მსოფლიოში ნავთობზე ფასები რადიკალურად ეცემა. WTI–ის ნავთობის დეკემბრის მიწოდების ღირებულებამ ბარელზე 2,25-ით დაიკლო, რაც 1.76 დოლარს შეადგენს.
ოფიციალურად, ფასების შემცირების მიზეზად, კომპანია Saudi Arabian Oil –ის მიერ აშშ–ში "შავი ოქროს" ექსპორტის ღირებულების შემცირება სახელდება.
ნავთობის მსოფლიო ფასების შემცირების პარალელურად, სოციალურ ქსელებში ქართველი მომხმარებლების მიერ არაერთი გვერდი გაიხსნა მოთხოვნით – შემცირდეს საწვავის ფასი.
იმას, რომ ფასი საწვავზე საქართველოშიც დაიკლებს, არ უარყოფს ნავთობიმპორტიორთა კავშირის თავმჯდომარე ვანო მთვრალაშვილი. თუმცა, ეს მხოლოდ 3–5 თეთრის ფარგლებში მოხდება.
მთვრალაშვილის თქმით, ფასების კლება აგვისტოდანაა დაწყებული.
"კერძოდ, აგვისტოს დასაწყისში მოხდა ყველა ტიპის საწვავის გაიაფება. საშუალოდ 2-3 თეთრით გაიაფება ერთ ლიტრზე; 24-27 სექტემბერს – საშუალოდ 3-6 თეთრით და 13-18 ოქტომბერს – საშუალოდ 3-7 თეთრით.
ფასების კლება განპირობებული იყო ნავთობპროდუქტებზე საერთაშორისო ფასების კლებით", _ განმარტავს ნავთობიმპორტიორთა კავშირის თავმჯდომარე და დასძენს, რომ სავარაუდოდ, უახლოესი პერიოდის განმავლობაში, ქართულ ბაზარზეც საშუალოდ 3-5 თეთრით აუცილებლად შემცირდება საწვავის ფასი.
აღსანიშნავია, რომ 2014 წლის 9 თვეში, საქართველოში ნავთობპროდუქტების (ბენზინი და დიზელის საწვავი) იმპორტმა 648,6 ათასი ტონა შეადგინა, რაც გასული წლის ანალოგიური პერიოდის მაჩვენებელთან შედარებით (596,7 ათასი ტონა) 51,9 ათასი ტონით მეტია. მათ შორის, ბენზინის საწვავის იმპორტმა შეადგინა 274,6 ათასი ტონა, დიზელის საწვავის იმპორტმა – 374 ათასი ტონა.
საწვავის კატეგორიების მიხედვით 2014 წლის სექტემბერში საქართველოში ბენზინის საწვავის იმპორტმა შეადგინა: A-91 რეგულარი მარკის ბენზინი – 24,5 ათასი ტონა ანუ 70,8%; A-95 პრემიუმი მარკის ბენზინი – 9,0 ათასი ტონა ანუ 26%, A-98 სუპერი მარკის ბენზინი – 1,1 ათასი ტონა ანუ 3,2%. ხოლო დიზელის საწვავის იმპორტმა შეადგინა: 50PPM (ევრო დიზელი) – 9,9 ათასი ტონა ანუ 20,6%, L-62 დიზელის საწვავი – 38,1 ათასი ტონა ანუ 79,4%.
