საკმაო ხანი გავიდა მას შემდეგ, რაც თვითმმართველობის კანონში ცვლილებების შედეგად, აღარ არსებობს სოფლის რწმუნებულების ინსტიტუტი და იგი გამგებლის წარმომადგენლით ჩანაცვლდა.
მიუხედავად ამისა, ლანჩხუთის მუნიციპალიტეტში ჯერ კიდევ ხუთი თემი წარმომადგენლის გარეშეა დარჩენილი და ადგილობრივი მოსახლეობაც გარკვეულ უკმაყოფილებას გამოთქვამს ამ გაჯანჯლებული პროცესის გამო.
ლანჩხუთის მუნიციპალიტეტის გამგეობის ადამიანური რესურსების მართვის სამსახურის უფროსის, ლევან ჩხაიძის ინფორმაციით, ამ ეტაპზე 11 ტერიტორიულ ერთეულს დაენიშნა გამგებლის პირადი წარმომადგენელი. ჩვენი ინფორმაციით, აქედან რვაში ექს-რწმუნებული დაბრუნდა. ზაზა ურუშაძემ არჩევანი ძველ კადრებზე შეაჩერა: სუფსაში _ ბესიკ კუპრაძე დაინიშნა; ღრმაღელეში _ გურამ ჩუბინიძე; ქალაქში _ ვლადიმერ ნანაძე; ნიგოითში _ ზაზა წულაძე; ნიგვზიანში _ ირაკლი გუჯაბიძე; მაჩხვარეთში _ გურამ იმნაიშვილი; მამათში _ გელა პატეიშვილი; გვიმბალაურში _ დურმიშხან ხოფერია.
ახალი სახეებია სამ სოფელში _ ჩიბათში აღნიშნული პოსტი კობა კუნჭულიას ანდეს, ნინოშვილში _ შოთა (ბაჩუკი) ტუღუშს, ხოლო ჯურუყვეთში _ ვასილ ბურძგლას. მათ, შესაბამისად, ალექსანდრე კუკულაძე, გვანცა ჩხარტიშვილი და ბაჩანა კვაჭაძე ჩაანაცვლეს.
რაც შეეხება დარჩენილ ხუთ ტერიტორიულ ერთეულს, ზაზა ურუშაძეს ჯერ ვერ გადაუწყვეტია, ვისზე შეაჩეროს არჩევანი. ფაქტია, რომ ამ ხუთეულიდან ჩოჩხათს ნამდვილად ეყოლება ახალი კადრი, რადგან ძველი რწმუნებული ალეკო სარიშვილი საკრებულოს წევრი გახდა და საფინანსო-საბიუჯეტო კომისიასაც ჩაუდგა სათავეში. ჩვენი ინფორმაციით, გამგებელი, სავარაუდოდ, აქ ფსონს კახა ნემსაძის კანდიდატურაზე დადებს, რომელიც რეორგანიზაციამდე სარიშვილის ერთ-ერთი თანაშემწე იყო.
გაურკვეველი სიტუაციაა აკეთში, აცანასა და ლესაში. აკეთში გულნარა ჩიჩუა იბრძვის პოსტის შესანარჩუნებლად, მაგრამ მიზეზთა გამო, ურუშაძე გადაწყვეტილებას ვერ იღებს. იგივე ითქმის აცანაზეც _ აქ ახალი კანდიდატურა კი გამოიკვეთა დავით ჩხაიძის სახით, თუმცა, ჩვენი ინფორმაციით, როგორც ჩიჩუას, ჩხაიძის კანდიდატურასაც წინააღმდეგობა შეხვდა ადგილობრივი მოსახლეობის გარკვეული ნაწილის მხრიდან და საქმეც დამუხრუჭდა. რაც შეეხება ლესას, აქ დავით ლომაძეს ახალი კონკურენტი გამოუჩნდა სოსო გოგიჩაიშვილის სახით. ჩვენი წყაროს ცნობით, გოგიჩაიშვილის კანდიდატურას ლესის მაჟორიტარი დეპუტატი ელისო ჭიჭინაძე ლობირებს.
ჯერ კიდევ წარმომადგენლის გარეშეა დარჩენილი შუხუთის ტერიტორიული ორგანოც, თუმცა როგორც ამბობენ, ექს-რწმუნებული გიორგი იმნაიშვილი სახეშეცვლილ პოსტს მაინც შეინარჩუნებს. მართალია, ჯერ კიდევ ადგილობრივი არჩევნებისას, გამგებელსა და მას შორის "შავმა კატამ გაირბინა", რის გამოც იმნაიშვილმა საკუთარი განცხადების საფუძველზე დატოვა კიდეც თანამდებობა, მიუხედავად ამისა, მისი პერსონის უკან გურიის მხარის გუბერნატორს გიორგი ჩხაიძეს მოიაზრებენ და ეს მიზეზი სავარაუდოდ, გადამწყვეტი იქნება გადაწყვეტილების მისაღებად.
აღნიშნულ თემებზე სასაუბროდ გამგებელს, ზაზა ურუშაძეს ტელეფონით დავუკავშირდით, რომელიც კარგა ხანია თბილისში იმყოფება. მან მოუცლელობის გამო ჩვენთან საუბარი ვერ მოახერხა.
