ჩოხატაურის მუნიციპალიტეტში, სტიქიის შედეგად მიყენებული ზარალის ზუსტი ოდენობა ჯერ კიდევ უცნობია. ჩოხატაურის მუნიციპალიტეტის გამგებლის ირაკლი კუჭავას ინფორმაციით, რამდენიმე სოფელში წაღებულია საყანე ფართობები, დაზიანებულია ჯებირები:
_ დღესაც მივიღეთ ინფორმაცია (საუბარი ჩაწერილია 26 სექტემბერს), რომ ბევრ სოფელში დაზიანებულია საყანე ფართობები, რამდენიმე ადგილზე მეწყერი ჩამოწვა. სოფელ ხიდისთავში, იქ, სადაც ცოტა ხნის წინ ჯებირი გაკეთდა, ადიდებულმა მდინარემ დამატებითი პრობლემები შექმნა _ ჯებირის გვერდით მიწა გამოთხარა, _ აღნიშნა კუჭავამ.
მისივე ინფორმაციით, სოფელ ჩხაკაურაში, სადაც 27 ივლისს, 15 ოჯახი გარესამყაროს მოწყდა, სტიქია ისევ განმეორდა:
_ ჩხაკაურაში, დაზიანებული ადგილის შესაკეთებლად თანხები გამოძებნილი იყო, ტენდერიც გვქონდა გამოცხადებული, თუმცა, 24 სექტემბრის სტიქიამ ის ტერიტორია ისევ დააზიანა და შესაბამისად, დამატებითი სახსრების მოძიებაა საჭირო, _ დასძინა კუჭავამ, რომლის თქმით, ზარალის ზუსტი ოდენობა ამ კვირაში გახდება ცნობილი.
სტიქიის შედეგად დაზიანებული ადგილები საქართველოს რეგიონული განვითარებისა და ინფრასტრუქტურის მინისტრმა დავით შავლიაშვილმა საქართველოს გარემოსა და ბუნებრივი რესურსების მინისტრის მოადგილე ზურაბ კოპაძემაც მოინახულეს.
მთავრობის წევრების განცხადებით ცენტრალური ხელისუფლება სტიქიით დაზარალებულ რეგიონებს დახმარებას გაუწევს.
