სტიქიის შემდგომ ჩასატარებელ სარეაბილიტაციო სამუშაოებს შორის მთავარი პრიორიტეტი მოსავლის აღების წინ, საყანე ფართობებთან მისასვლელი გზების მოწესრიგებაა. 24 და 29 სექტემბერს მომხდარი სტიქიის შედეგად ფართობებში შესასვლელი გზების ნაწილი ჩარეცხილია, ეს კი ხელს უშლის მოსავლის აღებას და ფერმერების უკმაყოფილებას იწვევს. ამასთან, სოფელ ნატანებში, ურეკსა და შრომაში მოსაწესრიგებელია შიდა გზები.
იმისთვის, რომ მოსახლეობას მოახლოებულ ციტრუსის სეზონზე მოსავლის რეალიზებასთან დაკავშირებული პრობლემები არ შეექმნას, მუნიციპალიტეტის გამგებელმა, მერაბ ჭანუყვაძემ შესაბამისი სამსახურის უფროსებთან საგანგებო თათბირი გამართა. გამგეობის სტრუქტურული დანაყოფების ხელმძღვანელებს პრობლემებზე დროული რეაგირება და შესაბამისი ზომების მიღება დაევალათ.
თათბირის შემდეგ, მუნიციპალიტეტის გამგებელი ფართობებთან მისასვლელი გზების მოწესრიგების პროცესს მოადგილეებთან ერთად დაესწრო. სილაურში მოიხრეშა 300 მ. სიგრძის გზა, მერიაში "ქვიშიანას" ტერიტორია, სადაც მერიის და ხვარბეთის მოსახლეობის კუთვნილი საყანე ფართობებია, დაგრეიდერდა ჯუმათის საყანე ფართობებზე გამავალი გზაც. სპეც-ტექნიკა, აღნიშნულ სოფლებში დილიდან მუშაობს და 5 დღის განმავლობაში საჭიროების მიხედვით სხვადასხვა სოფელში გადანაწილდება.
(R)
