაკის ნაწილი გამაგრდა და შენობის გვერდით სამზარეულო მოეწყო, რომლის კედლები უკვე დაბზარულია. ამასთან, სამზარეულოს გამოყენება შეუძლებელია, რადგან მოუხერხებელია. საბავშვო ბაღის გამგის, ინგა მჟავანაძის თქმით, მათი მოთხოვნა უშუალოდ შენობის რემონტი იყო:

_ უამრავი წერილი მაქვს გამგეობაში შეტანილი. როდესაც ამ სამზარეულოს აკეთებდნენ, ვთხოვეთ, რომ ცენტრალურ შენობაში გაეკეთებინათ, მაგრამ უარი გვითხრეს _ პროექტი გაკეთებულია და ვერ შევცვლითო. გააკეთეს, თუმცა, ვერ ვიყენებთ, რადგან ძალიან მოუხერხებელია, _ ამბობდა "გურია ნიუსთან" საუბრისას ბასილეთის საბავშვო ბაღის გამგე.

წლებია, პრობლემები აქვთ ერკეთის საბავშვო ბაღში.  ჭერი, საცაა ჩამოვარდება, ხოლო ერკეთელების თქმით, ე.წ. "ბოსელზე" მიშენებული სამიოდე ოთახი გამოუყენებელია. საბავშვო ბაღის დირექტორის თქმით, ახალი შენობის მოთხოვნა მათ გააკეთეს და ეს ოთახებიც ამიტომ აშენდა, თუმცა, იმის გამო, რომ ბოლომდე არ გარემონტდა, ვერ სარგებლობენ.
პრობლემები არ აკლიათ დაბის საბავშვო ბაღებში. მოუწესრიგებელი ინფრასტრუქტურა, სავალალო მდგომარეობაში მყოფი სველი წერტილები და ყოველ წელს დადებული პირობა, რომ მოგვარდება.

ასეა ამჯერადაც. 2014 წელს, რეგიონებში გასახორციელებელი პროექტების ფონდიდან, ჩოხატაურის მუნიციპალიტეტის სამი ბაღისთვის _ დაბა ჩოხატაურში N1 საბავშვო ბაღის, ასევე, N1, N2 ბაგა-ბაღების რეაბილიტაციისთვის თანხა გამოიყო.

სურსათის ეროვნული სააგენტოს ინსპექტირების დეპარტამენტის მიერ მიცემული ვადა, პრობლემების მოგვარებისთვის ბაღებს 15 სექტემბერს ეწურებათ.

ამას ისიც ემატება, რომ პროექტები, რომლებიც უკვე დამტკიცებულია და რომლის მიხედვითაც ბაღები უნდა გარემონტდეს, ბევრ ხარვეზს შეიცავს. მაგალითად, ერთ-ერთი საბავშვო ბაღის საპირფარეშოში იგება მეტლახი, მაგრამ არ ცვლიან დაზიანებულ უნიტაზებს.

ჩოხატაურის მუნიციპალიტეტში არსებულ საბავშვო ბაღებს   სკოლამდელი სააღმზრდელო დაწესებულება "მომავალი" კურირებს. ორგანიზაციის წლიური ბიუჯეტი, თითქმის, ნახევარი მილიონია და მას არაკომერციული იურიდიული პირი დამოუკიდებლად ხარჯავს, თუმცა, სიმართლე რომ ითქვას, გამოყოფილი თანხის ნახევარზე მეტი ხელფასებს ხმარდება.

ჩოხატაურის მუნიციპალიტეტის გამგებელი ირაკლი კუჭავა ამბობს, რომ ხელისუფლება პრობლემების მოსაგვარებლად ყველაფერს აკეთებს:

_მიუხედავად იმისა, რომ მე ათი დღეა, შევუდექი უფლებამოსილების გახორციელებას,  ბაღების თემაზე უკვე სამი შეხვედრა ჩავატარე შესაბამის სამსახურებთან. ჩემთვის ცნობილია, რომ სურსათის უვნებლობის სამსახურის ინსპექტირების შედეგად მუნიციპალიტეტის  თხუთმეტივე ბაღს დაუდგინდა ხარვეზები, რომლის გამოსწორებას თანხები სჭირდება. თავის  დროზე ეს თანხები ბიუჯეტში ვერ იქნებოდა გათვალისწინებული. უნდა მოხდეს თანხების მოძიება და ხარვეზების აღმოფხვრას  შევეცდებით.

_ ბატონო ირაკლი, რას ნიშნავს თანხების გათვალისწინება ვერ მოხერხდებოდა? "გურია ნიუსი" ამ მდგომარეობის შესახებ წლებია, წერს, ფოტოებს აქვეყნებს. წინა ხელისუფლებას რომ თავი დავანებოთ, ახალმა რატომ არაფერი გააკეთა?

_ ეს თანხები დასათვლელი და მოსაძიებელია.

_  სურსათის უვნებლობის ინსპექტირების ჯგუფმა ამ პრობლემის მოსაგვარებლად ვადა 15 ოქტომბრამდე მოგცათ. მზად ხართ, დარჩენილ დროში ყველა ხარვეზი აღმოფხვრათ?

_ ყველაფერს გავაკეთებთ, რისი საშუალებაც იქნება.

_ იცით, რომ პრობლემის გამოუსწორებლობის შემთხვევაში მუნიციპალიტეტს  ჯარიმის გადახდა მოუწევს?

_ ეს კიდევ ერთი სტიმულია, რომ ყველაფერი მოწესრიგდეს.

_ ბატონო ირაკლი, მუნიციპალიტეტში სამი ბაღი რემონტდება, თუმცა, პროექტები ხარვეზიანია…

_ ვიცით მაგის შესახებ. მაგალითად, მეორე ბაგა-ბაღში კარიც არ იყო ჩასმული. ამიტომ, იმ შეხვედრებზე ეს თემები გავიარეთ და გაუთვალისწინებელი  ხარჯებიდან მოხდება ამის გაკეთება. ამას მშენებელი იღებს საკუთარ თავზე.