ამის დამალვას ხელისუფლება საგულდაგულოდ ცდილობს _ საწინააღმდეგოს დამტკიცებას ჩოხატაურის საკრებულოს თავმჯდომარე ანტონ ხუნდაძე ქუჩაში ჰიბრიდული სიმინდის სამიოდე ტაროს ჩამოტარებითაც აპირებს და სახელისუფლებო მედიასაშუალებებიც ირწმუნებიან, რომ გურიაში ჰიბრიდული სიმინდის დიდი მოსავალი მოვიდა(?!). ის, რომ მთავრობას მორიგი პროგრამა ჩაუვარდა, ხელისუფლების წარმომადგენლებიც ვერ უარყოფენ. მათმა უმრავლესობამ საყანე ფართობები, ლანჩხუთის მუნიციპალიტეტში, ანჯელის ტერიტორიაზე აიღო და შედეგს მოთმინებით ელოდა, თუმცა, ნადი და ნაქირავები ტრაქტორები არაფერში გამოადგათ _ იქ ჩასულებმა მხოლოდ რამდენიმე, “მტრისთვის თვალის დასაფსები” ტარო წამოიღეს.
ჩოხატაურის მუნიციპალიტეტის გამგებლის თანაშემწე მამუკა სანიკიძე “გურია ნიუსთან” საუბრისას ამბობს, რომ არ იცის, რამდენი კილოგრამი მოსავალი მიიღო. მისივე თქმით, ნაყიდი ხუთი კილოგრამი სიმინდის მარცვალი სრულად არ დაუთესავს:
_ ყველა არ დამითესავს. სახლში მქონდა ცოტა და ამოვიდა, თუმცა, ნამდვილად არ ვიცი, რამდენი კილოგრამია, _ აღნიშნა სანიკიძემ.
გამგეობის საფინანსო სამსახურის უფროსის ზურაბ ჩანტლაძის თქმით, ჰიბრიდული სიმინდი 2 000 კვადრატულზე მეტრ ფართობზე დათესა, თუმცა, მოსავალი ჯერ არ აუღია:
_ არ ვიცი, როგორი მოსავალია. ამ დღეებში ვაპირებ წასვლას, _ გვითხრა ჩანტლაძემ.
დათესილი სიმინდის ოდენობა, არც გამგებლის მოადგილემ, დიმიტრი კორიფაძემ იცის(?!):
_ არ ვიცი, რამდენი დავთესე. არ ვარ სამსახურში და ვერ გეტყვით.
_ იმის ცოდნას, რამდენ კვადრატულზე რა რაოდენობის სიმინდი დათესეთ, სამსახურში ყოფნა სჭირდება?
_ არ ვიცი. მე ჯერ არ მომიტეხავს ყანა. ხვალ მივდივარ (საუბარი ჩაწერილია 18 ოქტომბერს) და ვნახავ, რა იქნება, _ აღნიშნა კორიფაძემ ჩვენთან საუბრისას.
გამგეობის საორგანიზაციო სამსახურის მთავარი სპეციალისტის ლუდა მეგრელიშვილის თქმით, ჰიბრიდული სიმინდი ანჯელში დათესა და დაახლოებით ნახევარი ტონა მოსავალი მიიღო. მეგრელიშვილი არ უარყოფს, რომ მოლოდინი გაუცრუვდა _ მისი განმარტებით, წინა წლებში, ჩვეულებრივი სათესლე მარცვლით ანჯელში ტონაზე მეტი სიმინდი მოდიოდა.
ხელისუფლების წარმომადგენლებს შორის ბევრია ისეთი, რომელთა ფართობებზე სიმინდი საერთოდ არ ამოვიდა. მათ შორისაა გამგეობის მთავარი ბუღალტერი ზურაბ შათირიშვილი, რომელმაც გამგებლის სახელზე განცხადებაც კი დაწერა და იმედოვნებს, რომ თესლის საფასურს _ 75 ლარს აღარ გადაახდევინებენ. მართალია, განცხადება არ დაუწერია და არც პრეტენზიებს გამოთქვამს, მაგრამ როგორც ჩვენი წყარო ირწმუნება სიმინდის გარეშე დარჩა გამგეობის ზედამხედველობის სამსახურის უფროსი ზაალ ბერძენიშვილი _ მის საყანე ფართობზე ჰიბრიდული სიმინდი არ გაიზარდა.
ჩოხატაურის მუნიციპალიტეტის საკრებულოს წევრმა, ოპოზიციონერმა ვახტანგ გაჩეჩილაძემაც ჰიბრიდული სიმინდი “მთავრობის გვერდით”, ანჯელში დათესა:
_ როცა შემოთავაზება გაკეთდა, იმდენად დიდი იყო პიარი, დავინტერესდი _ იქნებ, ერთხელ მაინც გაემართლებინა რომელიმე ნაციონალურ პროექტს და ექსპერიმენტის სახით მეც მივიღე მონაწილეობა ამ ყბადაღებულ აქციაში. დავამუშავე 1 000 კვადრატული მეტრი ფართობი. 1 000 მეტრის დამუშავება, ყველას, საშუალოდ, 200 ლარი დაუჯდა. ვიცოდი, რომ ეს პროექტი თავიდანვე განწირული იყო, მაგრამ ვიღაც-ვიღაცეებს რომ არ ეთქვა, შენ რა იცი, ჩვენ რა ვქენითო, ამიტომაც დავთესე. შედეგი მივიღე ის, რასაც ველოდი _ დაახლოებით 150 კილოგრამი სიმინდი მოვიწიე დაპირებული 600-700 კილოგრამის ნაცვლად. ასე და ამრიგად, ესეც ნაციონალების რიგითი მერამდენე ჩავარდნილი პროექტი გამოდგა, _ აღნიშნა ჩვენთან საუბრისას გაჩეჩილაძემ.
საკრებულოს წევრი, ნინო კუტუბიძე ამბობს, რომ მოსავალი არ შეუფასებია: _ რა ვიცი, ნორმალურად მოვიდა. 1 000 მეტრზე დავთესე, მაგრამ არ ვიცი, რამდენი მოვიდა, მასე არ შემიფასებია, _ გვითხრა კუტუბიძემ.
ჩვენი ინფორმაციით, სათესლე სიმინდის საფასურის გადახდა უკლებლივ ყველას მოუწევს მიუხედავად იმისა, მიიღო თუ არა მოსავალი.
ჩოხატაურის მუნიციპალიტეტის გამგეობაში ამ საკითხის დეტალურად სასაუბროდ მანანა ძნელაძესთან გვამისამართებენ, რომელიც ეკონომიკის სამსახურის სპეციალისტია და როგორც გვეუბნებიან, ჰიბრიდული სიმინდი კურატორობა სწორედ მას ავალია. თუმცა, იგი, მიუხედავად იმისა, როგორც საჯარო მოხელე ვალდებულია კითხვებს პასუხი გასცეს, ისე, რომ არც კი ინტერესდება, რა საკითხზე ვურეკავთ, ტელეფონს გვითიშავს:
_ რატომ მირეკავთ საერთოდ, რა საქმე მაქვს თქვენთან?! _ გვითხრა ძნელაძემ და ტელეფონი გაგვითიშა.
ჩოხატაურის ახალი გამგებელი ლელა იმედაშვილი მოსვლის დღიდანვე ამბობს, რომ მედიასთან დიალოგი ჯანსაღ რეჟიმში იქნება. თუმცა, თუ ძნელაძის მაგალითით ვიმსჯელებთ, როგორც ჩანს, ჩოხატაურელ საჯარო მოხელეებს ჯერ კიდევ არ აქვთ გააზრებული საკუთარი უფლება-მოვალეობები და მათთვის ხალხის ინტერესებზე წინ საკუთარი შეხედულებები დგას, რაც ამ შემთხვევაში კონკრეტულ მედიასაშუალებასთან ურთიერთობაში გამოიხატება. აღსანიშნავია, რომ ძნელაძის მხრიდან ეს პირველი შემთხვევა არ არის _ რატომღაც, “გურია ნიუსის” შეკითხვებს იგი ყოველთვის ასეთი აგრესიით პასუხობს.
