“ჩვენ მაინც გვითხარით, საკრებულოს წევრებს, მაინც რა ღირს ბაზა!”

ლანჩხუთის მუნიციპალიტეტის საკრებულოს სხდომაზე აქტუალობას არ კარგავს საფეხბურთო კლუბი "გურია". საკრებულოს რიგგარეშე სხდომაზე ლანჩხუთის მუნიციპალიტეტის გამგეობის იურიდიული სამსახურის უფროსის მოვალეობის შემსრულებლის, შოთა ჩაგუნავას თქმით, შპს კლუბ "გურია 2000"-ის საწესდებო კაპიტალიდან ამოიღეს ე. შევარდნაძის სახელობის ცენტრალური სტადიონიდან ყველა ის ქონება, რაც აუცილებელია საფეხბურთო კლუბ "ლანჩხუთის გურიას" ასპარეზობისთვის.ეს ქონება სოფელ გრიგოლეთში მდებარე სპორტულ ბაზასთან და გამგეობის ბალანსზე არსებულ ავტომანქანასთან ერთად გადაეცემა ა(ა)იპ-ი ლანჩხუთის მუნიციპალიტეტის გამგეობის საფეხბურთო კლუბ "ლანჩხუთის გურიას".

ლანჩხუთის მუნიციპალიტეტის გამგებელ ზაზა ურუშაძეს და საკრებულოს დეპუტატ დარეჯან ბურჭულაძის შორის საფეხბურთო კლუბ "გურიასთან" დაკავშირებით პოლემიკა გაიმართა.

დარეჯან ბურჭულაძე: _ ძალიან კარგია, გასული წლისგან განსხვავებით, წელს "გურიას" რომ ასე ეხმარებით. როგორც ინფორმაცია მაქვს, საფეხბურთო კლუბის ადმინისტრაციის თანამშრომლებს სამი და ხუთი თვის ხელფასი არ აქვთ აღებული. ძალიან მაინტერესებს, რაში დაიხარჯა 230 ათასი ლარი და რატომ არ იქნა დაფარული ეს დავალიანება? ვის უნდა მივმართო ამის გასაგებად?  ჩემი ოჯახი იყო ჩართული (ექს-დირექტორი კობა მირზაშვილი, დარეჯან ბურჭულაძის მეუღლეა) "გურიას" თუნდაც დაფინანსებაში და კარგად ვიცი, რა მხარდაჭერაც იყო გასულ წელს.

ზაზა ურუშაძე: _ კლუბს ჰყავს დირექტორი და მას უნდა მიმართოთ. რაც შეეხება დავალიანებას, "გურიამ" 1,7 მილიონი ლარი მიიღო ბიუჯეტიდან და ძველი არანაირი დავალიანება არ უნდა იყოს. შესაბამისად, ვერ მივიღებთ პრეტენზიას, რომ გასულ წელს კლუბს არ ვეხმარებოდით. ჩვენ ყველას მადლობას ვუხდით, ვინც კლუბს დაეხმარა. ყველას, მათ შორის, თქვენს ოჯახსაც, თუ რამე კლუბს დაახარჯა და ამის დოკუმენტაციას წარმოადგენს, დავუბრუნებთ ყველა თეთრს.

ზაზა ურუშაძე დაინტერესდა პრემიით, რომელიც კლუბის ყოფილმა დირექტორმა გამოწერა, რაზეც დარეჯან ბურჭულაძემ უპასუხა: ამ საკითხთან დაკავშირებით მე არაფერ შუაში არ ვარ და შეგიძლიათ, თქვენ დაინტერესდეთ.

დეპუტატი ჯუმბერ ბლაგიძე დაინტერესდა ბაზის ფასით, რომელიც ჩამონათვალთა სიაში არ იყო:

_  ჩვენ, საკრებულოს წევრებს,  მაინც გვითხარით, რა ღირს ბაზა? ძალიან მაინტერესებს, რატომ არ არის ამ ჩამონათვალში ბაზის ფასი დაფიქსირებული?!

შოთა ჩაგუნავამ  დეპუტატის კითხვაზე კომენტარი გააკეთა: როგორ გითხრათ ფასი, ამისთვის აუდიტის მოწვევაა საჭირო?! ამ მიწის ნორმატიული ფასი 1 კვმ-ზე 9 ლარია, მაგრამ ეს საბაზრო ფასთან დიდად განსხვავებულია და ამიტომაც არ მივანიშნეთ ღირებულება.

"გურიასთვის" გადასაცემი ქონება, რაც საჭიროა მისი ფუნქციონირებისათვის, ასე გამოიყურება: 1. ადმინისტრაციული შენობა 531 კვ.მ. 319 068 ლარადაა შეფასებული; 2. სატრანსფერო შენობა 44,82 კვ.მ. _ 13 446 ლარი; 3. სათადარიგო მოედნის გასახდელი 164,71 კვ.მ. _ 411 777 ლარი; 4. საპირფარეშოს შენობა 172,87 კვ.მ. _ 8 643 ლარი; 5. მოედნის განათების ანძები, 4 ცალი _ 122 000 ლარი; 6. ტერიტორიის გარეთა შემოღობვა რკინის ჭიშკრებით, 868,3 გრძ.მ. _ 173 662 ლარი; 7. ფეხბურთის მოედნის შემოღობვა, 406 გრძ.მ. _ 60 900 ლარი; 8. ელექტროტაბლო _ 10 500 ლარი; 9. ძირითადი მოედანი, მეტალოპლასტმასის კარით, 8740 კვ.მ. _ 742 900 ლარი; 10. ძირითადი მოედნის აღმ. ტრიბუნა, 110 გრძ.მ. _ 550 000 ლარი; 11. სათადარიგო მოედანი ტრიბუნით, 7738 კვ.მ. _ 154 760 ლარი;  12. წყლის საწნევი კოშკი, 1 ცალი _ 2500 ლარი; 13. წყლის რეზერვუარები წყლის მომარაგების სისტემით, 4 ცალი _ 60 000 ლარი; 14. არასასოფლო-სამეურნეო დანიშნულების მიწა, 51 795 კვ.მ. _ 472 370 ლარი; 15. ავტომანქანა მიცუბიში-მონტერო _ 7600 ლარი;