(გურია ნიუსი, ჩოხატაური) _ “გურია ნიუსის” 2011 წლის 70-ე ნომერში გამოქვეყნდა სტატია სათაურით _ “ჩვენს ქალაქში ყველაფერი მოსულა”, სადაც ვწერდით, რომ მარტოხელა პენსიონერები, რომელთაც პენსია 2007 წლის იანვრამდე დაენიშნათ, 22-ლარიან დანამატსაც იღებენ, ხოლო 2007 წლის იანვრის შემდეგ პენსიადანიშნულ მარტოხელებს ეს დანამატი არ ეძლევათ. ამ განსხვავების მიზეზის გარკვევას ჩვენ სოციალური მომსახურების სააგენტოს ჩოხატაურის რაიონული განყოფილების უფროსის მოვალეობის შემსრულებელთან, ილო კილასონიასთან შევეცადეთ, მაგრამ მიუხედავად იმისა, რომ ბატონი ილოს პირდაპირი მოვალეობა პენსიონერების ინფორმირებაა, მისგან პასუხი ვერ მივიღეთ, მიზეზად კი “მოუცლელობა” დაასახელა.
წერილი გავუგზავნეთ და ამ საკითხთან დაკავშირებით ინფორმაცია ვთხოვეთ სოციალური მომსახურების სააგენტოს გურიის რეგიონალურ საკოორდინაციო ცენტრს. პასუხიც მივიღეთ, სადაც ვკითხულობთ: “თქვენი, 2011 წლის 20 სექტემბრის #44 წერილის პასუხად გაცნობებთ, რომ საქართველოს მთავრობის 2006 წლის 27 დეკემბრის #254 დადგენილების თავი მე-2, მე-8 პრიმა მუხლის თანახმად, საოჯახო დახმარება მიეცემათ იმ ოჯახებს, რომელთაც დახმარება დანიშნული აქვთ 2007 წლის პირველ იანვრამდე”. წერილს ხელს აწერს ცენტრის მთავარი სპეციალისტი, თამარ სადრაძე.
ჩვენ ვერაფრით გავარკვიეთ, მთავრობამ რა სხვაობა დაინახა 2007 წლის იანვრამდე და იანვრის შემდეგ დახმარებამიცემულ ან მიუცემელ პენსიონერებს შორის, რის საფუძველზეც ზემოთ ხსენებული დადგენილება მიიღეს.
