საყდრისის მცველებს შორის დაპირისპირება გრძელდება. ნინო მიქიაშვილის გუშინდელ განცხადებას საყდრისის გადარჩენის კომიტეტის ერთ-ერთი წევრი ირაკლი მამალაძე "გურია ნიუსთან" პასუხობს.
მამალაძის თქმით, რომ კარვების აქცია შეწყვეტილია და ეს არ არის დეზინფორმაცია.
_ აქციის შეწყვეტის ერთადერთი მიზეზი არის ის, რომ ბოლო ორი კვირის მანძილზე "საქართველოს პატრიოტთა ალიანსმა" დაიკავა ჩვენი კარვები, ჩვენი ინფრასტრუქტურა. კარვები ეკუთვნის "დავითიანს". იცით ალბათ, რომ "დავითიანი" არის კომიტეტის წევრი და ხელმომწერი, იგი შემოდის საყდრისის გადარჩენის კომიტეტში.
9 სექტემბერს გავაკეთეთ ბრიფინგი. სადაც გავაჟღერეთ იუნესკოს დასკვნა და ვთქვით, საყდრისის გადარჩენის საზოგადოებრივი კომიტეტი წყვეტს კარვების აქციას. მინდა გითხრათ, რომ იქვეა ჩიორა თაქთაქიშვილის ბიძა, რომელიც საყდრის თავისებურად იცავს და აპროტესტებს. მათ შეუძლია იყვნენ იმ ტერიტორიაზე სანამდეც მოესურვებათ და გააპროტესტონ საყდრისის თემა, მაგრამ, ჩვენ იქ კარვების აქცია შევწყვიტეთ, _ ამბობს მამალაძე.
_ ნინო მიქიაშვილმა განაცხადა, რომ კარვები მათ მეუფე ნიკოლოზმა შეწირა…
_ მეუფემ კარვები "დავითიანს" შემოწირა და არა ნინო მიქიაშვილსა და ირაკლი ლომიძეს ან რომელიმე კონკრეტულ პირს. კიდევ ერთხელ ვიმეორებ, თუ "პატრიოტთა ალიანსს" სურდა საყდრისის თემაზე რაღაცის გაპროტესტება, შეეძლოთ სხვაგან გაეშალათ კარვები. არ უნდა დაეკავებინათ ჩვენი ტერიტორია, რომელიც 19 აპრილს ძალიან დიდი ბრძოლისა შედეგად მოვიპოვეთ. დღეს, ეს ტერიტორია "პატრიოტთა ალიანსმა" დაიკავა. მე ვფიქრობ, პატრიოტთა ალიანსის მიერ გადგმული ნაბიჯი უზნეობაა. ჩვენ ყველანაირ პოლიტიკურ დაჯგუფებას ვემიჯნებით, რადგან საყდრისის გადარჩენის საზოგადოებრივი კომიტეტი არ არის პოლიტიკური ორგანიზაცია. ეს არის საზოგადოებრივ საწყისებზე შექმნილი კომიტეტი, რომელიც ბოლომდე ემსახურება საზოგადოებას. ძალიან სამწუხარო ფაქტი იყო ის, რომ ქალბატონი ნინო მიქიაშვილი საყდრისიდან ავრცელებდა ინფორმაციებს და იქვე მიუთითებდა, აქ არის "პატრიოტთა ალიანსიო", რაც ჩვენთვის მიუღებელი იყო.
ჩვენ, ვფიქრობთ, რომ ნინო მიქიაშვილი გარკვეულწილად მიეკედლა პოლიტიკურ პარტიას და ჩვენ ვემიჯნებით ამ სიტუაციას. ჩვენ ამ საქმეში პოლიტიკისგან შორს ვართ. გუშინ, მან კიდევ ერთხელ დაადასტურა და განაცხადა, რომ "პატრიოტთა ალიანსი" იცავს საყდრისს. ეს ჩვენთვის მიუღებელია. მათ შეეძლოთ სხვა ტერიტორიაზე განეთავსებინათ კარვები და არ უნდა დაეკავებინათ კომიტეტის აღებული ტერიტორია და კარვები.
_ გუშინ ნინო მიქიაშვილმა განაცხადა, რომ კომიტეტს აქვს გახსნილი ანგარიში, სადაც გარკვეული თანხები ირიცხება. რომლითაც მას არ უსარგებლია.
_ მუდმივად ვიყავით კავშირზე ირაკლი ლომიძესა და ნინო მიქიაშვილთან. კომიტეტის წევრები ხშირად ჩადიოდნენ საყდრისში, როცა მათ თბილისში წამოსვლა სჭირდებოდათ, კომიტეტის წევრები რჩებოდნენ ადგილზე. ვეხმარებოდით მათ საკვებით, დენის თანხით რისი საშუალებაც გვქონდა. თუმცა, ვიცი რომ ნინო მიქიაშვილის პირად ანგარიშზე ერიცხება საყდრისის გადარჩენასთან დაკავშირებით გარკვეული შემოწირულობის თანხები, რომელსაც ის თავისი შეხედულებისამებრ კომიტეტთან შეუთანხმებლად განკარგავს. როგორც ვიცი, თანხები უცხოეთიდანაც ირიცხება. ნინოს ნათქვამი აქვს, რომ გარკვეულ თანხებს "პატრიოტთა ალიანსიდანაც" რიცხავენ. ვიცი რომ ამ თანხიდან ადა მარშანიამ ტენტი იყიდა და ა.შ. ჩვენ ნამდვილად ვერ ჩავალთ მიქიაშვილის ანგარიშზე ჩარიცხული თანხის სიღრმეებში, მაგრამ დანამდვილებით შემიძლია ვთქვა, ჩვენს ანგარიშზე არსებული თანხიდან რითიც შეგვეძლო ვეხმარებოდით. დღეს უკვე არც ფინანსური რესურსი გვაქვს, რომ დავეხმაროთ.
_ კარვების აქციის შეწყვეტის შემდეგ რას აპირებს საყდრისის გადარჩენის საზოგადოებრივი კომიტეტი?
_ თბილისში გაცილებით დიდი ბრძოლა მოსაგები. ჩვენი მთავარი მონაპოვარი არის სასამართლო გადაწყვეტილება, რომელიც გასაჩივრებული და დასაცავია მეორე ინსტანციაში. ჩვენი მთავარი მიზანია კულტურის მინისტრის გადაწყვეტილებას ხელი შეუშალოთ, რომელმაც გაასაჩივრა პირველი ინსტანციის გადაწყვეტილება.
შეგახსენებთ, რომ მედიაკავშირ "ობიექტივისა" და გაზეთ "საქართველოს რესპუბლიკას" კორესპონდენტმა, ნინო მიქიაშვილმა, რომელიც საყდრისის ერთ-ერთი მცველია, ჟურნალისტებთან განაცხადა, რომ საყდრისის გადარჩენის საზოგადოებრივი კომიტეტის წევრებმა საზოგადოება შეცდომაში შეიყვანეს. მიქიაშვილის თქმით, კომიტეტის წევრების განცხადება მასთან არ ყოფილა შეთანხმებული. ასევე, მისი თქმით, საყდრისის მცველებს შეუერთდა პოლიტიკური პარტია "საქართველოს პატრიოტთა ალიანსის" წევრები. მიქიაშვილის მტკიცებით, საყდრისის გადარჩენის საზოგადოებრივი კომიტეტის წევრების განცხადება, საყდრისის გვერდითა ბორცვზე მიმდინარე კარვების აქცია იშლება დეზინფორმაციაა.
მიქიაშვილის მიერ გაკეთებული განცხადების სრული ვერსია შეგიძლია იხილოთ ამ ლინკზე
