როგორც “გურია ნიუსისთვის” გახდა ცნობილი, ოზურგეთის პოლიციის ყოფილი უფროსი გია ურიდია სამართალდამცავებმა დააკავეს. ჩვენი წყაროს ინფორმაციით, ის დაახლოებით ოთხი დღეა დაკავებულია და ძალოვნებთან ბევრი რამის ახსნა მოუწევს. წყაროს თქმით, მას შემდეგ, რაც გია ურიდია პოლიციიდან დაითხოვეს, იგი ბიძინა ივანიშვილს შეხვდა. ჩვენ შევეცადეთ შინაგან საქმეთა სამინისტროსგან ურიდიას დაკავების შესახებ ინფორმაცია მოგვეპოვებინა, მაგრამ, როგორც ყოველთვის მათ კომენტარი არ გააკეთეს.
“გურია ნიუსი” გია ურიდიას მამას, ჩოხატაურის საკრებულოს დეპუტატს თამაზ ურიდიას დაუკავშირდა, რომელმაც შვილის დაკავების ფაქტი უარყო, თუმცა, დაადასტურა, რომ გია ურიდია ნამდვილად იყო დაბარებული პროკურატურაში, ბათუმში:
_ ჩემი შვილის დაკავებასთან დაკავშირებით ინფორმაცია სიმართლეს არ შეესაბამება. ის ბათუმში დაიბარეს პროკურატურაში, რაღაც საკითხთან დაკავშირებით. ჩავიდა, მისცა ჩვენება და დაბრუნდა თბილისში. ჭორებს ნუ დაუჯერებთ, არ ვარ იმ დონის კაცი, რომ მოგატყუოთ.
_ ბატონო თამაზ, რატომ იყო თქვენი შვილი პროკურატურაში დაბარებული?
_ ვერაფერს გეტყვით, ახალი საქმე არაფერი არ არის, შეიძლება ძველია. ჩემს შვილს ვკითხე, და მითხრა, რომ პროკურატურაში იყო. დაკავებას არ ჰქონია ადგილი და არც არასდროს ექნება.
გია ურიდია ოზურგეთის პოლიციის უფროსად ურეკის პოლიციის უფროსად მუშაობის დროს ჩადენილი “გმირობის” გამო დააწინაურეს. აი, რას წერდა “გურია ნიუსი” ურიდიას დაწინაურების შესახებ: “როცა “ვარდების ხელისუფლებამ” ე.წ. “კანონიერ ქურდებზე” შეტევა დაიწყო, ურიდია ურეკის პოლიციის უფროსის მოვალეობას ასრულებდა. სწორედ მის სახელთან იყო დაკავშირებული კურორტზე შაქრო კალაშოვის სახლის “აღმოჩენა”. მაშინ თემა გაპიარდა და “მეტი სიცხადისთვის” “შავ სამყაროსთან მებრძოლ ვარდოსან მთავრობას” რიგითი პოლიციელის სახეც სჭირდებოდა. თორემ ურეკში წამოჭიმული სრა-სასახლე კალაშოვის რომ იყო, ურიდიამ კი არა, ლამის მთელმა ურეკმა და შს სამინისტრომაც იცოდა. უბრალოდ, გია ურიდია საჭირო დროს საჭირო კადრი აღმოჩნდა საჭირო ადგილზე, რამაც ის ვანო მერაბიშვილის ფავორიტ პოლიციელად აქცია. ჩვენი წყარო ამბობს, რომ მაშინ გია ურიდიას ხელმძღვანელობით დაბა ურეკში კრიმინალური დაჯგუფება და კალაშოვის თანამზრახველები დააკავეს, რომლებიც ურიდიას სიჩუმის სანაცვლოდ ნახევარ მილიონ ლარს სთავაზობდნენ, მაგრამ მან ამაზე უარი თქვა და ინფორმაცია სამინისტროს მიაწოდა”. თუმცა, როგორც მერე გაირკვა, ის სახლი კალაშოვს არ ეკუთვნოდა და ერთ-ერთი ოზურგეთელი ბიზნესმენის იყო(?!).
