"2012 წლის საპარლამენტო და 2013 წლის საპრეზიდენტო არჩევნებში ქართველმა ხალხმა ერთგვარი ვერდიქტი გამოუტანა ყოფილ ხელისუფლებას. წაყენებული ბრალდებებით ყოფილ პრეზიდენტ სააკაშვილის დევნა წინააღმდეგობრივ რეაქციებს იწვევს დასავლეთში", _ ასე ეხმაურება არასამთავრობო ორგანიზაცია "ფრიდომ ჰაუსის" პრეზიდენტი, დევიდ კრეიმერი, საქართველოს ყოფილი პრეზიდენტისთვის ბრალის წაყენებას.
როგორც იგი "ამერიკის ხმისთვის" მიცემულ ინტერვიუში აღნიშნავს, საქართველოს ხელისუფლების მდგომარეობა, ყოფილი პრეზიდენტისათვის წაყენებულმა დამატებითმა ბრალმა გაართულა.
"იქმნება შთაბეჭდილება, რომ სწორედ ასე იქცეოდა იანუკოვიჩი იულია ტიმოშენკოს წინააღმდეგ. იგულისხმება სხვა და სხვა ბრალის წაყენება იქამდე, სანამ სააკაშვილს ციხეში არ ჩასვამენ. სწორედ ეს წარმოშობს შესაძლებლობას, ვიფიქროთ, რომ პროკურატურა სამართლებრივ პროცესს პოლიტიკური მიზნებისათვის იყენებს. ვფიქრობ, საქართველოს ხელისუფლება ვერ გაექცევა დამატებით ტვირთს, ამტკიცოს, რომ ამ ბრალდებებს პოლიტიკური ანგარიშსწორების მიზანი არ აქვს.
ბრალი, რომელიც სააკაშვილს წაუყენეს, არ გახლავთ მთავრობის ყოფილ მაღალჩინოსნების სამართლებრივი დევნის პირველი და ერთადერთი შემთხვევა. 2013 წლის დასაწყისში, აგრეთვე მიმდინარე წელს გამოითქვა სხვა ბევრი შეშფოთებაც, რომ მთავრობა პროკურატურას ყოფილი პრემიერ-მინისტრის, თბილისის ყოფილი მერის, აგრეთვე სააკაშვილის პარტიისა და მთავრობის სხვა წარმომადგენლების წინააღმდეგ იყენებდა. ამგვარად სააკაშვილის პასუხისგებაში მიცემა არაა სიახლე, რომელიც რაიმე ახალ შეშფოთებას იწვევდეს.
ეს ამბები უკვე წელიწადნახევარია გრძელდება, მაგრამ სააკაშვილისათვის ბრალის წაყენებამდე დასავლეთი ამ მოვლენებს დიდ ყურადღებას არ უთმობდა. დღეს ეს საქმეები უფრო მეტ ყურადღებას იქცევს. მე მაინც ველი და იმედი მაქვს, რომ საქართველოს ახალი ხელისუფლება გააგრძელებს ევრო-ატლანტიკური მიმართულებით სვლას და შეეცდება ეროკავშირთან ურთიერთობის გაღრმავებას. ნატოს საკითხი, როგორ ჩანს, გადაიდება. ჩრდილოატლანტიკურმა ორგანიზაციამ უკვე განაცხადა, რომ წელს გაფართოების თემას არ განიხილავს და საქართველოს გაწევრიანება ისედაც არ იდგა დღის წესრიგში.
მაგრამ იქნება შეშფოთება ზოგიერთ დედაქალაქში, განსაკუთრებით ბერლინში. დასავლეთში ინტეგრაციის მიმართულებით საქართველოს ძალისხმევის შესახებ ბერლინს იმთავითვე ყველაზე მეტი ეჭვი გააჩნდა. სააკაშვილისათვის წაყენებული ბრალი კი შეშფოთებას უფრო გაზრდის."
