“უმაღლესი განათლების” და “ზოგადი განათლების” შესახებ კანონებში ცვლილებები შედის

პირი, რომელსაც 2007 წლამდე აქვს მინიჭებული დოცენტის ან პროფესორის სამეცნიერო-პედაგოგიური წოდება შესაბამის სახელოვნებო-შემოქმედებით ან არქიტექტურის სფეროში, დოქტორის აკადემიური ხარისხის მქონე პირს უფლებრივი მდგომარეობით გაუთანაბრდება.

ეს ცვლილება  „უმაღლესი განათლების შესახებ“ საქართველოს კანონში შედის, რომელზეც საქართველოს პარლამენტის განათლების, მეცნიერებისა და კულტურის კომიტეტის სხდომაზე იმსჯელეს. კანონპროექტით ტერმინოლოგიური ხარვეზიც სწორდება, რომლის მიხედვითაც „საშემსრულებლო-შემოქმედებითი“ იცვლება სიტყვებით „სახელოვნებო-შემოქმედებითი“.

განათლების, მეცნიერებისა და კულტურის კომიტეტის თავმჯდომარის, ივანე კიღურაძის განცხადებით, კანონპროექტი არქიტექტურის სფეროს წარმომადგენელთა ინტერესებსაც ითვალისწინებს, რომლებსაც, აღნიშნული ცვლილების საფუძველზე, საშუალება ექნებათ, სრულფასოვნად ჩაერთონ საგანმანათლებლო და სამეცნიერო-კვლევით საქმიანობაში, დაიკავონ აკადემიური თანამდებობები, გახდნენ სადისერტაციო საბჭოს წევრები და ა.შ. კომიტეტის წევრებმა მხარი ერთხმად დაუჭირეს წარმოდგენილ ცვლილებას.

 კომიტეტის სხდომაზე, პირველი მოსმენით განიხილეს საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტის „უმაღლესი განათლების შესახებ“ საქართველოს კანონში ცვლილების შეტანის თაობაზე. საქართველოს განათლებისა და მეცნიერების მინისტრის მოადგილის, ქეთევან ნატრიაშვილის ინფორმაციით, კანონპროექტის მიღების მიზეზია კოეფიციენტებით რანჟირების დოკუმენტის, აბსოლუტური ქულით რანჟირების დოკუმენტის, სამაგისტრო გამოცდების კოეფიციენტებით რანჟირების დოკუმენტის და საერთო სამაგისტრო გამოცდების აბსოლუტური რანჟირების დოკუმენტის დამტკიცებისთვის მოქმედი კანონმდებლობით გათვალისწინებული რეგულაციების უზრუნველყოფის აუცილებლობა. მისივე განცხადებით, მოქმედი კანონმდებლობა არ აწესრიგებს გაცვლითი საგანმანათლებლო პროგრამის საკითხებს და კანონპროექტის შემუშავება ამ გარემოებამაც გამოიწვია. კანონპროექტი ასევე, ითვალისწინებს, სსიპ სახელოვნებო-შემოქმედებითი უმაღლესი საგანმანათლებლო დაწესებულების მართვის ეფექტურობის უზრუნველყოფის მიზნით იყოლიოს მინიმუმ ერთი კოლეგიური ორგანო. ცვლილების მიხედვით, საქართველოს განათლებისა და მეცნიერების სამინისტროს წარდგინებით, საქართველოს მთავრობას მიენიჭება უფლებამოსილება, განსაზღვროს საქართველოს იმ მოქალაქის, ასევე პირადობის ნეიტრალური მოწმობის ან/და ნეიტრალური სამგზავრო დოკუმენტის მქონე იმ პირის სახელმწიფო სასწავლო გრანტით დაფინანსების წლიური მოცულობა, ოდენობა და პირობები ოკუპირებულ ტერიტორიაზე მიღებული განათლების აღიარების შემდეგ სწავლას განაგრძობს საქართველოს უმაღლეს საგანმანათლებლო დაწესებულებაში აკრედიტებულ უმაღლეს საგანმანათლებლო პროგრამაზე ერთიანი ეროვნული გამოცდების გავლის გარეშე, ასევე, დაამტკიცოს სტუდენტის პირადობის (ბინადრობის) მოწმობით სტუდენტური ფასდაკლების გამოყენების წესი.

გარდა ზემოაღნიშნულისა, კანონპროექტი საქართველოს განათლებისა და მეცნიერების სამინისტროსთვის საერთაშორისო სასწავლო ოლიმპიადაში მონაწილე საქართველოს ნაკრების გუნდის წევრის მიერ საქართველოს უმაღლეს საგანმანათლებლო დაწესებულებაში პირობითი ჩარიცხვისა და დაფინანსების წესის დამტკიცების უფლებამოსილების მინიჭებასაც ითვალისწინებს. ქეთევან ნატრიაშვილს განცხადებით, კანონპროექტის შემუშავება, ასევე, განაპირობა საქართველოს უმაღლეს საგანმანათლებლო დაწესებულებებში ბაკალავრიატის, დიპლომირებული მედიკოსის/სტომატოლოგისა და მაგისტრატურის საგანმანათლებლო პროგრამებზე სწავლის გაგრძელებაში იმ პირებისთვის ხელშეწყობის აუცილებლობით, რომლებიც სწავლობდნენ და მიღებული აქვთ კვალიფიკაცია უცხო ქვეყანაში ამ ქვეყნის კანონმდებლობის შესაბამისად აღიარებულ უმაღლეს საგანმანათლებლო დაწესებულებაში. განათლების, მეცნიერებისა და კულტურის კომიტეტის წევრებმა წარმოდგენილ კანონპროექტს მხარი დაუჭირეს.

 კომიტეტის სხდომაზე, ასევე განიხილეს საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი „ზოგადი განათლების შესახებ“ საქართველოს კანონში ცვლილების შეტანის თაობაზე. კანონპროექტის მიზანი მასწავლებელთა სერტიფიცირებიდან კარიერული ზრდის ახალ სქემაზე გადასვლაა. კანონპროექტის თანახმად, ზოგადსაგანმანათლებლო დაწესებულების მასწავლებლები შემდეგ პროფესიულ კატეგორიებად დაიყოფიან: ა) მენტორი მასწავლებელი (უმაღლესი კატეგორია); ბ) მკვლევარი მასწავლებელი (პირველი კატეგორია); გ) წარჩინებული მასწავლებელი (მეორე კატეგორია); დ) პრაქტიკოსი მასწავლებელი (მესამე კატეგორია).