გურჯაანის რაიონის სოფელ ველისციხეში შპს "კახურმა ტრადიციულმა მეღვინეობამ" ახალი საწარმო გახსნა, რომელსაც საქართველოს პრემიერ-მინისტრი ირაკლი ღარიბაშვილი დაესწრო.
"ეს ღვინის ქარხანა კიდევ ერთი ძალიან კარგი პროექტია, რომლის განხორციელებას შეღავათიანი აგროკრედიტის სამთავრობო პროექტმაც შეუწყო ხელი. ჩვენ ყველა ბედნიერები ვართ, ვხსნით ახალ ქარხანას, სადაც ქართველი გლეხის მოყვანილი ყურძენი დამუშავდება. ამ ქარხანაში 100-მდე ადამიანი დასაქმდება. ჩვენი მასპინძელი კომპანია წლის ბოლომდე კიდევ 3 ახალ საწარმოს გახსნის" – განაცხადა პრემიერ–მინისტრმა კახეთში სტუმრობისას.
მისივე თქმით, რთველი 2014 გამორჩეული იქნება ორგანიზებისა და საბაზრო თვითრეგულაციის დამკვიდრების ხარისხით და გვალვიანი ზაფხულის მიუხედავად, წელს, სავარაუდოდ, 100 ათასი ტონა ყურძენი გადამუშავდება. პრემიერის ინფორმაციით, გურჯაანში გაიხსნა და 24-საათიან რეჟიმში მუშაობს რთველის საკოორდინაციო შტაბი.
"აღარ უნდა იდგეს ყურძნისა და მოსავლის გადამუშავების პრობლემა და სულ უფრო უნდა გავზარდოთ ღვინის ექსპორტი. მე გპირდებით, რომ რთველი 2014 გამორჩეული იქნება ორგანიზებისა და საბაზრო თვითრეგულაციის დამკვიდრების ხარისხით. მინდა გითხრათ, რომ სუბსიდია რქაწითელსა და კახურ მწვანეზე განისაზღვრა 35 თეთრით, ხოლო საფერავზე – 15 თეთრით. თანდათანობით მიმდინარეობს სახელმწიფო სუბსიდიის მაღალი საბაზრო ფასით ჩანაცვლების პროცესი",– განაცხადა პრემიერ–მინისტრმა.
"გურია ნიუსთან" ქარხნის მნიშვნელობაზე ისაუბრა KTW ჯგუფის ("კახური ტრადიციული მეღვინეობა") დამფუძნებელმა ზურაბ ჩხაიძე-ასკანელმა:
" ქარხანა არის ევროპული სტანდარტების მიხედვით, უახლესი ტექნიკით აღჭურვილი და გათვლილია 5 000 ტონა ყურძნის გადამუშავებაზე. ამ პროექტისთვის 8 მილიონი ლარის ინვესტიცია გამოიყო და მშენებლობის პროცესში მთლიანად ადგილობრივი მუშახელი იყო დასაქმებული. ეს ტრადიცია კვლავ გაგრძელდება. მომავალი წლისთვის, კიდევ ერთი ღვინის საცავის მშენებლობას ვგეგმავთ, სადაც ასევე ადგილობრივები დასაქმდებიან.
აქვე მინდა აღვნიშნო, რომ ამ ქარხნის მშენებლობაზე, მთავრობის ინიცირებით, მესამე კომპონენტად ჩვენ მივიღეთ 600 000 დოლარის საპროცენტო განაკვეთის სუბსიდია. ამისთვის მადლობა მინდა გადავუხადო საქართველოს მთავრობას და პირადად პრემიერ-მინისტრს, რომლის მხარდაჭერითაც განხორციელდა მეღვინეობის დარგის მხარდამჭერი ეს უმნიშვნელოვანესი პროექტი" _ განაცხადა ზურაბ ჩხაიძემ ჩვენთან საუბრისას.
მისივე თქმით, გარდა ამისა, აშენდება ტურისტული კომპლექსი, რომელიც გათვლილი იქნება კლასიკური მეთოდით ღვინის დამზადებაზე, მუხის კასრებში, რაც მნიშვნელოვნად შეუწყობს ხელს ღვინის ტურის და ზოგადად მეღვინეობის განვითრებას.
"ჩამოსული სტუმრებისთვის აშენდება სასტუმრო და სადეგუსტაციო სალონი. ტურისტული კომპლექსის სახელის ნათლობა გუშინვე შედგა და მას "Royal მუკუზანი ერქმევა" _ განაცხადა ზურაბ ჩხაიძემ.
ქარხნის გახსნისას, პრემიერ მინისტრმა ასევე ისაუბრა საირიგაციო პროექტებზე და აღნიშნა, რომ მომავალი წლის მარტიდან სეტყვის საწინააღმდეგო სისტემა საცდელ რეჟიმში უკვე მზად იქნება.
"მთავრობა ორივე მიმართულებით მუშაობს. მუშავდება საირიგაციო პროექტები, მომავალი წლის მარტიდან კი სეტყვის საწინააღმდეგო სისტემა საცდელ რეჟიმში უკვე მზად უნდა იყოს. პროექტის მიხედვით, სისტემა ძალიან ეფექტიანი ჩანს და ჩვენ დიდ იმედებს ვამყარებთ მასზე. ჩვენ დავიწყეთ აგროდაზღვევის საპილოტე პროგრამაც იმისათვის, რომ გლეხს, ფერმერს, მეწარმეებს მაქსიმალურად გვერდში დავუდგეთ"-განაცხადა მთავრობის მეთაურმა.
პრემიერმა წარმატებები უსურვა შპს "კახური ტრადიციული მეღვინეობის" ხელმძღვანელს ზურაბ ჩხაიძეს და მასპინძელთან ერთად ახალი ღვინის ქარხანა დაათვალიერა.
(R)
