გაზეთი გურია ნიუსი" 11.11.2009 წელი; ნაწყვეტი სტატიიდან "რა კმარა დღევანდელ საქართველოში"
რესპონდენტი _ ოზურგეთის მუნიციპალიტეტის გამგებელი ავთანდილ მექვაბიშვილი.
"თქვენ მოგებული არჩევნებით გიცნობენ… როგორც რევოლუციამდე, ისე მას შემდეგ (მექვაბიშვილი ბოლო დროს გამართული, თითქმის ყველა არჩევნების დროს საოლქო საარჩევნო კომისიის თავმჯდომარე იყო).
_ რა შუაშია არჩევნები. კაცი თუ ხარ, არჩევნებზეც მაგარი უნდა იყო, ცხოვრებაშიც და ყველგან _ სადაც ხარ. კაცი ხარ და მაგარი ხარ ყველგან. წაქცეული კი ყველგან წაქცეულია.
_ ერთხელ, ენერგოკომპანიის ჩოხატაურის ფილიალის ხელმძღვანელმა გვითხრა _ მკვდრებს ფულს არ ვახდევინებ, თანხას ვწერ მათ სახელზეო… სამწუხაროდ, ეს ის მიცვალებულებია რომელიც ხელისუფლებას არა და არ ყოფნის საარჩევნო სიებში… ეს არ კმარა?
_ როგორ გეკადრებათ. მიცვალებული მაშინ არის საარჩევნო სიაში, თუ ის ახალი გარდაცვლილია. სიებში ბოლო ჩასწორება არჩევნებამდე ათი დღით ადრე ხდება.
_ ათი წელია მამაჩემი მკვდარია და ყველა არჩევნებზე სიაშია…
_ზღაპარია. ასეთ ადამიანებს ვერ ნახავთ. ეს ოპოზიციის სისულელეა. არჩევნების გაკეთება თუ გინდა, მე მკითხე და გეტყვი _ სხვანაირად კეთდება და არა "მკვდარი სულებით".
_ როგორ კეთდება?
_ მე კი არ ვაკეთებ. ვიცი რომ კეთდება. უამრავი "კარუსელი ვიცი".
_ თქვენ რომ იცით ის მითხარით…
_ მე არჩევნებს ყოველთვის პატიოსნად ვატარებდი, 50 მეთოდი ვიცი არჩევნების მოსაგებად. მე ვერავინ გამიყალბებს არჩევნებს.
_ გამოდის, რომ ოზურგეთში მოგებულია არჩევნები…
_ მაგაზე არ არის. ეს მეთოდები რომ გამოვიყენო კი, მაგრამ სახელი აქვს ”ნაციონალურ მოძრაობას” ისეთი, რომლის თავმჯდომარეც მე გახლავართ რაიონში, იმდენი საქმე აქვს გაკეთებული, რომ ისედაც მოიგებს. რომელი "კარუსელი" სჭირდება ჩვენს ოპოზიციას? უკარუსელოდ დავდებ გულაღმა. ერთ ხმას არ გავაქანებ, არანაირი მკვდარი სული, ისე მოვუგებ არჩევნებს. უბრალოდ, მივალ ხალხთან, დაველაპარაკები და ამ არჩევნებს მოვუგებ დიდი უმრავლესობით.
_ დაპირებები გამოგრჩათ…
_ დაპირებები რატომ? გზა არ გაკეთდა თუ კვალი? კანალიზაცია თუ წყალი? ახლა კიდევ წამოვა ინფრასტრუქტურა. ოპოზიციას დავდებ გულაღმა." _ ეს იყო 5 წლის წინ.
სოფელ ჯუმათის გამგებელი, ოზურგეთის მუნიციპალიტეტის სამხედრო აღრიცხვის, გაწვევისა და მობილიზაციის სამსახურის უფროსი, ოზურგეთის საოლქო საარჩევნო კომისიის თავმჯდომარე, ოზურგეთის გამგებელი, საკრებულოს თავმჯდომარის მოადგილე, "ნაციონალური მოძრაობის" ოზურგეთის ორგანიზაციის ხელმძღვანელი ავთანდილ მექვაბიშვილი დღეს ოზურგეთის მუნიციპალიტეტის ბაღების გაერთიანებას ხელმძღვანელობს.
მის მიერ "გურია ნიუსისთვის" მოცემული ინტერვიუებიდან ირკვევა, რომ ფლობს არჩევნების მოგების 50 მეთოდს, გამოცდილია ოპოზიციის "გულაღმა დადებაში", იცის უამრავი "კარუსელი" და როგორ განავითაროს მუნიციპალიტეტი.
ბიძინა ივანიშვილის პოლიტიკაში მოსვლამდე რამდენიმე დღით ადრე, "გურია ნიუსთან" საუბრისას ღიად საუბრობდა იმ პროექტებზე, რასაც ივანიშვილის დაფინანსებული საქველმოქმედო ორგანიზაცია "ატუ” ოზურგეთში ახორციელებდა.
ივანიშვილის პოლიტიკაში მოსვლის შემდეგ კი კითხვაზე, რა პროექტები აქვს ივანიშვილის კომპანიას გაკეთებული ოზურგეთში, ასე პასუხობდა: ბოდიშს გიხდით, მიღებაზე ვარ და არ მცალია.
დღეს ივანიშვილის მიერ გაკეთებულ პროექტებზე ისევ ღიად საუბრობს და ამბობს, რომ ყოფილ პრემიერ მინისტრს ოზურგეთისთვის ძალიან ბევრი აქვს გაკეთებული:
_ მახსოვს ადრე მკითხეთ და მე გიპასუხეთ. გეწერათ კიდეც რა პროექტები განხორციელა. მაშინაც ბევრი გამომრჩა…
_ თუმცა ეს იყო ივანიშვილის პოლიტიკაში მოსვლამდე… როდესაც იგი პოლიტიკაში გამოჩნდა, ამ თემაზე აღარ საუბრობდით.
_ ერთხელ მკითხეთ და არ მეცალა. დასაწერი რაც იყო, გეწერათ, _ ამბობს მექვაბიშვილი.
მისივე თქმით, ყველა ის ადამიანი, რომელიც პოლიტიკაში გამოცდილია, არჩევნების მოგების მეთოდებს ფლობს და ამაში გასაკვირი არაფერია:
_ ხალხთან საუბარი, შეხვედრა უნდა შეგეძლოს. ესაა და ეს.
კითხვაზე დღეს შეძლებს თუ არა დადოს "გულაღმა ოპოზიცია", ანუ ის ადამიანები, რომლებსაც ჯერ კიდევ 3 წლის წინ გვერდით ედგა, არ პასუხობს და ამბობს, რომ ეს არ არის ჭკვიანური შეკითხვა:
_ მე თქვენგან უფრო სერიოზულ კითხვებს ველოდები. ეს არ არის სერიოზული შეკითხვა.
_ რატომ ბატონო ავთანდილ? 5 წლის წინ ამბობდით, რომ ოპოზიციას გულაღმა დადებდით. ანუ, იმ ადამიანებს, რომლებთან ერთადაც დღეს მუშაობთ. საინტერესოა, დღეს თუ შეგიძლიათ იგივეს გაკეთება. ანუ დადებთ თუ არა "გულაღმა" იმ ადამიანებს, რომლებიც ჯერ კიდევ 3 წლის წინ თქვენი გუნდის წევრები იყვნენ?
_ დღეს მცხეთობაა (საუბარი ჩაწერილია 14 ოქტომბერს). გილოცავთ და ასეთ დღეს მაინც ნუ დასვამთ ასეთ შეკითხვებს… ბოდიში, არ მცალია, დაკავებული ვარ, _ საუბრის გაგრძელება აღარ ისურვა მექვაბიშვილმა.
