აშკარად ფორმაში შედის ლანჩხუთის "გურია". მართალია ფინანსურად მას კვლავ უჭირს, მაგრამ ეს ხელს არ უშლის ზედიზედ მეხუთე წაუგებელი მატჩი ჩაატაროს.
კვირას, საქართველოს ჩემპიონატის მე-9 ტურში, გურულები ქუთაისს სტუმრობდნენ და დაძაბულ დაპირისპირებაში ქულას გამორჩნენ. მართალია, შარშან "გურია" ყველაზე უკომპრომისო გუნდი იყო და ერთი ფრეც არ უთამაშია, მაგრამ წელს "მშვიდობის მაძიებელ" გუნდად გარდაიქმნა და ცხრა მატჩიდან ხუთი ფრეც დაუგროვდა.
მატჩი წუთიერი დუმილით დაიწყო, რომელიც ტრაგიკულად დაღუპულ "გურიას" ფეხბურთელს, ნიკა კილაძეს მიეძღვნა. უშუალოდ შეხვედრა კი "ტორპედოს" უპირატესობით დაიწყო და პირველი ტაიმიც ასე მიილია. იმერლებს გატანის რამდენიმე შანსიც ებოძათ, მაგრამ სტუმართა მეკარე და ხან მცველები ვარგოდნენ.
პირველი გოლი 34-ე წუთზე იშვა, როცა იმერელთა მოიერიშემ ოთარ კვერნაძემ ორ მეტოქე მცველთან ჭიდილში შეძლო ზუსტად დაერტყა.
საგულისხმოა ის ფაქტი, რომ ამ გოლამდე "გურიას" მართებდა გატანა, მაგრამ გაბრიჩიძის უძლიერეს დარტყმას მასპინძელთა მეკარე თებიძემ ეფექტური ნახტომი შეაგება. შსვენებამდე მეტოქეებმა თითო-თითო ხიფათი გაცვალეს, ჯერ ფიფიას მართებდა კიდეც ერთხელ სტუმართა დამწუხრება, მაგრამ მეკარემ აჯობა. მალევე კი "გურიას" ნახევარმცველ კოშკაძეს უმტყუნა მცირედით მიზანმა.
მეორე ტაიმში უფრო დაიძაბა სიტუაცია. თემურ ლორიას შეგირდებმა უმეტესდ შორი მანძილებიდან დარტყმებით სცადეს გათანაბრება, მაგრამ ხან მეკარე და ხან უზუსტობა უშლიდათ ხელს გასატანად.
ამასობაში იმერლებმა 62-ე წუთზე მეორედ მოახერხეს გატანა, იმავე კვერნაძემ ამჯერზე ფიფიას პასი შეირგო და ჩინებული შესრულებით დუბლიც მიითვალა.
თითქოს წაგებული თამაში "გურიამ" დარჩენილ წუთებში მაინც გადაარჩინა. ჯერ იყო და, ბონდარენკომ "საჩუქარი" უბოძა სტუმრებს და მეგრელიშვილის ჩაწოდებულ ბურთს საკუთარ კარში მიუჩინა ადგილი, რითაც მეორე გაშვებულ გოლს მნიშვნელობა წუთში გაუნელა.
მატჩის დასრულებას 10 წუთი აკლდა, ისევ მეგრელიშვილმა რომ ივარგა და მისი დარტყმის შემდეგ ბურთ ხელზე მოხვდა ჩადუნელს. რადგან ყველაფერი "ტორპედოს " საჯარიმოში მოხდა, მსაჯმა პენალტი უყოყმანოდ დანიშნა, რომელიც უკვე მეორე თამაშია ზუსტად შეასრულა შალამბერიძემ და ეს გოლი თანაგუნდელი მეგობრის ხსოვნას საკმაოდ ემოციურად მიუძღვნა.
დარჩენილ დროში მასპინძლები კი შეეცადნენ თამაშის მოგებას, მაგრამ გურულთა დაცვა ფხიზლად იყო, სასურველი ანგარიშიც შეინარჩუნა და სატურნირო ცხრილში მეათე ადგილიც.
