"გურია ნიუსის" წყაროს ინფორმაციით, გუშინ, ოზურგეთის სამედიცინო ცენტრის "მედალფას" დირექტორს, დავით მდინარაძესა და ჯანდაცვის სამინისტროს დაავადებათა კონტროლის ეროვნული ცენტრის გურიის განყოფილების უფროს არჩილ მჟავიას შორის, სიტყვიერ შეურაცხყოფა მოხდა, რაც ფიზიკურ დაპირისპირებაში გადაიზარდა.
აღნიშნული ფაქტი შპს "მედალფას" გურიის რეგიონალური დირექტორის ლევან ანთაძის კაბინეტში მოხდა.
ლევან ანთაძის თქმით, ექიმებს შორის დაპირისპირება რამდენიმე დღის წინ დაიწყო. არჩილ მჟავიამ ისეთი რამეებით გამოიჩინა თავი, რაც მის ფუნქციებში არ შედის და მისი მოვალეობა ეს არ იყო.
დავით მდინარაძემ მას ამის გამო, კლინიკაში მოსულს შენიშვნა მისცა, რაც მან არ იკადრა და გაღიზიანებულმა სიტყვიერი შეურაცხყოფა მიაყენა დავითს.
დავითმა ამის შემდეგ მას მოსთხოვა, რომ დაეტოვებინა კლინიკა, რადგან შეიჭრა სხვის ფუნქციებში.
"ამის შემდეგ, ორშაბათს, მოდის ჩემთან კლინიკაში და შემოდის ოთახში, რაც ძალიან გამიკვირდა, რადგან ისევ ისე იქცეოდა, რაც მას არ ევალებოდა, ეს მის სამსახურში გადავამოწმეთ. არჩილ მჟავიას მოსვლას ჰქონდა ერთი მიზეზი, რომ კვლავ კონფლიქტი გაღვივებულიყო და მიაღწია კიდეც. იყო ერთ წამიანი შეხლა-შემოხლა, მისი მხრიდან იყო შეურაცხყოფის მცდელობა, ცემის ფაქტი არ მომხდარა.
პოლიციაშია საჩივარი და პოლიცია გაარკვევს. ჩემს ოთახში იყო ნამდვილად, ერთმა მხარემ მიაყენა სიტყვიერი შეურაცხყოფა, შემდეგ მოხდა შეხლა-შემოხლა, მაგრამ ცემის ფაქტს ადგილი არ ჰქონია, ერთ წამში დასრულდა ყველაფერი, ეს იყო და ეს", _ ამბობს ლევან ანთაძე.
ჯანდაცვის სამინისტროს დაავადებათა კონტროლის ეროვნული ცენტრის გურიის განყოფილების უფროსი, არჩილ მჟავია:
"საქმე პოლიციაშია, შევედით მე და ჩემი თანამშრომელი სამედიცინო ცენტრში, "მედალფაში". ვასრულებდით სამსახურებრივ მოვალეობას, ეს მოხდა გენერალური დირექტორის ლევან ანთაძის კაბინეტში, ვიყავით საქმიან შეხვედრაზე, მოსაგვარებელი იყო ორგანიზაციული საკითხები. შემოვარდა დავით მდინარაძე, გასალახი ხარო, მწვდა ყელში, მახრჩობდა, აქ როგორ შემოხვედიო. შემდეგ ბატონმა ლევანმა გამოართვა ჩემი თავი ხელიდან. პოლიციაც მოვიდა. ადამიანს რომ გენერალური დირექტორის კაბინეტში ცემას დაუწყებ, აქ იკვეთება ბატონი ლევან ანთაძის მონაწილეობაც. მე ხომ ქურდი არ ვარ, ქურდული გარჩევები დავუწყო, პოლიციამ ამ საქმეს მსვლელობა უნდა მისცეს."
დავით მდინარაძე აღნიშნულ ფაქტს არ ადასტურებს.
"მე არ მიცემია, ხელი არ დამარტყამს, არ ვახრჩობდი",_ გვითხრა მდინარაძემ.
შსს-ს პრესსამსახურში აღნიშნულ ფაქტს ადასტურებენ.
საქმეზე აღძრულია სისხლის სამართლის საქმე სსკ #120 მუხლით, რაც ჯანმრთელობის განზრახ, მსუბუქად დაზიანებას ითვალისწინებს.
