"თავისუფალი დემოკრატების" ოზურგეთის რაიონული ორგანიზაციის თავმჯდომარემ დიმიტრი კვერღელიძემ პარტია დატოვა, ის საკრებულოს თავმჯდომარის მოადგილეა. ამასთან დაკავშირებით კვერღელიძემ ბრიფინგი გამართა, სადაც განაცხადა, რომ საკრებულოს დეპუტატების უმრავლესობა მასთან ერთად პარტიას დატოვებდნენ.
"გურია ნიუსი" დაუკავშირდა ოზურგეთის მუნიციპალიტეტის სოფლების იმ მაჟორიტარ დეპუტატებს, რომლებიც საკრებულოში "თავისუფალი დემოკრატების" სიით იყვნენ შესულები. მათ განაცხადეს, რომ რჩებოდნენ პარტიაში და არსად წასვლას არ აპირებდნენ გამოძიების დასრულებამდე. მათი თქმით აპირებდნენ ყრილობაზე წასვლასაც. თუმცა, დეპუტატებმა რამდენიმე წუთში მათ მიერ ნათქვამი შეცვალეს და "გურია ნიუსისთვის" ცნობილი გახდა, რომ პარტია დატოვეს.
აღნიშნულ საკითხთან დაკავშირებით "გურია ნიუსთან" კომენტარს აკეთებს "თავისუფალი დემოკრატების" წევრი, ქალაქ ოზურგეთს მერიაში ჯანმრთელობის დაცვის განყოფილების უფროსი ირინა კოპალეიშვილი აკეთებს:
"ჩვენთან საქართველოში, პოლიტიკურ პროცესებს, ასევე პარტიას, უყურებენ უფრო ზერელედ. პარტიაში გაერთიანება და გაწევრიანება არ არის დიდი გასნჯისა და დიდი ფიქრის შედეგი, მე არავის შეურაცხყოფას არ ვაყენებ, მაგრამ ადამიანების დიდი ნაწილი ერთიანდება ამ პარტიაში, მაგრამ არა იდეის და ღირებულებების გამო, სწორედ ამ ადამიანებს არ უჭირთ მერე ასეთი ნაბიჯის გადადგმა, ასე ერთი ხელის მოსმით, გაურკვევლად, დაუფიქრებლად, ნაჩქარევად და ვიტყოდი არაკორექტულად, გადადგეს ეს ნაბიჯი, დატოვეს პარტია, თუმცა მე არ შევდივარ არავის გადაწყვეტილებაში, ეს მათი პირადია, ყველას თავისი ნება აქვს და თავისუფალია, მაგრამ მე მიკვირს,. რომ ასე მცირე განსაცდელს პოლიტიკურ ცხოვრებაში ამ ადამიანებმა, მით უმეტეს მამაკაცებმა, ვერ გაუძლეს. ეს ჩემთვის მიუღებელია. კიდევ გავიმეორებ, რომ გადაწყვეტილებაში მე ვერავისთან ვერ შევალ, აქვე მინდა ავღნიშნო, რომ ჩვენ ოზურგეთში "თავისუფალი დემოკრატების" უმრავლესობა ვრჩებით პარტიაში და მივდივართ აბსოლუტური უმრავლესობით თბილისში ყრილობაზე, სადაც შევხვდებით ბატონ ირაკლი ალასანიას" _ განაცხადა ირინა კოპალეიშვილმა.
