მარინა თოთლაძე უკვე რამდენიმე თვეა კუთვნილი თანხის დაბრუნებას ითხოვს ლანჩხუთის მუნიციპალიტეტის ხელმძღვანელობისგან.
ცნობისთვის, თოთლაძე 24 ოქტომბერს გამართულ საკრებულოს სხდომაზეც აპირებდა გამოსვლას, მაგრამ მაშინ მას ნება არ მისცეს, რუსეთის მოქალაქე ხარო.
საქმე ისაა, რომ თოთლაძის ძმა კობა მირზაშვილი საფეხბურთო კლუბ "გურიას" დირექტორი იყო და ვინაიდან მაშინ "გურიას" ფინანსური პრობლემები ჰქონდა, კლუბში გარკვეული თანხა მისმა დამ ჩადო.
დეპუტატების ნაწილმა თოთლაძის მოსმენას თავი აარიდა და დარბაზი დატოვა. მათ შორის გამგებელმა ზაზა ურუშაძემაც.
"როცა ჩემი ძმა საფეხბურთო კლუბის დირექტორი იყო, პირველი წრე მთლიანად მე დავაფინანსე. რა მიდიოდა გუნდისთვის ჩემგან კაცმა არ იცის. ის რაც მიჩუქებია, ღმერთმა შეარგოს ყველას. 200 დოლარი თითოეულ ფეხბურთელზე მოგებისას, კვება, სასტუმროს ხარჯები, კიდევ უამრავი რამ. სხვას არაფერს არ ვითხოვ, დამიბრუნეთ ის თანხა, რომელიც კლუბს ვასესხე. პიროვნებამ, ვისაც ყველაზე მეტად მოეთხოვება პასუხი (იგულისხმება გამგებელი ზაზა ურუშაძე), დარბაზი დემონსტრაციულად დატოვა. ნუთუ ამისთვის ვოცნებობდი, ამისთვის იდგა ჩემი ოჯახი "ოცნების" გვერდით? განა სხვაზე ნაკლები წვლილი გაიღო ჩემმა ოჯახმა "ოცნების" გამარჯვებაში?
სირცხვილია, ოჯახები არ გაქვთ, რას მერჩით, მეც ისევე ვმუშაობ, როგორც თითოეული თქვენგანი, გადასაყრელი არაფერი მაქვს. მოსკოვიდან ჩამოვედი, რომ მივიღო პასუხი კითხვებზე, მაგრამ რა გამოდის არავის არაფერში ვენაღვლები. კლუბის გამო ახლობლებისა და ოჯახის წევრების ოქროულობა დალომბარდებული მაქვს 10 ათას ლარად, უზარმაზარ პროცენტს ვიხდი. ერთხელ მაინც დაინტერესდა ვინმე ამ საკითხით?. ჩემს ძმას 22 წლის შვილის საფლავი ვერ გაუკეთებია უფულობის გამო, სინდისი არა გაქვთ, რას მემართებით. მე ჩემსას ვითხოვ. 3 აგვისტოს გამგებელი დაინიშნა და ხუთში ჩემი ძმა სახლში გამოუშვა, ესაა სამართალი? სადაა კუთვნილი ხელფასი, რომელიც გათავისუფლების შემდეგ ეკუთვნის? წინა საკრებულოს სხდომაზე სიტყვა არ მომცეს, რუსეთის მოქალაქე ხარო, დიახაც მეამაყება, რომ რუსეთის მოქალაქე ვარ, დღეს საქართველოს მოქალაქე რომ ვიყო, უარს ვიტყოდი მასზე", _ აღნიშნა მარინა თოთლაძემ
ამის შემდეგ, სიტყვით დეპუტატი დარეჯან ბურჭულაძე გამოვიდა, რომელიც ამავე დროს თოთლაძის რძალი და მირზაშვილის მეუღლეა:
"მე ხელთ მაქვს კობა მირზაშვილის გათავისუფლების ბრძანება, რომელიც ხუთი აგვისტოთია დათარიღებული და ჩვენ მისი მოპოვება რვა ოქტომბერს შევძელით. წინა მთავრობების დროს არ იყო პრობლემა, მოხვიდოდი გამგეობაში და საჭირო დოკუმენტს უპრობლემოდ მოგცემენ, დღეს კი რა ხდება, ერთი ფურცლის მისაღებად კარდაკარ უნდა იარო და ხელი აწერინო. ესაა ხალხო საქმე, ესა ადამიანის უფლებების დაცვა?! რაც ლანჩხუთში ხდება, ეს სრული განუკითხაობა და ადამიანების უფლების დარღვევაა. ნუთუ ასეთი სამართლიანობის აღდგენისთვის, ასეთი საქართველოსთვის ვიბრძოდი "ოცნების" გვერდით.
"ნაციონალებს" ხალხმა გასცა საკადრისი პასუხი, თქვენ რა პასუხს ვცემთ ხალხს. დამერწმუნეთ, დღეს ჩემი მოქალაქეობრივი უფლებები თუ ირღვევა, ხვალ თქვენი დაირღვევა. მე ამ განცხადებას ვაკეთებ არა როგორც დეპუტატი ან ოპოზიციონერი, არამედ როგორც ერთი ჩვეულებრივი მოქალაქე."
დარბაზში მყოფმა გამგებლის პირველი მოადგილის, ვახტანგ ზენაიშვილის თქმით, მან თავს უფლება ვერ მისცა დაეტოვებინა დარბაზი და თოთლაძეს ურჩია, როცა მხარეებს შორის მსგავსი სადაო საკითხებია, ამისთვის სასამართლო არსებობსო.
ანალოგიური წინადადება წამოაყენა დეპუტატმა ემზარ თედორაძემაც. მისმა კოლეგა აკაკი იმნაიშვილმა კი კითხვა დასვა, მე თუ ორჯერ ვასესხე გუნდს ფული და უკან დამიბრუნეთ, ამ ქალბატონს რას ერჩით, რატომ არ თუ ვერ უბრუნებთ ვალსო?!
დეპუტატმა გია გიგუაძემ კოლეგებს მოუწოდა გულდასმით მოეკიდონ აღნიშნულ საკითხს, რომ მერე მესამე სართულმა ( იგულისხმება გამგეობა) მეორე სართულისაკენ ( აქ საკრებულოა ნაგულისხმევი) არ გამოიშვიროს ხელი, გვაქვს ჩვენ ამის გამოცდილება წინა საკრებულოს შემთხვევაში. გოგუაძის აზრით, არ აქვს მნიშვნელობა სად შედგება შეხვედრა, მთავარია ვისაც ევალება და ვინც საქმის კურსშია, ერთად დაჯდეს და იმსჯელოს.
საბოლოოდ, მარინა თოთლაძეს დეპუტატებმა სიტყვა მისცეს, რომ აღნიშნულ საკითხს უახლოეს დღეებში განიხილავენ.
