არასამთავრობო ორგანიზაციები, "ღირსეული თაობა" და "იურისტები ღირსებისათვის", კაზანტიპის ფესტივალის შესახებ ერთობლივ განცხადებას ავრცელებენ, სადაც ყურადღებას იმ რისკებზე ამახვილებენ, რაც, მათი აზრით, საქართველოში ფესტივალის ჩატარებას შეიძლება მოჰყვეს.
"როგორც ცნობილია, ამა წლის 20-30 აგვისტოს, საქართველოში დაგეგმილია "კაზანტიპის" ე.წ. ვირტუალური რესპუბლიკის მიერ ორგანიზებული ელექტრონული მუსიკის ფესტივალის ჩატარება.
"კაზანტიპის" ვირტუალურ რესპუბლიკას საფუძველი ჩაეყარა უკრაინაში, კერძოდ ყირიმში, 1992 წელს. მისი ორგანიზებით ყოველწლიურად იმართებოდა ელექტრონული მუსიკის ფესტივალი, რომელიც 1998 წლიდან საერთაშორისო ფესტივალად ჩამოყალიბდა. უკრაინაში განვითარებული მოვლენების გამო, კაზანტიპის ფესტივალის ჩატარება საქართველოში გადაწყდა. გვინდა, ყურადღება გავამახვილოთ შემდეგი სახის რისკებზე, რომლებიც აღნიშნული ფესტივალის ჩატარებასთანაა დაკავშირებული:
1.შიდსის და სხვა ვენერიული დაავადებების გავრცელება. როგორც ცნობილია, უკრაინა ერთ-ერთი პირველი ქვეყანაა, შიდსით დაავადებულთა ყველაზე დიდი მაჩვენებლით. აღნიშნული ფესტივალი კი ყოველთვის ტარდებოდა სექსუალური გარყვნილების თანხლებით, რასაც უამრავი ფოტო და ვიდეო მასალა ადასტურებს. სავარაუდოდ, საქართველოშიც ანალოგიურ პროცესებს ექნება ადგილი. 2. შესაძლებელია, საქმე გვქონდეს პროსტიტუციისთვის ადგილის გადაცემასთან. რამდენადაც მოსალოდნელია ის, რომ კარვები და საცხოვრებელი ფართი, სადაც ფესტივალის მონაწილეები განთავსდებიან, იქცევა პროსტიტუციის კერად.
ხოლო ის პირები, რომლებიც აღნიშნულის მიუხედავად აქირავებენ საკუთარ საცხოვრებელ ფართს – პოტენციურ დამნაშავეებად შეგვიძლია მოვიაზროთ, საქართველოს სისხლის სამართლის კოდექსის 254-ე მუხლის მიხედვით: პროსტიტუციისთვის ადგილის ან საცხოვრებლის გადაცემა – ისჯება ჯარიმით, ან თავისუფლების აღკვეთით, ვადით ორიდან ოთხ წლამდე. 3. მატონიზირებელი/ენერგეტიკული სასმელების მოხმარების შედეგად გამოწვეული საფრთხე: ჯანდაცვის სფეროში მომუშავე ამერიკელმა მკვლევარებმა დაადგინეს, რომ ენერგეტიკული სასმელის მოხმარებას უკავშირდება სარისკო და აგრესიული ქცევები, მათ შორის დაუცველი სექსი და ძალადობა", _ აღნიშნულია არასამთავრობოების მიერ გავრცელებულ განცხადებაში.
