დღეს, გამოცემამ _ "Marca” ესპანეთის ეროვნული ნაკრებისა და მადრიდის "რეალის“ კარის დარაჯის იკერ კასილიასის ინტერვიუ გამოაქვეყნა. გაზეთის კორესპონდენტს კასილიასი გულახდილად ესაუბრა და "სამეფო კლუბში“ 2012 წელს განვითარებული მოვლენები დეტალურად გაიხსენა.
საიდუმლოს არ წარმოადგენს, რომ მეკარესა და "რეალის“ იმდროინდელ მთავარ მწვრთნელ ჟოზე მოურინიოს შორის ცუდი ურთიერთობა სუფევდა. პორტუგალიელმა ფეხბურთის სპეციალისტმა კასილიასი სათადარიგოთა სკამზე გაამწესა და მისი ადგილი დიეგო ლოპესს დაუთმო.
"მე და ჟოზე ერთმანეთს ჩინებულად ვუგებდით, მაგრამ 2012 წლის დასასრულს პორტუგალიელი უმიზეზოდ გადამეკიდა. ამის შემდეგ ცეცხლზე ნავთი ჩემმა მეგობარმა გოგონამ, ცნობილმა ტელეწამყვანმა სარა კარბონერომ დაასხა. სარამ სპეციალური გადაცემა მოამზადა და ჟოზე მოურინიო სასტიკად გააკრიტიკა. ამის შემდეგ "რეალის“ მთავარ მწვრთნელთან ურთიერთობა საბოლოოდ გამიფუჭდა _ პორტუგალიელმა მოღალატე მიწოდა და იმ დღის შემდეგ აღარ მესალმებოდა.
2013 წლის დასაწყისში მოურინიომ ძირითად შემადგენლობას ჩამომაშორა და ჩემი მისამართით არა ერთი კრიტიკული შენიშვნა გამოთქვა. მე არ ვპასუხობდი. ამით გათამამებულმა ჟოზემ ჩემს მიმართ ზეწოლა კიდევ უფრო გააძლიერა.
მალე ტრავმა მივიღე. გამოჯანმრთელების შემდეგ "რეალის“ ბაზაზე დაბრუნებულს, მოურინიოს ასისტენტი კარანკა მომიახლოვდა და, ძირითად გუნდთან ერთად აღარ ივარჯიშებო, "მახარა“.
მადრიდის "რეალი“ ჩემი სახლია. პრაქტიკულად ამ კლუბში გავიზარდე და მის მიტოვებას საფეხბურთო კარიერის დასრულებამდე არ ვაპირებ. მოურინიოსთან კონფლიქტის შესახებ გუნდის გულშემატკივრებმა დიდი ხნის განმავლობაში არაფერი იცოდნენ. მათ ეგონათ, რომ "ვარსკვლავური ავადმყოფობა“ შემეყარა და მწვრთნელმაც შემადგენლობიდან ამ მიზეზის გამო გამომიყვანა. სამწუხაროდ, ეს სიმართლეს არ შეეფერებოდა _ ჩინებულ სპორტულ ფორმაში ვიმყოფებოდი და "რეალისთვის“ არა ერთი სარგებელის მოტანა შემეძლო. ბედნიერი ვარ, რომ მოგვიანებით კლუბის თაყვანისმცემლებმა ჩემი იგნორირების ნამდვილი მიზეზი გაიგეს,“ _ თქვა იკერ კასილიასმა.
