ბოლო ხანებია, ლანჩხუთის ცენტრში ისევ მომრავლდნენ გარემოვაჭრეები. რომელ პროდუქტს არ ნახავთ აქ, თევზიდან დაწყებული, მწვანილით დამთავრებული. მართალია, მოქალაქეებს დიდად არ მოსწონთ დაჭუჭყიანებული ქუჩების ცქერა, მაგრამ ამაში დადებით მხარედ ფინანსების დაზოგვას მიიჩნევენ. საქმე ისაა, რომ დახურულ ბაზრობებზე გაცილებით ძვირია ნებისმიერი სახის პროდუქტი. ქალაქის ის მონაკვეთი, სადაც გარემოვაჭრეები იყრიან თავს, ხან ისეა გადავსებული, რომ ადამიანს არათუ მანქანით, ფეხით გავლაც კი უჭირს.
გარე მოვაჭრეთა მომრავლების ფონზე უკმაყოფილებას ვერ მალავენ, როგორც დახურულ ბაზრობებში მოვაჭრეები, ასევე, თავად ბაზრობის მეპატრონეები.
ჩვენთან საუბარში გულისწყრომა ვერ დამალა ერთ-ერთი ასეთი სავაჭრო ობიექტის _ "ქსენოვიჩის" მეპატრონე ნანა ორაგველიძემ: "უკვე აღარაფერი მიკვირს, ქვეყანა თანდათან უკან მიდის წინ წასვლის ნაცვლად. შეხედეთ, კაცი გზას ვერ გაიგნებს, ისეთი მდგომარეობაა გარშემო. ვინაა პატრონი, ვინ რას ამოწმებს?! ჩემთან მოვიდნენ ოზურგეთიდან შესამოწმებლად, ზედამხედველობის სამსახური ვართო. შენიშვნაც მომცეს, რატომ ტრაპი არ გაქვსო. კარგად ხედავთ, როგორი მდგომარეობაა ჩემს სავაჭრო ობიექტში, როგორ მაქვს დაცული სანიტარული ნორმები და ტრაპი მომიდეს მიზეზად. იმას მიაქციონ ყურადღება, პროდუქტი ქუჩაში რომაა დაყრილი და გარშემო ანტისანიტარიაა გამეფებული. საინტერესოა, სად იხდის რომელიმე მათგანი გადასახადს?!" _ ამბობს ორაგველიძე.
იმის გასარკვევად, რა ღონისძიებებს გეგმავს მუნიციპალიტეტი გარევაჭრობის აკრძალვისთვის და რა კონკრეტულ სამუშაოებს ახორციელებს ამ მხრივ, ჩვენ კომენტარი ვთხოვეთ ლანჩხუთის მუნიციპალიტეტის გამგეობის ზედამხედველობის სამსახურის უფროს თენგიზ ხელაძეს, რომელმაც დაგვიდასტურა, რომ ამ კუთხით მართლაც ცუდი სიტუაციაა: _ ჩემი სამსახურის თანამშრომელი ზაალ სანაძე სისტემატურად დადის და გაფრთხილებას აძლევს თითოეულ გარემოვაჭრეს, მაგრამ შედეგი არ ჩანს. როგორც მოვლენები ცხადყოფს, ფონს მარტო გაფრთხილებით ვერ გავალთ, უფრო მეტი სიმკაცრეა საჭირო. ალბათ, ჯარიმებს დავაწესებთ. ვნახოთ, ვმუშაობთ ამ საკითხზე, _ გვითხრა ხელაძემ.
