ლანჩხუთის მუნიციპალიტეტის სოფელ ნიგვზიანის მოსახლეობის ერთი ნაწილი, "გურია ნიუსთან" საუბრის დროს ამბობს, რომ ბოლო დროს სტიქიამ მნიშვნელოვანი ზიანი მიაყენა მათ და უმეტესი ნაწილი თხილის გარეშე დატოვა.
ივნისში ძლიერი ქარის შედეგად, თხილის მოსავალი განადგურდა ოზურგეთის მუნიციპალიტეტის რამდენიმე სოფელშიც.
"თხილი არის ჩვენი შემოსავალი. წელს, ივნისში, ძლიერმა ქარმა გაანადგურა მოსავალი და არ ვიცით, რა ვქნათ. ყველას ვთხოვთ დახმარებას", _ გვითხრეს სოფელ ნიგვზიანში.
ლანჩხუთის მუნიციპალიტეტის გამგეობაში ზუსტად არ იციან აუნაზღაურდებათ თუ არა კომპენსაცია დაზარალებულ მოსახლეობას.
"ლანჩხუთის მუნიციპალიტეტის ნიგვზიანისა და ჩოჩხათის ტერიტორიული ერთეულების რწმუნებულების შეტყობინების საფუძველზე, გამგეობისა და სოფლის მეურნეობის სამინისტროს ლანჩხუთის საინფორმაციო-საკონსულტაციო სამსახურის სპეციალისტებმა, ერთობლივად დაათვალიერეს ძლიერი ქარის მიერ დაზიანებული თხილის ბაღები, დასურათებული მასალები გადაეგზავნა სოფლის მეურნეობის სამინისტროს", _ გვითხრეს ლანჩხუთის მუნიციპალიტეტის გამგეობის პრესსამსახურში.
16 აგვისტოს, საქართველოს პრემიერ-მინისტრი ირაკლი ღარიბაშვილი გუბერნატორებს შეხვდა. ინფორმაციას ამის შესახებ, პრემიერ-მინისტრის პრესსამსახური ავრცელებს.
სამუშაო შეხვედრაზე, რომელიც მთავრობის ადმინისტრაციაში გაიმართა, საუბარი რეგიონებში არსებულ მდგომარეობას შეეხო.
მთავრობის მეთაურმა სახელმწიფო რწმუნებულებისგან რეგიონებში მიმდინარე პროექტების შესახებ შუალედური ანგარიშები მოისმინა.
პრემიერ-მინისტრი სტიქიით დაზარალებულ რეგიონებში არსებული ვითარებით დაინტერესდა და გუბერნატორებს პრობლემებზე ოპერატიული რეაგირება დაავალა.
რა იგეგმება სტიქიასთან დაკავშირებით გურიაში და მოხდება თუ არა თხილზე კომპენსაციის გაცემა მოსახლეობაზე ამ კითხვით გურიის გუბერნატორს გიორგი ჩხაიძეს მივმართეთ:
"გვქონდა სამუშაო შეხვედრა პრემიერ – მინისტრთან, რომელიც მთავრობის ადმინისტრაციაში გაიმართა, საუბარი შეეხო რეგიონებში არსებულ მდგომარეობას. პრემიერ – მინისტრმა გუბერნატორებისგან მიმდინარე პროექტების შესახებ შუალედური ანგარიშები მოისმინა.
პრემიერი სტიქიით დაზარალებულ რეგიონებში არსებული ვითარებითაც დაინტერესდა.
მთავრობის მეთაურმა დავალება მოგვცა სწრაფი რეაგირება მოვახდინოთ სტიქიის შედეგად დაზიანებული გზების, არხების რეაბილიტაციაზე, კონკრეტულად ჩოხატაურის მუნიციპალიტეტში და განვახორციელოთ სარეაბილიტაციო სამუშაოების მონიტორინგი.
რაც შეეხება, თხილზე კომპენსაციის გაცემას გეტყვით, რომ ამ საკითხს გუბერნატორი არ წყვეტს და პრემიერისგან ამ მიმართულებით დავალება არ მიგვიღია. ეს არ არის გუბერნატორის პრეროგატივა", _ ამბობს გიორგი ჩხაიძე.
