ადგილობრივი თვითმმართველობის მოხელეთა კონკურსის ჩატარებამდე სამი თვით ადრე, ლანჩხუთის მუნიციპალიტეტის გამგეობიდან თანამშრომლების ნაწილი გაათავისუფლეს. ოპოზიცია ამას პოლიტიკურად მოტივირებულს უწოდებს, თუმცა, ლანჩხუთის მუნიციპალიტეტის გამგებელი ზაზა ურუშაძე რეორგანიზაციით ხსნით.
გურიის გუბერნატორი გიორგი ჩხაიძე კი მიიჩნევს, რომ უმჯობესია ეს პროცესი შეჩერდეს:
_ გამგებელი მოსახლეობის არჩეულია და ეს ის თემაა, რომელიც 100 პროცენტით მისი გადასაწყვეტია. რაც შეეხება ჩემს მოწონებას, ვფიქრობ, უმჯობესია შეჩერდეს ეს პროცესი და საბოლოოდ ადამიანები კონკურსის წესით დაინიშნონ. ეს არის სახელმწიფოს ხედვა და ამიტომაც გახდა კონკურსები სავალდებულო ყველა მუნიციპალიტეტში. აქედან გამოდინარე, ვფიქრობ, რომ ეს იქნებოდა უფრო სწორი, _ აღნიშნა მხარის პირველმა პირმა G-News TV-ის ყოველკვირეულ გადაცემაში _ "კვირის თემა", სტუმრობისას.
_ ბატონო გიორგი, ფიქრობთ, რომ ლანჩხუთის გამგებელი სახელმწიფოებრივად არ აზროვნებს?
_ არა, განსხვავებული მოსაზრების ქონა არ ნიშნავს არასახელმწიფოებრივად ხედვას. ის არის მენეჯერი, რომელიც მართავს მუნიციპალიტეტს და იმ დროს, იმ მომენტში თვითონ უკეთ იცის გადადგმული ნაბიჯი მისთვის რამდენად მნიშვნელოვანია. სახელმწიფომ აღიარა, რომ კონკურსის შედეგების მიხედვით დაინიშნონ საჯარო მოხელეები. ლანჩხუთის მუნიციპალიტეტმა დროზე ადრე შეცვალა თანამშრომლები და ეს სწორია თუ არა, ხელმძღვანელობამ უკეთ იცის, _ აღნიშნა ჩხაიძემ.
მისივე თქმით, თავად, მოადგილეების დასანიშნად კონკურსს არ ელოდება:
_ ჯერჯერობით, არ მყავს კანდიდატურა. დროის თვალსაზრისით, მოადგილეების დანიშვნის აუცილებლობას ნამდვილად ვერ ვხედავ. მოადგილის არყოლა არც მე და არც გუბერნიას მუშაობაში ხელს არ უშლის, _ გვითხრა გუბერნატორმა.
