G-NEWS TV-ს ყოველკვირეულ გადაცემა "კვირის თემაში" ლანჩხუთის მუნიციპალიტეტის გამგებელმა ზაზა ურუშაძემ განაცხადა, რომ ის თავად აპირებს მიმართოს საფინანსო პოლიციას და შეამოწმოს, როგორც ახალი ხელისუფლების მიერ შესრულებული სამუშაოები, ასევე, წინა ხელისუფლების დროს გაკეთებული ობიექტები.
აღნიშნულ ინტერვიუს გამოეხმაურა საკრებულოს წევრი და "ერთიანი ნაციონალური მოძრაობის" ადგილობრივი ორგანიზაციის ლიდერი კახა ასკურავა:
_ მე მოვუსმინე გამგებლის ინტერვიუს და ძალიან გაკვირვებული დავრჩი. როგორც წესი, საფინანსო პოლიციას არც ერთი საბიუჯეტო ორგანიზაცია არ იწვევს. ის, ნებისმიერ შემთხვევაში, უხერხული სტუმარია. აღნიშნული სტრუქტურა საბიუჯეტო ორგანიზაციებში შედის კონკრეტულ ინფორმაციაზე დაყრდნობით და არა მოწვეული სტუმრის სტატუსით. თუ აღნიშნული შესყიდვის მიმართ გამგეობას შეკითხვები გააჩნდა, მათ ჰყავთ შესაბამისი სამსახური და სანამ საფინანსო პოლიცია დაინტერესდებოდა, პირიქით, მათ იქეთ უნდა მიემართათ შემსრულებელი ფირმების არაჯეროვნად საქმის შესრულების გამო. მე როგორც ვიცი, რამდენიმე რწმუნებულს ხელიც არ აქვს მოწერილი ობიექტის ჩაბარებაზე, ეს მათი პრობლემაა. რაც შეეხება ბატონი ზაზას მუქარანარევ ტონს, რომ შემოწმდება გასული პერიოდიც, ეს ამ ხელისუფლების ხელწერად ჩამოყალიბდა _ საკუთარი უნიათობის სხვისთვის გადაბრალება საუკეთესო გზა ჰგონიათ, არადა, ეს ძალიან მცდარი გზაა. ისე, რომ გითხრათ, "ნაციონალური მოძრაობის" წევრებს უკვე გვაქვს იმუნიტეტი გამომუშავებული ძალოვან სტრუქტურებზე და ამით ნამდვილად არ შევშინდებით.
კიდევ ერთი, გამგებელმა ადგილობრივი აუდიტის სამსახურის საქმიანობა ახსენა და მინდა ამ თემას შევეხო _ უმჯობესი იყო აღნიშნულ სამსახურს თავისი საქმე ეკეთებინა და არასამეწარმეო (არაკომერციული) იურიდიული პირების პოლიტიკური შემოწმებებით არ დაკავებულიყო. რაც შეეხება ადამიანების უმიზეზოდ დათხოვნას, ამაზე კომენტარის გაკეთება ზედმეტად მიმაჩნია _ ყველამ ყველაფერი იცის, _ თქვა კახა ასკურავამ.
