ფოლკლორის საერთაშორისო ცენტრის დირექტორი გიორგი უშიკიშვილი ჩოხატაურს სტუმრობდა. მან ფოლკ-რადიოს ჩამწერ ჯგუფთან ერთად ჩაწერა სიმღერები, რომელიც შესრულებულ იქნა ანსამბლების “გურიას,” “მანდილის,” “კრიმანჭულის,” “ნართისა,” და “დაბლაციხის” მიერ.
_ ბატონო გიორგი, მოხარული ვართ, რომ ჩოხატაურს ეწვიეთ და თქვენს საავტორო გადაცემაში ჩოხატაურის ფოლკლორული ანსამბლების მიერ შესრულებული სიმღერები გაიჟღერებს. თქვენ უკვე მესამე სეზონია, საქართველოს სხვადასხვა კუთხეში დადიხართ და უამრავი სიმღერა ჩაწერეთ. რამდენ რაიონში იყავით და სიმღერის ჩაწერის გარდა, რით იყო საინტერესო თქვენი მოგზაურობა რეგიონებში?
_ ფაქტობრივად, 50 რაიონში ვიყავი. გურიის შემდეგ მივდივართ აჭარაში, სამეგრელოსა და ზემო სვანეთში. ეს იქნება ერთგვარი ფინალი ჩემი გადაცემისა. ეს მოგზაურობები საინტერესოა არა მხოლოდ იმით, რომ ძალიან ბევრი მასალა ჩავწერე, არამედ იმითაც, რომ მე, როგორც ფოლკლორის საერთაშორისო ცენტრის ხელმძღვანელი, მოვალე ვარ ადგილზე გავეცნო, თუ რა მდგომარეობაა დღეს ხალხურ შემოქმედებაში და ჩვენი მხრიდან, რაც შეიძლება მეტი დახმარება აღმოვუჩინოთ ადგილობრივებს არსებული პრობლემების დაძლევაში. ბედნიერი ვარ _ ეს წლები, რაც მე ვმოგზაურობ საქართველოს რეგიონებში, ჩემს ცხოვრებაში ყოველთვის გამახსენდება განსაკუთრებულ პერიოდად. ბევრი შესანიშნავი ადამიანი გავიცანი, ძალიან ბევრი სიმღერა მოვისმინე, უფრო მეტი რამ ვისწავლე, გავეცანი სხვადასხვა კუთხის ტრადიციებს და შეიძლება ითქვას, ძალიან მნიშვნელოვანი და საინტერესო პროექტი გამოვიდა.
_ ჩოხატაურის ანსამბლებზე რას იტყვით?
_ მე დავინახე სერიოზული მონდომება ამ კოლექტივებისა, რომლებიც ცდილობენ, წარმატებით გააგრძელონ ის ტრადიციები, რაც ჩოხატაურში არსებობდა.
_ კონკრეტულად რა დახმარებებს გაუწევს ამ ანსამბლებს ფოლკლორის საერთაშორისო ცენტრი?
_ ჩვენ აქ ჩავატარებთ მასტერკლასებს, გამოვგზავნით სპეციალისტებს, რომლებიც ისაუბრებენ იმის შესახებ, თუ რას ექცევა დღეს განსაკუთრებული ყურადღება, რა მიმართულებით უნდა განვითარდეს ხალხური შემოქმედება, რომელ ინსტრუმენტზე უნდა დაუკრან, როგორ შეადგინონ რეპერტუარი. ჩვენ არ ვაპირებთ თბილისიდან გამოვგზავნოთ ხალხი, რომლებიც გურულებს გურულ სიმღერებს შეასწავლიან _ ჩვენ მათ ვესაუბრებით იმის შესახებ, თუ როგორ უნდა წარმართონ თავიანთი შემოქმედებითი პროცესი. საერთოდ კი მინდა გითხრათ, რომ ჩოხატაურელები ჩემთვის უსაყვარლესი ხალხია. სოფელ გოგოლესუბანში ბატონ ოთარ ბერძენიშვილთან ერთად, რამდენჯერმე ვიმყოფებოდი, მრავალი სიმღერა მოვისმინე და ვისწავლე. ძალიან მიხარია, რომ დღეს ამ კუთხეში მნიშვნელოვანი ყურადღება ექცევა ხალხური შემოქმედების ბრწყინვალე ნიმუშების შენახვასა და პოპულარიზაციას. დარწმუნებული ვარ, რომ ყველა ის ადამიანი, რომელიც აქ მოღვაწეობს, ძალიან ბევრს გააკეთებს იმისათვის, რომ ხალხური შემოქმედების ნიმუშები არ დაიკარგოს და იგი მომავალ თაობას გადასცენ. მინდა, ამ სფეროში მოღვაწე ყველა ადამიანს სიკეთე და წარმატებები ვუსურვო.
