საკრებულოს სხდომაზე, სამანდატო, საპროცედურო, იურიდიულ საკითხთა და ეთიკის კომისიის თავმჯდომარემ, რომან ბიწაძემ გაახმოვანა საკითხი – ლანჩხუთის მუნიციპალიტეტის საკრებულოს წევრის უფლებამოსილების განხორციელებასთან დაკავშირებული ხარჯების ანაზღაურების წესის დადგენილებაში ცვლილებების შეტანის შესახებ.
განხორციელებული ცვლილების თანახმად, ის დეპუტატები, რომლებიც საკრებულოში სხვადასხვა თანამდებობებს იკავებენ, თანამდებობრივ სარგოზე სადეპუტატო დანამატის ვეღარ მიიღებენ, რომელიც 500 ლარითაა განსაზღვრული. ამასთან, წესში კიდევ ერთი ცვლილება შევიდა – რიგით დეპუტატს, რომელიც არასაპატიო მიზეზით გააცდენს თუნდაც ერთ სხდომას, დაექვითება 100 ლარი, მაშინ, როცა თანამდებობის პირ დეპუტატებზე, ეს ცვლილება არ მოქმედებს.
აღნიშნულ სიახლეს არაერთგვაროვანი რეაქცია მოჰყვა დეპუტატთა მხრიდან. ოპოზიციურმა ფრთამ რამდენიმე შენიშვნა დააფიქსირა.
კერძოდ, გია გოგუაძემ აღნიშნა, რომ შემოტანილი საკითხის თავდაპირველ ვარიანტში, დეპუტატთათვის თანხის დაქვითვაზე, არ იყო საუბარი.
ორი ფრაქციის – "პატრიოტთა ალიანსისა" და "მაჟორიტართა" თავმჯდომარეებმა, ემზარ თედორაძემ და ჯუმბერ ბლაგიძემ ისიც აღნიშნეს, – თუ ასე უჭირს ბიუჯეტს, არც ის 500 ლარი გვინდა, ხელფასიც ქვედა ზღვრამდე დავიყვანოთ და გაჭირვებულებს დავეხმაროთო.
ამ განცხადებას უმრავლესობის ლიდერმა კახა ურუშაძემ პოპულისტობა უწოდა.
