შშმ ბავშვებისთვის განკუთვნილ დღის ცენტრში – "ბავშვი, ოჯახი, საზოგადოება", რომელიც ბავშვთა ფედერაციის შენობაშია განთავსებული, პატარების ჯგუფი დაიხურა. ოფიციალურად, დადგენილ სტანდარტებთან შეუსაბამობისთვის.
ამაზე "გურია ნიუსი" გუშინ წერდა. ჩვენ ვცდილობდით გაგვერკვია კონკრეტულად რა სტანდარტებს ვერ აკმაყოფილებდა ცენტრი და ჯგუფის დახურვის შემდეგ, რა პრობლემების წინაშე დადგნენ შშმ პირები და მათი მშობლები.
გუშინ, "გურია ნიუსთან" სატელეფონო საუბრისას, ჯანდაცვის სამინისტროს სოციალური დაცვის დეპარტამენტის უფროსმა, გია კაკაჩიამ აღნიშნა, რომ ცენტრს ოფიციალურად ფართი არ ჰქონდა და სწორედ ამიტომ გაუუქმდათ რეგისტრაცია.
"დაწესებულებას უნდა გააჩნდეს რაღაც ფართი, სადაც ის ფუნქციონირებს. ამ ცენტრში, სტანდარტთან შესაბამისობაში არ იყო ფართი, აქედან გამომდინარე მათ რეგისტრაცია გაუუქმდათ.
ფართი, სადაც ეს ცენტრია განთავსებული, იყო სახელმწიფო დაწესებულების, სპორტისა და ახალგაზრდულ საქმეთა სამინისტროსი, მათ არ ჰქონდათ ეს ფართი ოფიციალურად გადაცემული და გამოდიოდა, რომ ჩვენ ვაფინანსებდით ჰაერში. ჰაერში კი ჯანდაცვის სამინისტრო ვერაფერს ვერ დააფინანსებს.
თუ მათ ექნებათ ფართი, აღუდგებათ შესაბამისი სერვისის მიწოდების პირობებიც.
ის დრო აღარაა საქართველოში, რომ ნებისმიერი სერვისი დავაფინანსოთ. მინიმალური სტანდარტები უნდა არსებობდეს", _ უთხრა "გურია ნიუსს" კაკაჩიამ.
თუმცა, ჩვენს ხელთ არსებული დოკუმენტებიდან ირკვევა, რომ 2014 წლის 1 აგვისტოს, საქართველოს მთავრობის განკარგულებით #1349, ცენტრს – "ბავშვი, ოჯახი, საზოგადოება" პრემიერი-მინისტრმა 5 წლით, 364,12კვ.მ ფართი, სარგებლობაში გადასცა.
უფრო კონკრეტულად კი მთავრობის განკარგულებაში ვკითხულობთ, რომ მათ თანხმობა განუცხადეს ბავშვთა ახალგაზრდობის ეროვნულ ცენტრს (სადაც შშმ პირებისთვის განკუთვნილი დღის ცენტრი ფუნქციონირებდა), რომ მის სარგებლობაში არსებული ფართი, აუქციონის გარეშე 5 წლით, უსასყიდლოდ გადაეცა ა(ა)იპ-"ბავშვი, ოჯახი, საზოგადოებისთვის", რათა მათ საშუალება მისცემოდათ, შშმ პირებისთვის საგანმანათლებლო და სოციალური ინტეგრაციის ხელშემწყობი პროგრამები განეხორციელებინათ.
"გურია ნიუსმა" მოიპოვა ის ხელშეკრულებაც, რაც საქართველოს მთავრობის ზემოთ ხსენებული განკარგულების შემდეგ, სსიპ "ბავშვთა და ახალგაზრდობის ეროვნულ ცენტრსა" და ა(ა)იპ "ბავშვი, ოჯახი, საზოგადოებას" შორის დაიდო და რომლის თანახმადაც, შშმ პირებისთვის განკუთვნილმა ცენტრმა, 364.12კვ.მ 5 წლით სარგებლობაში მიიღო.
აღნიშნული განკარგულებითა და შემდგომ დადებული ხელშეკრულებით, ირკვევა, რომ ჯანდაცვის სამინისტროს სოციალური დაცვის დეპარტამენტის უფროსის მიერ ცენტრის პატარების ჯგუფის დახურვის მიზეზად მოყვანილ სტანდარტს – ფართის არ არსებობას, "ბავშვი, ოჯახი, საზოგადოება" აკმაყოფილებდა.
აღსანიშნავია კიდევ ერთი ფაქტი – როგორც ზემოთ ავღნიშნეთ, სოციალური დაცვის დეპარტამენტის უფროსმა გია კაკაჩიამ, ხსენებულ მიზეზზე "გურია ნიუსთან" გუშინ, სატელეფონო კომენტარში ისაუბრა. თუმცა, ჩვენს ხელთ არსებული დოკუმენტაციიდან ირკვევა, რომ იმ ოფიციალურ წერილში, რომელიც კაკაჩიამ ცენტრის თავმჯდომარე მაია ბიბილეიშვილს მისწერა და განუმარტა ჯგუფის დახურვის მიზეზები, არაფერია ნახსენები ფართთან დაკავშირებით.
წერილში, სადაც ოფიციალურადაა განმარტებული თუ რატომ მიიღო ჯანდაცვის სამინისტროს სოციალური დაცვის დეპარტამენტმა ხსენებული გადაწყვეტილება, ვკითხულობთ:
"გაცნობებთ, რომ "შეზღუდული შესაძლებლობების პირთა დღის ცენტრის მომსახურების სტანდარტების" მე-11 მუხლის 2 პუნქტის "ი" ქვეპუნქტის თანახმად, ყოველ 15 ბენეფიციარზე არის ერთი ხელის საბანი ნიჟარა (ცივი/ცხელი წყლით) და ტუალეტი, რომელშიც არის ვენტილაცია.
აღნიშნულიდან გამომდინარე, მომსახურებაში ფუნქციონირებს 2 სველი წერტილი, რომელიც გათვალისწინებულია 30 ბენეფიციარისთვის, არსებული წერტილები არ არის ადაპტირებული და საჭიროებს სარემონტო სამუშაოებს.
აქვე უნდა აღინიშნოს, რომ დღის ცენტრის სარგებლობაში არსებული დარბაზი, რომელიც გათვალისწინებულია ისეთი პროგრამული აქტივობებისთვის, რომელიც ითვალისწინებს 18 წლამდე ასაკის შშმ ბავშვთა და 18 წელს ზემოთ შშმ პირების ერთობლივი ღონისძიებების ჩატარებას, საჭიროებს სარემონტო სამუშაოებს."
ეს არის ამონარიდი იმ ოფიციალური წერილიდან, სადაც სოციალური დაცვის დეპარტამენტი, ცენტრში, პატარების ჯგუფის დახურვის ოფიციალურ მიზეზებზე საუბრობს. როგორც ჩანს, აქ არსადაა საუბარი ფართის არ არსებობაზე და ყურადღება გამახვილებულია სველი წერტილების რაოდენობაზე და დარბაზის კეთილმოწყობაზე.
აღნიშნული პრობლემების თაობაზე, როგორც ჩვენთან ცენტრის აღსაზრდელების მშობლები საუბრობენ, მათთვის ცნობილი იყო.
"ეს, რეალურად, პრობლემა არც ყოფილა არცერთი ჩვენგანისთვის. ბავშვისთვის, რომელიც ეტლში ზის, რომლისთვისაც გადაადგილება ამ ქალაქში თითქმის შეუძლებელია, ასევე, სახლიდან გასვლა, წარმოუდგენელია მსგავსი რამ პრობლემად აღიქვა. ამის გამო ჩემს და ვიცი, არც სხვის შვილებსაც, პრობლემა არ შექმნიათ.
ჩემი შვილი ახლაა უდიდესი პრობლემის წინაშე, როცა ნერვიულობისგან და სახლში ყოფნით გაღიზიანებული საკუთარ თავს ცდილობს ავნოს", _ ამბობს "გურია ნიუსთან" ერთ-ერთი აღსაზრდელის მშობელი, მზია ქაჯაია.
ცნობისთვის, ცენტის – "ბავშვი, ოჯახი, საზოგადოება" თავმჯდომარე, ჩვენთან საუბრისას აღნიშნავს, რომ საპირფარეშოების გაკეთება მათ უკვე დაასრულეს.
თანდართული დოკუმენტები: საქართველოს მთავრობის განკარგულება
თხოვების ხელშეკრულება
სოციალური დაცვის დეპარტამენტის უფროსის წერილი
