საქართველოს სახალხო დამცველს, ქვეყნის მოქალაქე კარინა გრიგორიანი სპეციალური განცხადებით მიმართავს, სადაც იგი "დისკრიმინაციის ყველა ფორმის აღმოფხვრის შესახებ" კანონის დარღვევის შესახებ საუბრობს.
"სოციალურ ქსელ "ფეისბუქში" სს "საქართველოს ნავთობისა და გაზის კორპორაციის" საზოგადოებასთან ურთიერთობის სამსახურის უფროსმა[1] ნინო ჯღარკავამ ჩემი მისამართით დაწერა შემდეგი პოსტი: "ვიღაც გრიგორიანის კარინეს სალაპარაკო რომ იქნე(ბა) ქართველები, ფუი .." "მე დავბლოკე უკვე კაროო :))) და მისი სიბრძნეებით ტვინს აღარ ვინაგვინებ და ისე გადაეცით, თამაზაშვილს კიდევ ახსენებს და ერევნის მატარებელს გავაყოლებ." გარდა ამისა, ნინო ჯღარკავამ საქართველოს ეთნიკურ უმცირესობას მიკუთვნებული მოქალაქეების მიმართ გააკეთა დისკრიმინაციული შინაარსის განცხადება: "ყველას ერთნაირად ვერ ეყვარება საქართველოო თემურ, ყველას თავისი სამშობლო უყვარს!
ყველა იმ სომეხის და აზერის დედა, ვისაც თავის ჯიშს საქართველო ურჩევნია! ის არც თავის ქვეყანას წაადგება და არც სხვისას!" "ქაჯი ვარ და ჯერ ქართველები მიყვარს და მერე სხვა ეროვნების ხალხი! დიახ ასეთი ქაჯი ვარ! ხოდა ასეთი ქაჯი მინდა იყვნენ სომხებიცც, აზერბაიჯნებიც და ინგლისელებიც! ჯერ ჩემი ეროვნება!" (სტილი დაცულია).
"დისკრიმინაციის ყველა ფორმის აღმოფხვრის შესახებ" კანონის მე-2 მუხლის მე-2 პუნქტის თანახმად, პირდაპირი დისკრიმინაცია არის ისეთი მოპყრობა ან პირობების შექმნა, რომელიც პირს საქართველოს კანონმდებლობით განსაზღვრული უფლებებით სარგებლობისას ამ კანონის პირველი მუხლით გათვალისწინებული რომელიმე ნიშნის გამო (ამ შემთხვევაში ეროვნული, ეთნიკური კუთვნილება) არახელსაყრელ მდგომარეობაში აყენებს ანალოგიურ პირობებში მყოფ სხვა პირთან შედარებით.
ნინო ჯღარკავას განცხადება, რომ ის წინა პლანზე აყენებს ეთნიკურ ქართველებს (ჯერ ჩემი ეროვნება) და შემდგომ სხვა ეთნიკური ჯგუფის წარმომადგენლებს (ჯერ ქართველები მიყვარს და მერე სხვა ეროვნების ხალხი), მაშინ როდესაც, "დისკრიმინაციის ყველა ფორმის აღმოფხვრის შესახებ" კანონის მე-3 მუხლი ყველა ფიზიკური და იურიდიულ პირს (მათ შორის სააქციო საზოგადოება "საქართველოს ნავთობისა და გაზის კორპორაციას") აკისრებს ვალდებულებას, უზრუნველყოს, თანაბარი მოპყრობა ადამიანის ეთნიკური კუთვნილების მიუხედავად. ნინო ჯღარკავას განცხადებები ქმნის "დისკრიმინაციის ყველა ფორმის აღმოფხვრის შესახებ" საქართველოს კანონის დარღვევის საფრთხეს. ამასთან ნინო ჯღარკავას განცხადება არის სიძულვილის ენის შემცველი, რაც განსაკუთრებით შეუთავსებელია სახელმწიფოს მიერ გადასახადების გადამხდელების, მათ შორის ეთნიკური სომხებისა და აზერბაიჯანელების, ფულადი სახსრებით დაფუძნებულ სააქციო საზოგადოებაში დასაქმებული პირისათვის.
საქართველოს მთავრობის #299 დადგენილების შესაბამისად, "ნავთობისა და გაზის შესახებ" საქართველოს კანონის პირველი მუხლის პირველი პუნქტის "აე" ქვეპუნქტების შესაბამისად, სააქციო საზოგადოება "საქართველოს ნავთობისა და გაზის კორპორაციას" მიენიჭა ნავთობის ეროვნული კომპანიის სტატუსი. "ნავთობისა და გაზის შესახებ" საქართველოს კანონის შესაბამისად, ნავთობის ეროვნული კომპანია არის საწარმო, რომლის წილების (აქციების) 50%-ზე მეტს ანდა სახელმწიფოს 50%-ზე მეტი წილობრივი მონაწილეობით არსებული საწარმო და რომელსაც საქართველოს მთავრობის დადგენილებით მინიჭებული აქვს ნავთობის ეროვნული კომპანიის სტატუსი.
როგორც ცნობილია, საქართველოს ნავთობისა და გაზის კორპორაციის აქციათა 100%-ს ფლობს სააქციო საზოგადოება საპარტნიორო ფონდი, რომელიც, თავის მხრივ, სახელმწიფო საკუთრებაშია[1]. ამგვარად, საქართველოს ნავთობისა და გაზის კორპორაციას არაპირდაპირ აკონტროლებს სახელმწიფო. მაშინ როდესაც დისკრიმინაციის ყველა ფორმის აღმოფხვრის შესახებ კანონი ვრცლდება როგორც კერძო იურიდიულ და ფიზიკურ პირებზე, ეს კანონი
ასევე ეხება სახელმწიფო დაწესებულებებს, ასევე სახელმწიფოს კონტროლქვეშ არსებულ იურიდიულ პირებსაც და, მათ შორის, საქართველოს ნავთობისა და გაზის კორპორაციასაც.
"დისკრიმინაციის ყველა ფორმის აღმოფხვრის შესახებ" საქართველოს კანონის მე-6 მუხლის პირველი პუნქტის თანახმად, დისკრიმინაციის აღმოფხვრისა და თანასწორობის უზრუნველყოფაზე ზედამხედველობაზე პასუხისმგებლობას ახორციელებს საქართველოს სახალხო დამცველი. გარდა ამისა, აღნიშნული კანონის მე-4 მუხლის "ა" ქვეპუნქტის თანახმად, "დისკრიმინაციის აღმოსაფხვრელად ნებისმიერი დაწესებულება (მათ შორის, ნავთობისა და გაზის კორპორაცია) ვალდებულია, თავისი საქმიანობა, აგრეთვე სამართლებრივი აქტები და შიდა რეგულაციები, თუ ისინი არსებობს, შეუსაბამოს ამ კანონსა და სხვა ანტიდისკრიმინაციულ კანონმდებლობას. იმავე მუხლის "გ" ქვეპუნქტის შესაბამისად, დისკრიმინაციის ფაქტის დადასტურების შემთხვევაში, საქართველოს კანონმდებლობისა და შიდა რეგულაციების შესაბამისად, პასუხისმგებლობა დააკისროს მის დაქვემდებარებაში მყოფ პირს.
გთხოვთ, თქვენი კომპეტენციის ფარგლებში, შეისწავლოთ ნინო ჯღარკავას მიერ სოციალურ ქსელში გაკეთებული განცხადებები, შეაფასოთ აღნიშნული განცხადებების შესაბამისობა "დისკრიმინაციის ყველა ფორმის აღმოფხვრის შესახებ" საქართველოს კანონთან და საჭიროების შემთხვევაში, საქართველოს ნავთობისა და გაზის კორპორაციის გენერალურმა დირექტორმა, კანონისა და კორპორაციის შიდა რეგულაციის (ასეთის არსებობის შემთხვევაში) შესაბამისად, უზრუნველყოს ნინო ჯღარკავასათვის დისციპლინური პასუხისმგებლობის დაკისრება", _ ნათქვამია განცხადებაში.
