14, 15 და 16 ოქტომბერს ოზურგეთი საერთაშორისო ფესტივალს _ “ალეგრობას” და ექვთიმეობას მასპინძლობდა. “ალეგრობის” აღდგენის იდეა არასამთავრობო ორგანიზაციას “არტ-გურიას” ეკუთვნის, რომლის ხელმძღვანელები ნოდარ გოგუა და ვასილ ჩიგოგიძე არიან. სწორედ ვასილ ჩიგოგიძემ უთხრა “გურია ნიუსს” პირველად, რომ ოქტომბრის შუა რიცხვებში, გურულები გრანდიოზული ღონისძიებების მომსწრე გახდებოდნენ. დღესასწაულზე ელოდებოდნენ საქართველოს კათალიკოს-პატრიარქს, ილია მეორესა და საქართველოს პრეზიდენტს, მიხეილ სააკაშვილს, მაგრამ ისინი არ ჩამოსულან.
ცნობილი ლოტბარის, გიორგი სალუქვაძის მეორე საერთაშორისო ფესტივალი დაბა ურეკში, ორი დღის განმავლობაში მიმდინარეობდა. ფესტივალში საქართველოს რეგიონებიდან და უცხოეთის ქვეყნებიდან რამდენიმე ანსამბლმა მიიღო მონაწილეობა. გალა კონცერტზე, რომელიც “ალეგრობის” დღესასწაულს დაამთხვიეს, ანსამბლები სხვადასხვა პრიზებით და ფასიანი საჩუქრებით დაჯილდოვდნენ.
საკმაოდ შთამბეჭდავი იყო, გიორგი სალუქვაძის მიერ შექმნილი და აღდგენილი ცეკვა “კალმახობა”, რომელიც ოზურგეთის ქორეოგრაფიულმა ანსამბლმა “გურიამ” შეასრულა.
ოზურგეთში “ალეგრობა” მე-19 საუკუნის ბოლოს დაწესდა და 1941 წლამდე იარსება. განახლებულ დღესასწაულთან დაკავშირებით მოხდა ეთნოგრაფიული სურათების გაცოცხლება შემოდგომასთან დაკავშირებული ტრადიციული რიტუალებით; მოეწყო ხალხური რეწვის ოსტატთა ნამუშევრების გამოფენა-გაყიდვა.
ოზურგეთის ისტორიული მუზეუმის ფონდების მთავარმა მცველმა, მანანა ლომაძემ “გურია ნიუსთან” “ალეგრობის” მნიშვნელობაზე ისაუბრა: _ “ალეგრობა” ოზურგეთში ერთ დროს ფართოდ გავრცელებული საქველმოქმედო და სამხიარულო ღონისძიება იყო. ზუსტად არ ვიცით, როდის ჩატარდა პირველი “ალეგრობა”, მაგრამ სამამულო ომის დაწყებამ რომ შეაჩერა, ეს ნამდვილად ვიცით. მას შემდეგ გურულების ეს ლამაზი დღესასწაული დაიკარგა და დავიწყებას მიეცა. ძალიან მიხარია, რომ წელს “ალეგრობა” შედგა. იმედი მაქვს, მომავალში კიდევ უფრო გამდიდრდება და შეივსება ძველი დროის ალეგრობის ელემენტებით. საინტერესოა, რომ “ალეგრობაზე” მუშაობდა “მოძრავი ფოსტა”. როგორც მეუბნებიან (თვითმხილველი ქალბატონი დალი გოგუაძე) ამ “ფოსტის” დახმარებით ბევრი ლამაზი ოჯახი შეიქმნა ოზურგეთში _ “ალეგრობაზე” გაიცნეს ერთმანეთი ოზურგეთში ცნობილმა ექიმებმა გრიგოლ მახარაძემ და ციცო თიკანაძემ, ოზურგეთის თეატრის მაშინდელმა მსახიობმა გიგოლა თალაკვაძემ და ეთერ სვანიძემ.
გურიაში თეატრალური ხელოვნების განვითარებას და დამკვიდრებას წინ უძღოდა სახალხო სანახაობები, რომელიც, ძირითადად, საქველმოქმედო ხასიათს ატარებდა და “ალეგროს” სახელით იყო ცნობილი, _ გვითხრა მანანა ლომაძემ.
“ალეგრობაზე” ადგილობრივი ხელისუფლების ყველა წარმომადგენელი ესწრებოდა _ გურიის გუბერნატორი ვალერი ჩიტაიშვილი და ოზურგეთის მაჟორიტარი დეპუტატი საქართველოს პარლამენტში გოჩა შანიძე ლიტვის ელჩს საქართველოში და ლიტველ სტუმრებს უხსნიდნენ “ალეგრობის” მნიშვნელობას. ლიტველი სტუმრებისაგან განსხვავებით, სამდღიანი ღონისძიებით ცენტრალური ხელისუფლების წარმომადგენლები არ დაინტერესებულან, დღესასწაულს არ დასწრებია არც გურიაზე შეყვარებული ყოფილი გუბერნატორი, რამაზ ნიკოლაიშვილი, რომელიც “ალეგრობის” მეორე დღეს სტუმრობდა ოზურგეთს და სამივე მუნიციპალიტეტის გამგებლებს შეხვდა.
რაც შეეხება მეორე ღონისძიებას _ “ექვთიმობას”, ის ძალიან მოკრძალებულად აღინიშნა “ღვთისკაცის” მშობლიურ სოფელ ლიხაურში. შემოქმედელი მიტროპოლიტის, მეუფე იოსების ლოცვა-კურთხევით, ექვთიმე თაყაიშვილის გორელიეფი ოზურგეთის მუნიციპალიტეტის საკრებულოს თავმჯდომარემ, ალეკო მამეშვილმა და ოზურგეთის მუნიციპალიტეტის გამგებლის მოვალეობის შემსრულებელმა, ილია ვაშაყმაძემ გახსნეს.
აღსანიშნავია, რომ “ალეგრობაზე”, ღმრთისმშობლის მიძინების ოზურგეთის საკათედრო ტაძარში ჯვარი დაიწერეს ტალინელმა ცოლ-ქმარმა: _ მათი შვილი მონაწილეობდა გიორგი სალუქვაძის საერთაშორისო ფესტივალში. როგორც გვითხრეს, ძალიან უნდოდათ საქართველოში დაეწერათ ჯვარი და ეს ოცნება აიხდინეს, _ გვითხრა “არტ-გურიას” ერთ-ერთმა დამფუძნებელმა ნოდარ გოგუამ.
