საქართველოს საგარეო საქმეთა მინისტრი მაია ფანჯიკიძე, მისი მოადგილეები დავით ზალკანიანი, თამარ ბერუჩაშვილი, ლევან გურგენიძე და დავით ჯალაღონია დაკავებული თანამდებობიდან გადადგნენ. მაია ფანჯიკიძემ დატოვა კოალიციაც.
ამის შესახებ საგარეო საქმეთა სამინისტროში სპეციალური ბრიფინგი გაიმართა.
მინისტრის უკვე ყოფილმა მოადგილე დავით ზალკანიანმა საქართველოს ევროატლკანტიკურ არჩევანზე საუბრისას ემოცია ვერ დამალა და აღნიშნა, რომ ასოცირების ხელშეკრულებაზე, ხელმოწერასთან ერთად, რწმენა და გულიც დატოვა.
"გადავწყვიტე გადავდგე დაკავებული თანამდებობიდან და დავდგე ჩემი თანამებრძოლების „თავისუფალი დემოკრატების“ გვერდით, იმ გუნდის გვერდით, რომლის მთავარი ფასეულობაა ადამიანი, მისი უფლებები. ვისთვისაც უმთავრესია ევროპულ ფასეულობებზე დაფუძნებული სახელმწიფოს აშენება, ქვეყნის ევროატლკანტიკური არჩევანი. ამ ღირებულებების გარშემო გაერთიანდა ეს გუნდი. ამ ერთობას საფუძველი ჩაუყარა ჩვენმა უფროსმა მეგობარმა, ქვეყნის გულმხურვალე პატრიოტმა, ბრწყინვალე დიპლომატმა, უბრალოდ ძალიან კარგმა ადამიანმა ლევან მიქელაძემ.
სიმბოლურია, რომ დღეს 7 წელი სრულდება მას შემდეგ, რაც 2007 წლის 7 ნოემბერს, მან პროტესტი გამოთქვა სააკაშვილის ქმედებების ანტიდემოკრატიული ქმედებების გამო და გადადგა დაკავებული თანამდებობებიდან. იგი გვერდში დაუდგა ირაკლი ალასანიას და მასთან ერთად დააფუძნა თავისუფალი დემოკრატების პოლიტიკური გუნდი. მათ გვერდში დავუდექით ჩვენ, დიპლომატები და არა მხოლოდ დიპლომატები: ალექსი პეტრიაშვილი, ვიქტორ დოლიძე, ზურაბ აბაშიძე, ნინო გოგუაძე და სხვები. არავითარ შემთხვევაში პარალელს არ ვავლებ 2007 წლის 7 ნოემბერთან, მაგრამ სამწუხაროდ დღეს სხვა რეალობის წინაშე დავდექით. გაჩნდა კითხვები ჩვენი ქვეყნის საგარეო კურსთან მიმართებაში. მე არ მაქვს მორალური უფლება, დღეს სხვაგვარად მოვიქცე. არასდროს ჩემი ქვეყნის პრინციპებისთვის არ მიღალატია. 22 წელი დიპლომატიურ სამსახურში გავატარე. 2009 წელს გადავდექი ელჩობიდან. როდესაც 2012 წელს კვლავ დავბრუნდი დიპლომატიურ სამსახურში, დარწმუნებული ვიყავი, რომ მსგავსი ნაბიჯის გადაგმა აღარ მომიწევდა. 2 წელი ამ თანამდებობაზე ერთგულად ვემსახურე ჩემს ქვეყანას. ამაყი ვარ, რომ ასოცირებული ხელშეკრულების პარაფირებულ 1000 გვერდზე ჩემი ხელმოწერა დავტოვე და არა მხოლოდ – ხელმოწერა. იქ არის ჩემი რწმენა, ჩემი გული. ჩემი დღევანდელი არჩევანი შესაბამისობაშია ჩემს სამსახურთან და ღირებულებებთან. მე არსად მივდივარ, არ გემშვიდობებით, აქ ვარ ჩემს თანამებრძოლებთან ერთად", _ აღნიშნა ზალკანიანმა.
