2014 წლის 26 ივლისს "გურია ნიუსში" გამოქვეყნდა სტატია სათაურით: "დაიბარებენ თუ არა ფინანსურ პოლიციაში მეუფე ვაზგენ მირზახანიანს, ვან ბაიბურთს და ლევან ისახანიანს?" სტატიაში საუბარი იყო, ფონდ "კეთილი სამარიელის" საქმიანობის შესახებ. როგორც ჩვენთვის ცნობილი გახდა, ფონდის დოკუმენტაციის რევიზიას ფინანსური პოლიცია ატარებს. "გურია ნიუსის" რესპონდენტი გიორგი ელიბეგოვი, რომელიც ორგანიზაცია "გლობალბრიჯის" ხელმძღვანელია, მიიჩნევს, რომ სომეხთა სამოციქულო მართლმადიდებელი წმიდა ეკლესიის, საქართველოს ეპარქიის, იურიდიულ საკითხთა, სახელმწიფოსთან ურთიერთობებისა და რელიგიათაშორისი თანამშრომლობის განყოფილების ხელმღვანელი ლევონ ისახანიანი ეკლესიის ჭიშკართან მომხდარი ჩხუბით, ფინანსური პოლიციის მიერ ფონდ "კეთილი სამარიელის" საქმიანობით დაინტერესების გადაფარვას ცდილობს და ამით ხელისუფლებას ევაჭრება.
მისივე თქმით, "არსებობს ფონდი "კეთილი სამარიელი," სადაც მუშაობს კარენ ირეციანი, რომელმაც სომხურ ეკლესიასთან ჩხუბის დროს, იარაღიდან გაისროლა. იგი სურბ ეჩმიაძინის ეკლესიაში სამეურნეო საკითხებს კურირებს. ფონდს ფორმალური დამფუძნებლები ჰყავს. "კეთილი სამარიელის" საქმიანობას ეპარქიის იურისტი ლევონ ისახანიანი და მეუფე ვაზგენ მირზახანიანი მართავს. რამდენიმე თვის წინ, ფინანსური პოლიცია ფონდ "კეთილი სამარიელის" საქმიანობით დაინტერესდა, რის გამოც, კახეთის რეგიონში ერთი პირი დააკავეს, ამის გამო კი სომხურ ეკლესიას სერიოზული პრობლემები შეექმნა.
დღემდე ცდილობს მეუფე ვაზგენ მირზახანიანი თავისი "არხებით" ფონდ "კეთილი სამარიელის" საქმე არ გახმაურდეს და ფინანსურმა პოლიციამ საქმე დახუროს. თუმცა, ვერანაირი გზა ვერ იპოვა,"_ ამბობდა რესპონდენტი.
"გურია ნიუსმა" რამდენჯერმე სცადა დაკავშირებოდა კარენ ირეციანს, თუმცა მას ტელეფონი გამორთული ჰქონდა.
სტატიის გამოქვეყნების შემდეგ, კარენ ირეციანი რედაქციაში მოვიდა და განაცხადა, რომ იგი საქართველოში არ იმყოფებოდა, მივლინებით იყო წასული და ტელეფონი ამის გამო ჰქონდა გამორთული. ირეციანს პრეტენზიები აქვს "გურია ნიუსში" გამოქვეყნებულ სტატიასთან დაკავშირებით _ მისი თქმით, დაწერილი სტატიიდან ჩანს, თითქოს სომხურ ეკლესიაში არის აფერისტების ბუდე და იტალიური მაფიის კლანი. სტატიის დაწერა 3 დღით მაინც უნდა გადაგედოთ, დაბრუნებულს დამირეკავდით და ყველაფერს აგიხსნიდითო.
კარენ ირეციანმა მოითხოვა, "გურია ნიუსში" გამოგვექვეყნებინა მისი საპასუხო ინტერვიუ, რაზეც, რა თქმა უნდა, დავთანხმდით. რესპონდენტი ჩვენს პარალელურად აკეთებდა აუდიოჩანაწერს, რათა, მისივე თქმით, "ჩვენი დიალოგი აუცილებლად უნდა მოასმენინოს მათ". ვის გულისხმობდა ირეციანი "მათ"-ში არ ვიცით, მაგრამ, იმის გამო, რომ ფონდ "კეთილი სამარიელის" წარმომადგენელს ისევ არ ჰქონოდა პრეტენზია, "გურია ნიუსთან" მისი ინტერვიუ ვიდეოფირზე გადავიღეთ და ჩანაწერის ასლი მას გადავეცით.
"გურია ნიუსი" პირობას ასრულებს და საქართველოში სომეხთა სამოციქულო მართლმადიდებელი წმიდა ეკლესიის ეპარქიის ადმინისტრაციული განყოფილების დირექტორ კარენ ირეციანთან ინტერვიუს სრულ ჩანაწერს აქვეყნებს:
_ მე მოვედი რომ აგიხსნათ, ჩვენთან ბანდა არ არის, ეკლესიაა. თქვენი სტატიიდან ისე გამოვიდა, რომ არის ფონდი, ანუ სომხურ ეკლესიაში რაღაც კლანი, რომელსაც მეუფე მფარველობს. ფინანსურში რეკავთ და რაღაცეებს არკვევთ. გამოდის, რომ ვან ბაიბურთიც ჩვენს კლანშია, პლუს _ "ნაციონალები." ამ დროს, რატომ არ არკვევთ, ვინ არის ფონდი "კეთილი სამარიელი"? ეს რამდენიმე ათასმა ადამიანმა წაიკითხა.
თქვენს სტატიას რომ წაიკითხავ, რჩება შთაბეჭდილება, რომ სომხური ეკლესიაში არის აფერისტების ბუდე, რომლებიც საწყალი ბავშვების საჩუქარს ყიდიან.
სტატიაში რაც წერია, ელიბეგოვის სიტყვებია?! თქვენ გაქვთ ჩანაწერები?! მე გუშინ ვესაუბრე გიორგის (საუბარია გიორგი ელიბეგოვზე. ავტ.) ის ამბობს რომ, არ უთქვამს თქვენთან ასეთი რამე. ამიტომ უნდა მოვისმინო, ნამდვილად თქვა თუ არა მან ასეთი რამ თქვენთან ინტერვიუში.
ფონდს და ეკლესიას არფერი აქვთ საერთო. საქართველოში არის ფონდი "კეთილი სამარიელი". ეს არის ამერიკული პროგრამა, სადაც მე სომხური მხარის წარმომადგენელი ვარ. ეკლესია ფონდისგან საშობაო საჩუქრებს იღებს და ვარიგებთ. მარტო უპატრონო ბავშვებს არ ვურიგებთ. ეს არის 1+1 პროგრამა, რაც იმას ნიშნავს, მთელ მსოფლიოში თითო ბავშვმა თითო საჩუქარი ცხოვრებაში ერთხელ უნდა მიიღოს. მეუფეს ამ პროგრამასთან საერთოდ კავშირი არ აქვს, მხოლოდ კურთხევას ვიღებ საჩუქრის დარიგებაზე. მე თვითონ ვწყვეტ სად, როდის, რამდენი დავარიგო.
_ ბატონო კარენ, დოკუმენტებით, თქვენ "კეთილი სამარიელის" მმართველი არ ხართ.
_ თბილისში არის ექვსი ადამიანი ვინც ფონდს უწევს კოორდინაციას. მე ლოჯისტიკის კოორდინატორი ვარ. ფონდის კოორდინატორია მერაბ ორაგველიძე. საჩუქრები საქართველოს მთელ ტერიტორიაზე ნაწილდება. აქ არის ყველაფერი _ რა რაოდენობა და ვის რა საჩუქარი გადავეცით (გვაჩვენებს საბუთებით სავსე საქაღალდეს, სადაც დევს დოკუმენტები და CD დისკები. ავტ.) ალბათ, 3 დღით უნდა გადაგედოთ სტატიის დაწერა. გენახათ ფონდის კოორდინატორი, ან მე ჩამოვიდოდი. თქვენ გააკეთეთ სტატია: სომხები, სომხური ეკლესია და მეუფე არიან მაფიოზები. თქვენც და მეც ღმერთის წინაშე სუფთა რომ ვიყოთ, ახსნ- განმარტებას მოგცემთ, იქნებ დავწეროთ გავიაროთ სტატიის ყველა პუნქტი. იმისთვის, რომ ადამიანს არ ჰქონდეს განცდა, თითქო სომხურ ეკლესიაში რაღაც იტალიურ კლანში მოხვდა."
_ ბატონო კარენ, საუბარი ნუ გადაგყავთ ეთნიკურ ჭრილში, რადგან სტატია მხოლოდ ფონდ "კეთილი სამარიელის" საქმიანობას ეხება. მიუხედავად იმისა, რომ საბუთებით თქვენ არ ხართ, ფონდის დირექტორი, სტატიაში რესპონდენტი ასახელებს თქვენს სახელსა და გვარს. 3 დღის განმავლობაში გირეკავდით და გამორთული გქონდათ ტელეფონი. თავადაც ადასტურებთ, რომ არ იყავით საქართველოში. ამის შემდეგ დავუკავშირდით სომხური სამოციქულო ეკლესიის იურისტ ლევონ ისახანიანს, რომელმაც ფონდთან დაკავშირებით გააკეთა კომენტარი. სტატიაში არის ფინანსური პოლიციის წარმომადგენლის კომენტარიც. ჩვენი რესპონდენტი ამბობს: "არსებობს ფონდი "კეთილი სამარიელი", სადაც მუშაობს კარენ ირეციანი, რომელმაც სომხურ ეკლესიასთან ჩხუბის დროს იარაღიდან გაისროლა."
_ სად იარაღი, სად ფონდი?! თქვენ რესპონდენტმა გითხრათ ჩემი სახელი და გვარი? მე გუშინ გოგა ელიბეგოვთან ვიყავი მისული და მითხრა, რომ ჩემი სახელი და გვარი თქვენთან არ უხსენებია.
_ სომხური სამოციქულო ეკლესიის მიერ გავრცელებულ განცხადებაში არსად არ არის ნათქვამი, რომ ჩხუბის დროს იარაღიდან მოხდა გასროლა. გირეკავდით, რომ მეკითხა, თქვენ ისროლეთ იარაღიდან?
_ ნეტა ერთი დღით ადრე დაგერეკათ. ვილაპარაკებდით და ამხელა ამბავი არ იქნებოდა. მე, უბრალოდ, სხვა რამეს გეუბნებით; ამ სტატიას მთლიანობაში ვინც კითხულობს, ისეა ჩამოყალიბებული, წაიკითხავ პირველ გვერდს, გადადიხარ ფინანსური პოლიციის კომენტარში და დამნაშავე ვინ არის? სომხური ეკლესია.
_ ამ სტატიაში ფინანსური პოლიციის გარდა, სომხური სამოციქულო ეკლესიის პოზიციაცაა დაფიქსირებული.
_ კი, ბატონო, წერია, მაგრამ, აქ გაქვთ ფაქტები მოყვანილი, რომელიც არის კილომეტრიანი. ეს სტატია ჩვენთვის სულ მინუსებშია, არცერთი პლუსი არ არის ჩვენს სასარგებლოდ.
_ სტატიაში წერია: "არსებობს ფონდი "კეთილი სამარიელი," სადაც მუშაობს კარენ ირეციანი, რომელმაც სომხურ ეკლესიასთან ჩხუბის დროს იარაღიდან გაისროლა. იგი სურბ ეჩმიაძინის ეკლესიაში სამეურნეო საკითხებს კურირებს." ჩხუბის დროს ისროლეთ იარაღიდან?
_ ვადასტურებ ამ ფაქტს. პირველი ჩხუბის დროს იქ არ ვყოფილვარ. მეორე ჩხუბი რომ მოხდა, გარეთ ვიდექი. ხალხი წამოვიდა, ლევან ისახანიანიც იქ იდგა. მოვარდნენ, ისეთი ამბავი დაიწყო, რომ ადამიანი ახლოს ვერ მივიდოდა. ამოვიღე გაზის იარაღი, რომელიც დარეგისტრირებული მაქვს ტარებისა და შენახვის უფლებით. ვყვიროდი: გაჩერდით! გაჩერდით! ჰაერში სამჯერ გავისროლე. ამის შემდეგ შევედი, დავრეკე პოლიციაში. ჩემი სროლის შემდეგ, ზოგი გაჩერდა, ზოგი გაიქცა. სიტუაცია განიმუხტა. იცით რატომ გავისროლე? ეკლესიასთან ახალი მისული ვიყავი; ავლაბრის მხრიდან, ჩვენს წინ პარკინგი რომ არის, იქ სადაც ერევნის "მარშუტკები" დგანან, მანქანით რომ შემოვედი, პატრულის ეკიპაჟი იდგა. ვიფიქრე, რომ გავისვრი, ისინიც მოვლენ-მეთქი.
_ სტატიაში წერია რესპონდენტის სიტყვები: "ფონდს ფორმალური დამფუძნებლები ჰყავს. "კეთილი სამარიელის" საქმიანობას ეპარქიის იურისტი ლევონ ისახანიანი და მეუფე ვაზგენ მირზახანიანი მართავს. რამდენიმე თვის წინ, ფინანსური პოლიცია ფონდ "კეთილი სამარიელის" საქმიანობით დაინტერესდა, რის გამოც კახეთის რეგიონში ერთ-ერთი ქალბატონი დააკავეს." ეს ინფორმაციაც ტყუილია?
_ ლევონ ისახანიანს ფონდთან არავითარი შეხება არ აქვს. რაც შეეხება მეუფეს,_პირადად მე, საჩუქრების დარიგების დროს, კურთხევას ვიღებ მეუფისგან. სად ვარიგებ, როგორ რამდენს და როდის, გრაფიკს თვითონ ვადგენ. თუ ეკლესიაში რიგდება საჩუქარი, მაშინ შეიძლება მეუფე გამოვიდეს და პირადად გადასცეს ბავშვს საჩუქარი. მეტი არაფერი.
თქვენ გიწერიათ: მეუფე ვაზგენ მირზახანიანი თავისი "არხით" ცდილობს ფონდ "კეთილი სამარიელის" საქმე არ გახმაურდეს და ფინანსურმა პოლიციამ საქმე დახუროს. თუმცა, ვერანაირი გზა ვერ იპოვა. თუ ჩვენ, დამნაშავეები ვართ…
_ ვერ დაგეთანხმებით. არსად მიწერია, რომ თქვენ დამნაშავეები ხართ.
_ რით უნდა ვევაჭროთ თუ დამნაშავეები არ ვართ?! ეს სტატია არ არის გადამოწმებული.
_ როგორც ჟურნალისტი, თქვენს პრეტენზიებს ვერ მივიღებ _ სტატიაში ყველა მხარის კომენტარი მიწერია. რესპონდენტის, ფინანსური პოლიციის, სომხური სამოციქულო ეკლესის იურისტის ლევან ისახანიანის კომენტარი…
_ ხომ გითხრათ, რომ ეს ასე არ არის?!
_ რაც თქვა ლევან ისახანიანმა ყველაფერი წერია.
_ ამ ფონზე ჩანს, რომ ეს აფერისტია. თქვენ გეცინებათ მაგრამ, გუშინ მე კინაღამ ვიტირე. მე თქვენთან იმიტომ მოვედი, რომ ხალხს სიმართლე უთხრათ.
პირველ რიგში მინდა გითხრათ: მეუფე ვაზგენ მირზახანიანი სომხეთის მოქალაქეა. რა კავშირები უნდა ჰქონდეს საქართველოში?! ადამიანი არის მეუფე, ვის უნდა უთხრას ან შეწყვიტე ან ევაჭროს რამე?! თავის თავს უფლებასაც კი არ მისცემს. ჩვენ, ეკლესიას არ გვეხება ფინანსური პოლიცია… რაზე უნდა ევაჭროს ვიღაცას ან დაფაროს? ჩვენ როგორც ეკლესია, საერთოდ არ ვჩანვართ ფინანსურში. "კეთილ სამარიელს" აქვს საქმე ფინანსურ პოლიციასთან, რომელიც სუფთაა. აქ არის გარეული ქალბატონი, რომელიც არაკეთილსინდისიერად მოიქცა.
_ სტატიაში საუბარია პარლამენტის ყოფილ წევრზე დეპუტატ ვან ბაიბურთზე.
_ საერთოდ ამ საქმესთან რა უნდა ვან ბაიბურთს? აქ გიწერიათ "ნაციონალური მოძრაობაც," მათ ჩვენთან არანაირი კავშირი არ აქვთ. ვერ ვხედავ ვან ბაიბურთს, ნაცმოძრაობას, ეკლესიასა და ფონდს შორის კავშირს. თუ ფონდზე წერთ, რა საქმე აქვს ვან ბაიბურთს?!
ოფიციალურად ვაცხადებ, თუ გინდათ ბიბლია მომიტანთ და ხელს დავდებ, მე კარენ ირიციანი საჩუქრების დარიგების დროს მხოლოდ კურთხევას ვიღებ. "კეთილ სამარიელებთან" არც სომხურ ეკლესიას, მეუფე ვაზგენ მირზახანიანს და ლევონ ისახანიანს არანაირი შეხება არ აქვს. "კეთილ სამარიელს" ეკლესიაში მოაქვს და არიგებს საჩუქარს. თქვენი რესპონდენტის ნათქვამი არცერთი წინადადება არ არის სიმართლე."
_ ბატონო კარენ, თქვენ, საუბრის დასაწყისში მითხარით, რომ სანამ სტატიას დავწერდი, უნდა შემესწავლა ვინ არის ფონდ "კეთილი სამარიელის" მფლობელი და აქედან დამეწყო სტატიის დაწერა. ამაშიც ვერ დაგეთანხმებით, რადგან კარგად შევისწავლე ვინ არის ფონდის მფლობელი. ამაში რომ დარწმუნდეთ, კითხვებს დაგისვამთ.
საჯარო რეესტრში ფონდი "კეთილი სამარიელი" საქართველოს სხვა ქალაქებშიც არის დარეგისტრირებული სხვადასხვა ადამიანის სახელითა და გვარით. თუმცა მე იმ ფონდზე დავსვამ კითხვებს, რომლის საჩუქრების დარიგებაშიც უშუალოდ თქვენ მონაწილეობთ. ვინ არიან რობერტ ჩაჩავა, სამრატ კუშიან, მერაბ ორაგველიძე და ნათელა ბოლოთაევა?
_როგორ, რამდენიმე?! რობერტ ჩაჩავა არის მამა გიორგი (ჩაჩავა) _ ქართული მართლმადიდებელ ეკლესიის წარმომადგენელი, რომელიც იყო ფონდის დამფუძნებელი, თუმცა ახალა არ არის ფონდში; სამრატ კუშიანი სომხური ეკლესიის საულიერო პირია _ სანამ მე დავიწყებდი ამ ფონდში მოღვაწეობას, მანამდე ეს მამაო მუშაობდა, ახლა არ არის; მერაბ ორაგველიძე არის ამ ფონდის საქართველოს კოორდინატორი; ნათელა ბოლოთაევა საქართველოს ნაციონალური ჯგუფის კოორდინატორია.
ეს ადამიანები არიან ამ ფონდის დამფუძნებლები. გამოდის, რომ რეესტრში ყოფილხართ.
_ ბატონო კარენ, ვინ არის ქალბატონი, რომელიც ფონდის საქმიანობის გამო კახეთში დააკავეს?
_ თავიდან დაიჭირეს ის ქალბატონი, რომელზეც სტატიაში გიწერიათ. მას არ ვიცნობ და არც მინახავს. მას არანაირი კავშირი არ აქვს სომხურ ეკლესიასთან. თუ არ ვცდები, ფონდ "21-ე საუკუნეს" წარმოადგენს ეს ქალბატონი, ანუ, ჩვენთან ფონდში მოვიდა როგორც ამ ფონდის წარმომადგენელი და დასარიგებლად მიიღო 700-მდე საჩუქარი. რამდენიმე ხნის შემდეგ მოხდა მისი დაკავება, თუმცა, არ ვიცი რატომ დააკავეს თელავში.
_ თქვენ არ ყოფილხართ დაბარებული ფინანსურ პოლიციაში დაკითხვაზე?
_ ამ ქალბატონის დაკავებიდან რამდენიმე დღეში მოვიდნენ, დაკითხვაზე წაიყვანეს ბატონი მერაბი და გამოუშვეს. ყველა კორდინატორი დაკითხეს. მეც ვიყავი დაკითხვაზე. ამ ქალბატონის გამო დაიწყო ფონდის საბუთების შემოწმება.
