თავდაცვის ყოფილი მინისტრის, ირაკლი ალასანიას განცხადებით მიმდინარე ქმედებები თავდაცვის სამინისტროს იმიჯის შესალახად დაიგეგმა:
"იმ კრიტიკულ მომენტებში, როდესაც მე ვიყავი საფრანგეთში, ვხვდებოდი ფრანგ კოლეგას და ვთანხმდებოდით ჩვენი ქვეყნის თავდაცვისუნარიანობის უმნიშვნელოვანეს საკითხებზე, ეს მომენტი შერჩეული იყო სპეციალურად, რომ ლეგიტიმაცია, რომელიც ჰქონდა თავდაცვის სამინისტროს და მე, ყოფილიყო შელახული. ვერ ვხედავ ვერანაირ საჭიროებას თუ რამ განაპირობა ამ ხალხის სწორედ ამ დროს დაკავება და ციხეში დატოვება. ეს უდანაშაულო ადამიანები არიან, რომლებსაც თავისი ქვეყნის სამსახურის გარდა არაფერი უკეთებიათ. მე მათი გამოხსნისთვის, მათი გათავისუფლებისთვის ბოლომდე ვიბრძოლებ", – განაცხადა ალასანიამ "რუსთავი 2"-ის გადაცემა "არჩევანში".
_ პრემიერ-მინისტრის ნაცვლად მე დღეს დავინახე პროკურორი, _ დასძინა ალასანიამ.
თავდაცვის ყოფილი მინისტრის განცხადებით ერთადერთი, ვისაც აწყობს ქყევანაში მიმდინარე მოვლენები, რომელიც ურტყამს ჯარის, თავდაცვის სამინისტროსა და ქვეყნის იმიჯს, არის ქვეყანა, რომელსაც ოკუპირებული აქვს საქართველოს ტერიტორიები.
"თავდაცვის სამინისტრო არ არის საგარეო საქმეთა სამინისტრო, მაგრამ ის ნაბიჯები, რომელიც გადაიდგა ნატო-სკენ მისწრაფების კუთხით, იმპლემენტაცია შეთანხმებების, ნატო-საქართველოს პაკეტის, თავდაცვის სამინისტროს და გენერალური შტაბის სახელზეა. ხვალ იწყება განხილვები ნატოში სწორედ ამ ჩვენი არსებითი პაკეტის იმპლემენტაციის საკითხებზე. ეს რა თქმა უნდა ჯარის, თავდაცვის სამინისტროს და ჩვენი ქვეყნის იმიჯს ურტყამს. ეს ერთადერთი, ვისაც აწყობს, ჩვენი მოწინააღმდეგეა. ეს ერთადერთი, ვისაც აწყობს, არის ის, ვინც ეწინააღმდეგება საქართველოში ნატო-ს ინფრასტრუქტურის განთავსებას, ვინც ეწინააღმდეგება ჩვენი ქვეყნის თავისუფალ არჩევანს, ეს აწყობს იმ ქვეყანას, რომელსაც ოკუპირებული აქვს ჩვენი ქვეყნის 20%. ბმა არის თუ არა ამ ორ მოვლენაში, ეს რა თქმა უნდა განსჯის საგანი უნდა იყოს და ამ საკითხს ხვალ პოლიტსაბჭოზე განვიხილავ. ამიტომაც ვთქვი დღეს, რომ პროკურატურა დღეს მიზანმიმართულად ურტყამს ჩვენი ქვეყნის ყველაზე ძლიერ ჯაჭვს, ჩვენი ქვეყნის ევროატლანტიკურ მისწრაფებაში", – აღნიშნა ალასანიამ.
