უკვე მეორედ, საქართველოში, ნაციონალური სამზარეულოს ფესტივალი ჩატარდა, რომელიც ამჟამად ქართულ-ოსური საზღვრის გამყოფ ზოლთან (საჩხერისა და ჯავის რაიონებს შორის, ადმინისტრაციულ საზღვართან) მდებარე სოფელ პერევში ჩატარდა.
"ფესტივალის მიზანია, ნაციონალური სამზარეულოს პოპულარიზაციით, ხელი შეუწყოს კულტურათა დიალოგს, საზოგადოებას აჩვენოს ხალხთა ტრადიციული კერძებისა და რაციონალური კვების მნიშვნელობა, ადამიანის ჯანმრთელობის შენარჩუნების და სიცოცხლის გახანგრძლივებისთვის, რაც ყოველთვის იყო, არის და იქნება ხალხთა შორის მუდმივი დიალოგის საგანი", _ გვითხრა ფესტივალის ერთ-ერთმა ორგანიზატორმა.
გურიიდან ფესტივალზე ოზურგეთის გენდერული საკონსულტაციო საბჭოს, ადგილობრივი ხელისუფლების და მედიის წარმომადგენლები იმყოფებოდნენ.
გურულ სუფრას კი ტრისტან სიხარულიძის, ლევან ნინიძის და ამირან გოლიაძის გურული სიმღერები ამშვენებდა, რომლებმაც საკონცერტო ნაწილშიც მიიღეს მონაწილეობა.
"თქვენს წინაშეა სამი ძმები გურულები", _ ასე გამოაცხადა კონფერანსიემ საგანგებოდ მოწყობილ სცენაზე მათი გამოჩენა.
ღონისძიებას ესწრებოდა საქართველოს პარლამენტის თავმჯდომარის მოადგილე, მანანა კობახიძე, რომელმაც ფესტივალის მონაწილეებს სიტყვით მიმართა:
"მე მივესალმები ჩვენს დებს, ძმებს აფხაზებს, ოსებს. იმ ადამიანებს, რომლებიც აგერ არიან, ჩვენთან ახლოს, საქართველო არის აფხაზეთში და აფხაზეთი არის საქართველოში, საქართველო არის ოსეთში და ოსეთი არის საქართველოში. ჩვენ რაღაც ბარიერი გვყოფს ახლა და ეს ბარიერი არის თავსმოხვეული, იძულებითი და ჩვენ ერთად ამ ბარიერებს აუცილებლად დავარღვევთ და ყველას ერთად ნამდვილად მოუნდება საქართველოში, გამთლიანებულ, ერთიან, სუვერენულ ქვეყანაში ცხოვრება. მე დარწმუნებული ვარ ძალიან მალე იქნება ის დღე, როდესაც ეს ბარიერები ჩვენსა და აფხაზებს, ჩვენსა და ოსებს შორის ნამდვილად დაინგრევა და ჩვენ ისევ გავაგრძელებთ ცხოვრებას, როგორც საუკუნეების განმავლობაში ერთად, მხარდამხარ ვცხოვრობდით და ვაშენებდით ჩვენს ქვეყანას. მე ვფიქრობ, სიმბოლურია დღევანდელი ღონისძიება, ძალიან ბევრი, მნიშვნელოვანი, დიდი საქმე სწორედ სუფრასთან წყდებოდა ხოლმე", _ თქვა მანანა კობახიძემ.
სადაც ფესტივალი ჩატარდა, დაახლოებით 500 მეტრში, ქართულ სოფელ პერევსა და ოსურ სინაგურს შორის მდებარე ნასოფლარ ხახიეთში, 1991 წელს მიწისძვრის შედეგად 42 ადამიანი დაიღუპა, რომლის სახელზე 6 სექტემბერს პანაშვიდი გადაიხადეს.
გიორგი დვალაშვილი, ივანე ჯავახიშვილის სახელობის თბილისის სახელმწიფო უნივერსიტეტის პროფესორი "გურია ნიუსთან" ამბობს:
"1991 წლის 29 აპრილს, 13 საათზე და 13 წუთზე პერევიდან 2 კილომეტრში, სოფელ ხახიეთის ტერიტორიაზე მოხდა დამანგრეველი მიწისძვრა. მიწისძვრის სიმძლავრე იყო ცხრანახევარი ბალი. სამწუხაროდ მოწყდა კლდე ცხეკვარის მთის ფერდობზე, გამოიწვია კლდეზვავი, რომლის სიმაღლე 200 მეტრი იყო და ფერდობმა დაფარა სოფელი ხახიეთი, სადაც 42 ადამიანი იმ მომენტში სოფელში საქმიანობდა გაზაფხულის პერიოდი იყო და ყველანი დაიმარხა ამ მიწის ქვეშ. ამ სოფელში XV-XVII საუკუნეში სავარაუდოდ მოხდა მიწისძვრა, როგორ ჩანს მოგვიანებით აქ დასახლდა ისევ მოსახლეობა და დაერქვა ხახიეთი, სამწუხაროდ, ეს ტრაგედია ისევ მოხდა. ძალიან ცუდია, რომ იქ მისვლას დღეს ჩვენ ვერ ვახერხებთ. სოფელ ხახიეთში ჩამოდის ხახიეთის წყალი, სადაც გატარდა საოკუპაციო ხაზი. ასევე ვეღარ ხდება ხახიეთის ტბის შესწავლა, რომელიც მეტად საინტერესოა", _ გვითხრა გიორგი დვალაშვილმა.
ფესტივალის დასასრულს ფესტივალის მონაწილეებს ფასიანი საჩუქრები გადაეცათ. ფესტივალი "ტურიზმი მშვიდობისა და განვითარებისთვის", EU/UNDP ერთობლივი ინიციატივა COBERM 2-ის მხარდაჭერით ჩატარდა.
