გინესების რეკორდების ყოველწლიური წიგნი პირველად 1955 წელს გამოჩნდა, თუმცა მსოფლიოში ერთ-ერთი ყველაზე გაყიდვადი წიგნის ისტორია მე-18 საუკუნიდან იწყება.
ამჟამად გინესის რეკორდების წიგნი 100-ზე მეტ ქვეყანაში გამოიცემა. მასში დაბეჭდილი ფაქტები სწრაფად ძველდება, ამიტომ, სხვადასხვა ქვეყანაში საგანგებო კომისიებია შექმნილი, რომლებიც ახალი რეკორდების აღრიცხვითა და საგანგებო დიპლომების გაცემით არიან დაკავებული.
გაგაცნობთ ბოლო ათი წლის განმავლობაში დაფიქსირებულ რამდენიმე ყველაზე "უცნაურ" რეკორდს.
ბრიტანელ გარი ტერნერს, შეუძლია მუცელზე კანი 15,8 სანტიმეტრის სიგრძეზე გაიწელოს. ამის მიზეზი იშვიათი დაავადებაა, რომელიც ელერს–დანლოსის სინდრომითაა ცნობილი. საუბარია შემაერთებელი ქსოვილების ფუნქციის მოშლაზე.
2004 წლის 17 აგვისტოს ახალზელანდიელმა ა.ჯ. ჰაკეტმა საზეიმო ნახტომი განახორციელა ყველაზე მაღალი შენელებული ვარდნის ატრაქციონიდან, სახელწოდებით "ნახტომი ზეციდან". ვარდნა კოშკის 61–ე დონიდან იწყება 233 მეტრის სიმაღლეზე მიწის ზედაპირიდან და 17–20 წამი გრძელდება.
2003 წლის 31 ივლისს გრილ–ბარში, რომელიც ტაილანდში მდებარეობს, დაამზადეს ყველაზე დიდი ჰამბურგერი, რომლის წონამ 35,6 კილოგრამი შეადგინა.
2004 წლის 28 ივლისს, ქალაქ პერმის ცირკის არენაზ,ე რუსეთის სახელმწიფო ცირკის მსახიობებმა ასკოლდ და ედგარ ზაპაშნებმა, ყველაზე გრძელი ნახტომი განახორციელეს ლომზე ამხედრებულებმა. ნახტომის სიგრძე 2,3 მეტრი იყო.
2005 წლის 9 ნოემბერს, ამერიკელმა ჯეკი ბიბიმ, სხვათა დახმარების გარეშე შეძლო 10 წამის განმავლობაში პირით, კუდით დაეჭირა 10 ჩხრიალა გველი.
2004 წლის 24 მარტს, ჩინეთის ქალაქ ნანკინში, ჩინელ ვეი შენგჩუს, თავსა და სახეში 1.790 ნემსი ჩაურჭეს.
