საქართველოს საგარეო საქმეთა ყოფილი მინისტრი სალომე ზურაბიშვილი ქვეყანაში შექმნილ ვითარებას სოციალურ ქსელში ეხმაურება.
"გურია ნიუსი" ზურაბიშვილის განცხადებას უცვლელად გთავაზობთ:
"ადრე ვწერდი რომ 15 ნოემბრამდე და გამოძიების დასრულებამდ, სასამართლოს დადგენილებამდე მაინც, შეიძლებოდა ამ საკითხის ცოტა ნაკლებ ხმაურით გარჩევა, რამეთუ ყველაფერი რაც ეხება და ჩრდილს უქმნის, ჩვენ ჯარებს და თავდაცვის ინსტიტუტს სხვა კატეგორიას ეკუთვნის და სჭირდება უაღრესად ფაქიზი მიდგომა. ამ მხრივ, ეს შეტევა თავდაცვის სამინისტროზე – პოლიტიკურ მიზეზებით, ალბათ, გამყარებული – შეიცავდა ქვეყნის სახელმწიფოებრიობის შესუსტების ნიშანს …
ის, რომ კოალიციას ტოვებს რომელიმე პარტია, სიტყვის და საქმის თავისუფლებას იბრუნებს, რათა დამოუკიდებლად მოემზადოს შემდეგ საპარლამენტო არჩევნებისათვის – ამაში არაფერი არც გასაოცარი, არც მოულოდნელია და არც “დემოკრატიულ” რეჟიმისთვის არ უნდა იყოს მიუღებელი. ამდენად, პრემიერის უხეში სიტყვები ყოფილ თავდაცვის მინისტრის მისამართით უკადრისად მიმაჩნია.
მაგრამ მთავარი სხვაა : არსებობს თუ არა საფრთხე საქართველოს “კურსისათვის”?
მე კი სხვანაირად დავსამდი ამ კითხვას. ჩემის აზრით, კურსი ანუ “ევროპულობა” არ ნიშნავს მაინდამაინც ევროატლანტიკურ სტრუქტურებში შესვლას არ შესვლას უახლოეს მომავალში და ვერც ასოცირების გაფორმებით შემოიფარგლება. არაფრის გაფეტიშება არ გვინდა!
ჩვენი კურსი არის, ის რაც ქართველმა ერმა აირჩია არა ერთხელ – 1918 წელს, 1991 წელს – და რასაც შეეწირა არა ერთი ქვეყნის შვილი, ანუ კურსი თავისუფლებისა, დამოუკიდებლობისა, დემოკრატიულ წყობისა, სიტყვის თავისუფლებისა, ადამიანის უფლებების დაცვისა, გარანტირებული კონსტიტუციით, დაყრდნობილი ქართულ ისტორიულ ღირებულებებზე – პირველ რიგში ტოლერანტობაზე.. და ზრდილობაზე. ესაა ჩვენი “ევროპულობა” და ასე ესმოდათ ჩვენ წინაპრებს ვინც ოცნებოდა საქართველოს გაევროპელებაზე …
არაერთხელ გამოვთქვი ამ ბოლო პერიოდში ჩემი ღრმა წუხილი ამ კურსის შემასტუსტებელი ნიშნების დანახვისას: კონსტიტუციის დარღვევა და უგულვებელყოფა (თუნდაც ჩემ საპრეზიდენტო კანდიდატურის შემთხვევაში), რამაც მიგვიყვანა იმამდე, რომ არ ვიცით დღეს რომელ რეჟიმში ვცხოვრობთ (საპრეზიდენტო, საპარლამენტო თუ შერეული) , არჩევნების შეცვლა შერჩევითობით და პიროვნულ (თუ არა კლანური) დანიშვნებით და რეალურად “გარედან მართვა” რამაც არჩევანის და პასუხისმგებლობის შორის აუცილებელი კვანძი მოშალა, კრიტიკის ვერ ატანა (თუნდაც თავიანთი “დანიშნულების”-გან), სახელმწიფო ინსტიტუტების სისტემატური შესუსტება, დისკრედიტირება და უფუნქციოდ დატოვება (პრეზიდენტი, პარლამენტი, მინისტრები…), ისედაც მძიმე პირობებში მყოფი მედიის გაუთავებელი დატუქსვა, ოპოზიციისთვის ხელის არ შეწყობა (კანონმდებლობით) … გარდა ერთისათვის (?) …
ეს არის ის რიგი მართლაც შემაშფოთებელი ნიშნები, რაც ჩვენ სახელმწიფოს ემუქრება, რამეთუ ევროპულობა ნიშნავს დემოკრატიულ წყობას, ქვეყნის თავისუფლების საწყისებზე აშენებას და თავისუფალ პიროვნებების და საზოგადოების საყრდენის გაძლიერებას.
პრემიერის გუშინდელი წამოძახილი : “მინდა ჩვენს მოსახლეობას ვუთხრა, რომ ვართ ძლიერი სახელმწიფო, ძლიერი ხელისუფლება და ჩვენი სიძლიერე გამოიხატება სწორედ ჩვენს დემოკრატიულობაში!” … ფუჭ წამოძახილად რჩება და რეალობას ვერ ცვლის!
რაც ეხება საგარეო კურსის შეცვლა არ შეცვლას … შიდა სახელმწიფოებრიობის დაშლის ნიშნები მე ჩამოვწერე და ყველა შემიძლია დავადასტურო, სამაგიეროდ რაც ეხება საგარეო კურსს ჩემთვის ნათელი არაა რა დამადასტურებელი მტკიცებულებებით გამყარებულია ეს უმძიმესი ბრალდება …. და ამას დაველოდები!
ამ ბრალდების ფაქტებით გამყარება, ალბათ, ერთის მხრივ ირაკლი ალასანიას ევალება , და ასევე ხელისუფლებას რათა მის მიმართ საფუძვლიანად თუ უსაფუძვლოდ ყველა ეჭვები მოხსნას.
დღეს საქართველოს საგარეო კურსის შეცვლა თუ ემუქრება არ ვიცი, მაგრამ ის ნადვილად ვიცი რომ ემუქრება გზის აბნევა, არეულობა, გაურკვევლობა … და, ალაბათ, საგარეო საფრთხეც რამეთუ დაშლილ სახელმწიფოს მტკიცე კურსიც ვერ ექნება და გარე მტერის მადა შეიძლება ამით გაეზარდოს !
ამ ყველაფერზეა პასუხისმგებელი ხელისუფლება და ამაზე მოეთხოვება უეჭველად პასუხი მომავალ არჩევნებზე …",- წერს სალომე ზურაბიშვილი საკუთარი "ფეისბუქის" გვერდზე.
