პოპულარული გადაცემის მორიგი სიუჟეტი, წუხელ ღამით სწორედ ჩოხატაურს მიეძღვნა. რამიშვილმა ყურადღება მოუწესრიგებელ ინფრასტრუქტურაზე გაამახვილა:
_ ისეთი შთაბეჭდილება მრჩება, რომ ჩოხატაურში ვარდების რევოლუცია არ მომხდარა, _ გვითხრა გადაცემის ავტორმა და წამყვანმა.
სწორედ ეს იყო რამიშვილის მთავარი შეკითხვა ხელისუფლების მისამართითაც. ჩოხატაურის გამგეობაში მისულ ჟურნალისტს და მის გადამღებ ჯგუფს, ზოგი დაემალა, ზოგი ღიმილით დახვდა, ზოგმაც “მაესტროს” მიკროფონი დაიკავა და ისე მისცა ინტერვიუ.
გადამღები ჯგუფის ვიზიტი ჩოხატაურის “თეთრ სახლში” 3 საათსა და 15 წუთზე ბუღალტერიიდან დაიწყო, სადაც ჟურნალისტს ბუღალტერიის თანამშრომლები გაშლილ სუფრასთან მსხდომები დახვდნენ. რამიშვილი გამგეობის ბუღალტერს ზურაბ შათირიშვილს გაესაუბრა და ჩვენს მიერ მიწოდებული, გამგებლის სახელზე დაწერილი მისი განცხადება აჩვენა, სადაც შათირიშვილი ჰიბრიდული ჯიშის სიმინდის ამოუსვლელობის შესახებ წერს. შათირიშვილის განმარტებით, განცხადების დაწერის მიზეზი სათესლე სიმინდის საფასურის ჩამოწერა გახლდათ.
სტუმრებმა ბუღალტერიიდან გამგებლის მისაღებში გადაინაცვლეს, თუმცა, გამგებელი ადგილზე არ დახვდათ და რამიშვილი საკუთარ კაბინეტში მიიღო გამგებლის მოადგილემ გია გიორგაძემ, რომელმაც კითხვაზე, მოხდა თუ არა ჩოხატაურში რევოლუცია უპასუხა, რომ ნელ-ნელა ყველაფერი კეთდება.
გამგებლის მეორე მოადგილე დიმიტრი კორიფაძე, მართალია, დამალვას შეეცადა, თუმცა არაფერი გამოუვიდა და გადამღებმა ჯგუფმა დერეფანში “გამოიჭირა”. ყველა დროის ჩინოვნიკმა ჟურნალისტის შეკითხვებს მხოლოდ ერთი პასუხი გასცა: “უკომენტაროდ”.
რამიშვილი მაჟორიტარი დეპუტატის კორნელი კუკულავას კაბინეტშიც მივიდა, თუმცა ეს უკანასკნელი იქ არ იმყოფებოდა. ყველაზე ხანგრძლივი ინტერვიუ რამიშვილმა საკრებულოს მმართველი ფრაქციის თავმჯდომარესთან ზაზა ბასილიასთან ჩაწერა, რომელმაც “მაესტროს” მიკროფონით ხელში ისაუბრა.
როგორც წესი, საკრებულოს დეპუტატების უმრავლესობა კაბინეტში არ იმყოფებოდა. საკრებულოში მასპინძლობა საკრებულოს თავმჯდომარემ ითავა, რომელმაც იმ “სასიკეთო ცვლილებებზე” ისაუბრა, რომელიც ჩოხატაურში მოხდა და “აწი მოხდება”. ჟურნალისტის კითხვაზე, რატომ არ არის წყალი ჩოხატაურში, ხუნდაძემ გაიკვირვა და აღნიშნა, რომ ჩოხატაურს ნორმალური წყალმომარაგება აქვს, თუმცა რატომღაც არ განმარტა, რომ ახალი წყალსადენით, რომლის მშენებლობაზეც 3 მილიონია დახარჯული და რომელიც დავით ბაქარაძის სიმამრმა, ლერი მეტრეველმა გააკეთა, ჩოხატაურს წყალი ჯერაც არ მიწოდებია.
საკრებულოს თავმჯდომარე, კაბინეტური ინტერვიუდან რამდენიმე წუთში, გამგეობის წინ ისევ დახვდა ჟურნალისტს და იმის სადემონსტრაციოდ, რომ ჩოხატაურს წყალი ნამდვილად ჰქონდა, სამრევლო სკოლის წინ, “მჩქეფარე შადრევანი” აჩვენა, რაც თვალში ნაცრის შეყრას უფრო ჰგავდა, რადგან ჩოხატაურელებს იმ შადრევანში, რომელიც ნახევრად დანგრეულია, წყალი დიდი ხანია არ უნახავთ _ ფაქტი ის იყო, რომ წყალი სწორედ იმიტომ გაუშვეს, რომ რამიშვილს დაენახა.
ჟურნალისტი კმაყოფილი დარჩა კულტურის ცენტრში სტუმრობით, სადაც ცენტრის აღსაზრდელებს შეხვდა და რამდენიმე მათგანის სიმღერაც ჩაიწერა.
შალვა რამიშვილი ჩოხატაურის მუზეუმსაც ეწვია და ძველებური ნივთებით დაინტერესდა, ბოლოს კი მოსახლეობას გაესაუბრა. მოინახულა ადამიანები, ვისთანაც ჰიბრიდულმა სიმინდმა არ იხარა. სეირნობის დროს, ანტონ ხუნდაძემ რამიშვილს საჩუქარი მიართვა _ ჰიბრიდული ჯიში სიმინდის სამი ტარო: _ გავიგე, ამ თემით დაინტერესებულხართ და გქონდეთ, დარწმუნდით, რომ მოსავალმა გაამართლა, _ უთხრა ხუნდაძემ რამიშვილს.
_ თითქმის მთელი საქართველო მოვიარე და ისეთი მდგომარეობა, როგორიც ჩოხატაურშია, არსად მინახავს. გამჭვირვალე პოლიციის შენობაც კი არ დგას აქ. საშინელი შენობები, გაფუჭებული გზა… არა, აქ რევოლუცია ნამდვილად არ არის მომხდარი, _ გვითხრა წასვლის წინ რამიშვილმა და დასძინა, რომ მომავალში გურიის დანარჩენ მუნიციპალიტეტებსაც ესტუმრება.
