“რას ვითხოვ? _ სიცოცხლეს. სიკვდილი არავის უნდა, 85 წლის ვარ, მაგრამ არ მინდა სიკვდილი. ღმერთმა აქ მომიყვანა, ეს ხალხი გვპატრონობდა. ახლა თურმე სტაციონარი იხურება. ეს არის სამართალი?” _ 85 წლის მოხუცის სიტყვები “გურია ნიუსმა” ოზურგეთის ტუბდისპანსერში ჩაიწერა. თუმცა, უკვე “ტუბის” ბედი გადაწყვეტილია _ გაუქმდა და ახლა ჯერ გაუხსნელ “მედალფას” ე.წ. “ავერსის” კლინიკის დაქვემდებარებაში გადავა.
ოზურგეთში ტუბდისპანსერის გაუქმებას დიდი ხმაური მოჰყვა. ჯერჯერობით, “ტუბის” ექიმებისთვის და ექთნებისთვის არ არის ცნობილი, რა იქნება პირველი ნოემბრის შემდეგ, რადგან “ალფამ” მათ 1 ოქტომბერს ერთთვიანი ხელშეკრულება დაუდო. სამედიცინო პერსონალი “გურია ნიუსთან” საუბრისას ამბობს, რომ მსგავსი ფაქტის წინაშე არასდროს დამდგარან. ტუბდისპანსერთან ერთად უქმდება სტაციონარიც.
_ ამ ეტაპზე სტაციონარში მხოლოდ სამი პაციენტი წევს. მიდის შერწყმის პროცესი “ავერსის” კლინიკასთან. ავადმყოფების მკურნალობა ლაბორატორიულად “ავერსის” კლინიკაში მოხდება. ვისაც სტაციონარი დასჭირდება, გაიგზავნება აბასთუმანში, თბილისში, ზუგდიდში, სადაც რჩება ცენტრები. რა იქნება, არ ვიცი. რას აპირებენ ნოემბერში, ვერაფერს გეტყვით. ალბათ, ყველა თანამშრომელს გველოდება უმუშევრობა. ამჟამად ტუბდისპანსერში 29 თანამშრომელი ვმუშაობთ, გაურკვეველია სად ვიქნებით, _ გვითხრეს “ტუბში” მისულებს.
ჩვენს კითხვაზე, რამდენად დასაშვებია ტუბერკულიოზიანი ადამიანის ლაბორატორიულად მკურნალობა სხვა სახის საავადმყოფოში, პროფესიონალებისგან ასეთი პასუხი მივიღეთ:
_ ჩვენ გვეუბნებიან, რომ ყველაფერი გათვალისწინებული აქვთ. ფაქტის წინაშე რომ დავდგებით, შემდეგ გაგცემთ პასუხს. დიდი რისკის წინაშე დგას მოსახლეობა. ასეთი ავადმყოფების სხვა დაწესებულებაში მკურნალობა, სხვა პაციენტთან კონტაქტი არ შეიძლება. ჩვენთან მძიმე პაციენტებთან სხვა შესასვლელია, ცალკე ექთანი ემსახურება.
აქვე ერთი ინფორმაციაც მოგვაწოდეს _ სამ პაციენტს, რომლებიც ამჟამად “ტუბში” იმყოფებიან, სამი დღეა საკვები ვერ მიაწოდეს, რადგან საავადმყოფოს ამის სახსარი აღარ აქვს. როგორც ტუბდისპანსერში გვითხრეს, პაციენტებს საკვები სახლიდან მოაქვთ.
ჩვენ რამდენჯერმე დავუკავშირდით კომპანია “ალფას” პრესსამსახურს, მაგრამ იქ ჩვენს ზარებს არ უპასუხეს.
