ბროწეულის ნაყოფი, კანი, თესლი, ხის ქერქი _ ყველაფერი გამოიყენება სხვადასხვა სახით სხვადასხვა დაავადების წინააღმდეგ. ამ მხრივ მას იშვიათი თვისება გააჩნია.
ბროწეულს დიდი გამოყენება აქვს ფარმაცევტულ წარმოებაში, თუმცა, ბროწეულის ხის ქერქი და ფესვები ტოქსიკურია, ნაყოფის კანიც შეიცავს საკმაოდ ძლიერ ალკალოიდებს. ამიტომ მისი ხის და ნაყოფის ქერქის გამოყენების შემთხვევაში უნდა ვიყოთ დაკვირვებით და ფრთხილად, რჩევებისთვის მივმართოთ ექიმსაც, რადგან აუცილებელია დოზირების ზუსტი დაცვა.
ბროწეულის ყვავილი
ბროწეულის ყვავილის ნაყენს ჩვეულებრივად სპირტით ვამზადებთ. ყვავილობის დროს მხოლოდ ყვავილს ფრთხილად გავაცლით და სპირტში ჩავყრით. ორი კვირის შემდეგ საუკეთესოა მოსახმარად. ეს არის კარგი სავლები პირის ღრუს ანთებითი პროცესების დროს.
ბროწეულის გამომშრალი მარცვალი
ბროწეულის მარცვალი მზეზე ან ოდნავ ცხელ ჰაერღუმელში უნდა გამოვაშროთ. ამ პროცესს, სულ ცოტა, ექვსი საათი სჭირდება. შემდეგ დავფქვათ, ერთი სუფრის კოვზი ავურიოთ ერთ ჭიქა ანანასის წვენში და დღეში სამ-ოთხჯერ მივცეთ ბავშვს, ჭიების საწინააღმდეგო ძალიან კარგი საშუალებაა.
ბროწეულის თესლი
გამხმარი და დაფქული ერთი კოვზი ბროწეულის თესლი ავურიოთ ორ კოვზ თაფლში და კბილის ტკივილის დროს მივიღოთ.
ასევე, ეს კრემისებრი მასა გამოიყენება ფრჩხილის ბუდის ანთების დროს _ თხლად წავისვათ და შევიხვიოთ მტკივანი ადგილი.
ბროწეულის ხის ქერქი
გამომშრალი და დაფქული, _ ასეთი ფხვნილი კარგია ნაკაწრის ან არც ისე ღრმა ჭრილობაზე მოსაფქვევად, რომელსაც მერე არც ისე მჭიდროდ ახვევენ.
ბროწეულის ნაყოფის კანის ნახარში ძალიან კარგია სტომატიტის დროს პირში სავლებად, რომელიც უნდა მოვამზადოთ ასე: 20 გრამ მშრალ, დაქუცმაცებულ ნედლეულს დავასხათ 1 ჩაის ჭიქა ცხელი წყალი და დაბალ ცეცხლზე ნახევარი საათით ვადუღოთ. შემდეგ დოლბანდში გავწუროთ, კვლავ შევავსოთ ერთი ჩაის ჭიქა ანადუღარი წყლით. გამოივლეთ დღეში სამჯერ.
ბროწეულის წვენით და ნაყოფის კანის ფხვნილით, შესაძლოა, ვუმკურნალოთ დამწვრობას. წვენი უნდა შევაზავოთ ანადუღარი წყლით, თანაბარი რაოდენობით, შემდეგ დავასველოთ დამწვრობის ადგილის ზედაპირი და მოვაყაროთ ფხვნილი. უმჯობესია, შეუხვევლად გაჩერება, პირველ ეტაპზე მაინც.
