“უმჯობესი იყო, გარემოს დაცვის სამინისტრო სპეციალისტს ჩაებარებინა”

პარლამენტმა მინისტრთა ახალ კაბინეტს  ნდობა 26 ივლისს გამოუცხადა.  ცვლილება შეეხო   გარემოს დაცვისა და ბუნებრივი რესურსების სამინისტროსაც. ხათუნა გოგალაძის ადგილზე პრემიერ-მინისტრმა ელგუჯა ხოკრიშვილი წარადგინა, რომელიც ამ პოსტის დაკავებამდე რეგიონული განვითარების და ინფრასტრუქტურის მინისტრი იყო.

1973 წლის 24 მაისს დაბადებული გარემოს დაცვის მინისტრი განათლებით ეკონომისტია. მას   პოტსდამის უნივერსიტეტში (გერმანია)  2008 წელს ეკონომიკურ და სოციალურ მეცნიერებათა დოქტორის ხარისხი,  2004 წელს ბიზნესის და ეკონომიკის მაგისტრის და 2002 წელს  ეკონომიკის ბაკალავრის  ხარისხები  აქვს მინიჭებული.

ახალი მინისტრი აცხადებს, რომ ქვეყანაში გარემოს მართვის ხარისხის გაუმჯობესების მიზნით, საქართველო-ევროკავშირის ასოცირების შესახებ შეთანხმების მოთხოვნების შესაბამისად, ეტაპობრივად დაინერგება ევროპული გარემოსდაცვითი პრინციპები და სტანდარტები და საქართველო გააგრძელებს ორმხრივი და მრავალმხრივი გარემოსდაცვითი ხელშეკრულებებით ნაკისრი ვალდებულებების შესრულებას.

როგორც ხოკრიშვილი ამბობს, დაიხვეწება სამართლებრივ-ნორმატიული ბაზა და გატარდება სატყეო სექტორის რეფორმა, გაუმჯობესდება გარემოსდაცვითი კონტროლის სისტემები და მოხდება გარემოს მონიტორინგის სისტემის ეტაპობრივი მოდერნიზება.

ახალი მინისტრის საქმიანობის შეფასება, ჯერ-ჯერობით  უჭირთ გარემოსდამცველებს, თუმცა ამბობენ, რომ უმჯობესი იყო, სფერო სპეციალისტს ჩაებარებინა.

როგორ იმუშავა  ყოფილმა მინისტრმა  და  რა გამოწვევების წინაშე დგას ახალი მინისტრი,  ამის შესახებ საქართველოს მწვანეთა მოძრაობის თანათავმჯდომარე რუსუდან სიმონიძე გვესაუბრება.

"2012 წელს გარემოს დაცვის სამინისტროში ახალი ჯგუფის  მოსვლამ საფუძველი დაუდო სამინისტროს  გარემოს დაცვის მიმართულების გაძლიერებას. მოგეხსენებათ, 9 წლის განმავლობაში ნელ-ნელა ინგრეოდა სისტემა და გარემოს დაცვის პრიორიტეტები  ნაკლები იყო. უფრო ეკონომიკური ორიენტაცია ჰქონდა სამინისტროს.  ახალი გუნდის მოსვლით გარემოს დაცვის ვექტორი შეიცვალა. ხედვები  გახდა გარემოსდაცვითი. თუმცა,  ვერ მოესწრო ძალიან ბევრი რაღაცის გაკეთება. ჩვენ გვინდოდა, უფრო დახვეწილი ყოფილიყო გარემოზე ზემოქმედების დოკუმენტი. ეკოლოგიურად დაბინძურებული ქალაქებში მდგომარეობა გამოსასწორებელი იყო და ა.შ."

_ ქალბატონო რუსუდან,  რა გამოწვევების წინაშე დგას ახლა  გარემოს დაცვისა და ბუნებრივი სამინისტრო?  უპირველესად რისი გაკეთება მოუწევს ახალ მინისტრს?

_ ძალიან მნიშვნელოვანია, ქვეყანამ ევროკავშირთან ასოცირების ხელშეკრულებით აღებული ვალდებულებები აიღოს გარემოს დაცვის სფეროში.  ქვეყანას ჰიდროელექტროსადგურების მშენებლობის კურსი აქვს აღებული.  ამ მშენებლობების წინააღმდეგები ვართ, განსაკუთრებით ენერგეტიკის სამინისტროს გეგმების, რაც მას აქვს ჰიდროელექტროსადგურებთან დაკავშირებით. ძალიან მნიშვნელოვანია, არ მოხდეს ეკონომიკური მიმართულების ზეწოლა  გარემოს დაცვით მიმართულებაზე.

_ რას იტყვით ახალ მინისტრზე?

_ ჯერ-ჯერობით ვერაფერს გეტყვით.  თუმცა ჩვენი სურვილია,  გარემოს დაცვის სამინისტროს გარემოსდამცველი ხელმძღვანელობდეს და შესაბამის კომიტეტსაც პარლამენტში გარემოსდამცველი ედგას სათავეში. ხედვებსა და მსოფლმხვედველობას ძალიან დიდი მნიშვნელობა აქვს.