ოზურგეთის მუნიციპალიტეტის გამგებელს მერაბ ჭანუყვაძეს სამი მოადგილე ჰყავს _ არჩილ ყაზაიშვილი, ალექსანდრე ყველაშვილი და გიორგი ღურჯუმელიძე, ასევე, თანაშემწედ ჰყავს ვასილ ქარჩავა. რამდენიმე დღის წინ კი გამგებელმა ორი მრჩეველი დანიშნა _ დავით ნინიკაშვილი საინფორმაციო ანალიტიკურ საკითხებში დროებით მოვალეობის შემსრულებლად, ხოლო რამაზ ზოსიაშვილი კი საინვესტიციო და საერთაშორისო ურთიერთობების საკითხებში იქნება მრჩეველი.
ქალაქ ოზურგეთის მერს ერთი მოადგილე ჰყავს _ ალეკო ბურჭულაძე, თანაშემწე კახაბერ ღლონტი, მალე ვიცე-მერიც ეყოლება და ასევე, დანიშნული ჰყავს მრჩევლები _ ვასილ ვაშალომიძე და სოფო ჭანტურია _ საზოგადოებასა და მედიასთან ურთიერთობის საკითხებში.
არიან თუ არა საჭირო მრჩევლები თვითმმართველობებში, რა ფუნქცია აკისრიათ მათ, ნიშნავს თუ არა ეს სახელმწიფო სახსრების უყაირათო ხარჯვას, ამასთან დაკავშირებით კომენტარი ვთხოვეთ იურისტ ლევან ალაფიშვილს, რომელსაც მიაჩნია, რომ ეს არ არის ერთი თემის, გამგეობის, მერიის პრობლემა, არამედ ეს არის ზოგადად საჯარო სამსახურის პრობლემა, რომელიც კომპლექსურად უნდა მოწესრიგდეს.
"არა მხოლოდ რიცხოვნობა-რაოდენობა, არამედ შერჩევის კრიტერიუმებიც პერსონალურად უნდა გამორიცხავდეს სუბიექტივიზმს ამ ყველაფერში. მრჩეველი რამდენი უნდა იყოს, ეს დამოკიდებულია საჭიროებაზე, სუბიექტური გადაწყვეტილებისთვის ადგილი არ უნდა რჩებოდეს. კონკრეტულ შემთხვევაში, შესაძლებელია მართლაც ორი მრჩეველი საკმარისი ან ზედმეტი იყოს.
რაც შეეხება გამგეობას და მერიას, გამგებელთან და მერთან მიმართებაში უფრო მეტად სკეპტიკური ვიქნებოდი იმ მხრივ, რომ გამგებელს ჰყავს, ე.წ. მხარდამჭერი გამგეობა, სამსახურები იქნება თუ აპარატი, სადაც ზუსტად პროფესიული ნიშნით უნდა ჰქონდეთ განაწილებული ფუნქციები. შესაბამისად, შესაძლებელია ეს სკეპტიკურობა გამართლებული იყოს. რაც შეეხება საკრებულოს თავმჯდომარეს, იმის გათვალისწინებით, რომ ახალი თვითმმართველობის კოდექსის ამოქმედების შემდეგ, შეიცვალა ფუნქცია თვითონ საკრებულოს და თავმჯდომარესთან მიმართებაში, რომელსაც შესაძლებელია, ოპერატიული გადაწყვეტილების მისაღებად სჭირდებოდეს პროფესიული დახმარება. ასე თუ მივუდგებით საკითხს, კიდევ ჰო, მაგრამ გამგეობის მხარეს, აღმასრულებელ რგოლში, უფრო სკეპტიკური ვიქნებოდი და უფრო გონივრული გადაწყვეტილებებისკენ მოვუწოდებდი აღმასრულებელ რგოლს. გამგებელს აქვს მეტი შტატი, ვიდრე საკრებულოს, რიცხოვნობითაც და კომპეტენციითაც. აქვს ბევრი სამსახური. მაშინ, რა საჭიროა საფინანსო-საბიუჯეტო ან ეკონომიკის, განათლების, ინფრასტრუქტურის და ასე შემდეგ სამსახურები? მაშინ რაში სჭირდება ეს სამსახურები, მრჩევლები თუ უნდა აიყვანოს?
_ ბატონო ლევან, ქალაქის მერიას და გამგეობას აქვს საზოგადოებასთან ურთიერთობისა და საინფორმაციო განყოფილება, სადაც დანიშნულია განყოფილების უფროსები და სპეციალისტები, მრჩევლებიც ამ სფეროსთვის აიყვანეს, ეს იმას ხომ არ ნიშნავს, რომ, ზოგადად, მედიასთან ურთიერთობისთვის სჭირდებათ? ანუ მედიას არ ჰქონდეს უშუალო და პირდაპირი ურთიერთობა გამგებელთან და მერთან?
_ ამ მიმართულებით არსებობს სტრუქტურული ერთეულები. აღნიშნულ განყოფილებაში დასაქმებული არიან პიროვნებებიც. მოდი, პატარა ირონიასაც გავურევ, შესაძლებელია, ამით კანონის კანონიერი გზით შემოვლის გზა იპოვეს.
ეს ნიშნავს იმას, რომ არჩევნების შემდეგ ასე ხელაღებით ვერ დაასაქმებდნენ და, უბრალოდ, შესაძლებელი გახდა ამ სტრუქტურულ ერთეულებში მრჩევლებად მიეყვანათ ეს ადამიანები. თუმცა, ეს არის პრობლემა რეალურად, რომელიც შეიძლება დიდ პრობლემად იქცეს კონკრეტულ საკითხში; მხედველობაში მაქვს ძალიან მარტივი ლეგიტიმური კითხვა, თუნდაც ფინანსური კუთხით დანახული, იგივე არასამთავრობო ორგანიზაციების ან აუდიტის მიერ დასმული. ფინანსები, რომელიც ხმარდება ისეთ რამეს, რომლის სტრუქტურულ ერთეულებს აქვს და ამავე დროს შტატგარეშე თანამშრომლებს ამავე სფეროში მრჩევლების სახით აიყვანენ, ეს რა გამოდის? ეს არის სახელმწიფო სახსრების, მინიმუმ, უყაირათო ხარჯვა. არ არის კანონდარღვევა, თუმცა არის ერთ-ერთი ხარვეზი, რომლის შევსებაზეც მოუწევს თვითმმართველობებს ზრუნვა. წინააღმდეგ შემთხვევაში, ეს ყველაფერი შეიძლება გარდაიქმნას პრობლემებად კანონთან და მე არავის ვუსურვებ კანონთან პრობლემების შექმნას", _ აღნიშნავს ალაფიშვილი "გურია ნიუსთან" საუბრისას.
