საქართველოს გარემოსა და ბუნებრივი რესურსების დაცვის მინისტრმა ელგუჯა ხოკრიშვილმა და გაეროს განვითარების პროგრამის ხელმძღვანელის მოადგილემ შომბი შარპმა გლობალური გარემოსდაცვითი ფონდის (GEF) მცირე გრანტების პროგრამის გამარჯვებულები დააჯილდოვეს.
2014 წელს მცირე გრანტების პროგრამაში 19-მა არასამთავრობო ორგანიზაციამ გაიმარჯვა, რომელთაც გარემოსდაცვითი პროექტებისათვის 380 ათასი აშშ დოლარი მიიღეს. მცირე გრანტების პროგრამას საქართველოს გარემოსა და ბუნებრივი რესურსების დაცვის სამინისტრო გაეროს განვითარების პროგრამასთან(UNDP) თანამშრომლობით ახორციელებს. გამარჯვებული პროექტები 98 განაცხადიდან შეირჩა. გრანტების ოდენობა 7000-დან 50.000 აშშ დოლარის ფარგლებში მერყეობს.
მწვანე ინიციატივები საქართველოს სხვადასხვა რეგიონში განხორციელდება და მოიცავს ისეთ საკითხებს, როგორიცაა: ბიომრავალფეროვნების კონსერვაცია, საერთაშორისო წყლები, მდგრადი ორგანული დამაბინძურებლები, კლიმატის ცვლილება. მცირე გრანტების პროგრამის მიზანია ადგილობრივ დონეზე გლობალური გარემოსდაცვითი პრობლემების გადაჭრა, ასევე სიღარიბის დაძლევა და ადგილობრივი მოსახლეობის სოციალურ-ეკონომიკური მდგომარეობის გაუმჯობესება.
საქართველოს გარემოსა და ბუნებრივი რესურსების დაცვის სამინისტრო და გაეროს განვითარების პროგრამა GEF-თან მცირე გრანტების პროგრამის ფარგლებში 2012 წლიდან თანამშრომლობენ. აღნიშნული პროგრამის ფარგლებში 2013 წელს გამოვლინდა 13 გამარჯვებული პროექტი, რომლებიც უკვე ხორციელდება. 2014 წელს კი 19 გამარჯვებული პროექტი გამოვლინდა. გაცემული გრანტების ჯამური ოდენობა 730.000 აშშ დოლარს შეადგენს, ხოლო არასამთავრობო და სათემო ორგანიზაციების მიერ მოზიდული თანადაფინანსება – 926.000 აშშ დოლარს.
წარმატებულ პროექტებს შორისაა კოლხური ხოხბის აღდგენა ვაშლოვანის დაცულ ტერიტორიებში; ქიმიური ნარჩენების მართვის თანამედროვე მეთოდების დანერგვა ხარაგაულში; დეგრადირებული ნიადაგის აღდგენა თუშეთსა და ჭიათურაში; ალაზნისა და ილტოს მიმდებარე სოფლების დაცვა წყალდიდობებისგან.
