გაერთიანებული დემოკრატიული მოძრაობის ოზურგეთის რაიონული ორგანიზაცია მორიგ განცხადებას აქვეყნებს, რომელიც ქალაქ ოზურგეთის მერის, ბეგლარ სიორიძის მიერ "გურია ნიუსში", საპატიო ოზურგეთელების თემასთან დაკავშირებით გაკეთებულ კომენტარს უკავშირდება.
"უპირველეს ყოვლისა, ჩემთვის მართლაც გაუგებარია თუ რატომ გამოიწვია ამ თემამ ასეთი არაერთგვაროვანი რეაქცია, რატომ გახდნენ ეს ადამიანები საზოგადოების კონკრეტული ნაწილისგან ამგვარი გამოძახილის ადრესატები ან კიდევ, რომელი ამ მოქალაქეთაგანი არ აკმაყოფილებს საპატიო ოზურგეთელის სტატუსსა თუ კრიტერიუმს?!", _ ასე პასუხობს "გაერთიანებული დემოკრატიული მოძრაობის" ოზურგეთის ორგანიზაციის განცხადებას ქალაქ ოზურგეთის მერი, ბეგლარ სიორიძე.
მისივე თქმით, აუცილებლად უნდა გავმიჯნოთ ერთმანეთისაგან წოდება – "საპატიო მოქალაქე" და "საპატიო ოზურგეთელი", რომელიც ერთი კონკრეტული ღონისძიების ფარგლებში მიენიჭათ ამ მართლაც გამორჩეულ და დამსახურებულ ადამიანებს.
"სტატუსი, რომელიც ამ წერილში ასე ცალსახად იქნა გამოკვეთილი, გულისხმობს საპატიო მოქალაქის სტატუსის მინიჭებას წელიწადში ერთხელ და ჯილდოვდება ერთჯერადი ფულადი თანხით. აღნიშნულ პიროვნებებს კი მხოლოდ საპატიო ოზურგეთელის სიგელები გადაეცათ და არა ფულადი თუ სხვა მატერიალური ჯილდო.
ამასთან, გეტყვით რომ დღესდღეობით საკრებულოს მიერ არ არის მიღებული საპატიო მოქალაქის წოდების მინიჭების წესი, ამიტომაც, მერმა მისთვის კანონით მინიჭებული უფლებამოსილებით ( "მერის უფლებამოსილებისთვის მიკუთვნებული ცალკეული საკითხების შესასწავლად, შესაბამისი დასკვნებისა და რეკომენდაციების მოსამზადებლად ქმნის სათათბირო ორგანოებს – საბჭოებსა და სამუშაო ჯგუფებს" – საქართველოს ორგანული კანონი, ადგილობრივი თვითმართველობის კოდექსი, მუხლი 54, 1/ე.ვ) შექმნა სამუშაო ჯგუფი და მერიის მიერ ჩატარებული ღონისძიების ფარგლებში გამოავლინა საპატიო ოზურგეთელები", _ ასეთია ბეგლარ სიორიძის პოზიცია ამ საკითხთან დაკავშირებით.
"გაერთიანებული დემოკრატიული მოძრაობის" ოზურგეთის რაიონულმა ორგანიზაციამ, 13.11.2014 წელს გააკეთა განცხადება, რომელიც შეეხებოდა ოზურგეთის მერიის მიერ მოწყობილ დღესასწაულზე "საპატიო ოზურგეთელის" წოდების მინიჭებას. ორგანიზაცია თვლიდა, რომ ოზურგეთის მერია წოდებების მინიჭებისას გასცდა თავის უფლებამოსილების ფარგლებს, გადაწყვეტილების მიღებისას საჯაროობის პრინციპის დარღვევამ კი საშუალება არ მისცა საზოგადოებას გარკვეულიყო მერიის მოქმედებების მართებულობაში.
"ზემოხსენებული განცხადების გაკეთების შემდეგ, ამ საკითხზე პოლემიკის გაგრძელებას არ ვაპირებდით, რადგანაც არანაირი სურვილი არ გვქონდა უხერხულ მდგომარეობაში ჩაგვეყენებინა ის ღირსეული ადამიანები, რომელთაც საპატიო წოდება მიენიჭათ.
მაგრამ ოზურგეთის მერმა ჩვენს განცხადებასთან დაკავშირებით გააკეთა განმარტებები, რომელმაც კიდევ უფრო მეტი ბუნდოვანება შესძინა მომხდარ ფაქტს და თავს ვალდებულად ვთვლით განვაცხადოთ შემდეგი:
მერის განცხადების მიხედვით – მისთვის გაუგებარი იყო რატომ გამოიწვია ამ "თემამ" ასეთი არაერთგვაროვანი რეაქცია. აქვე მიუთითა, რომ ჩვენ ერთმანეთისაგან უნდა გაგვემიჯნა წოდება "საპატიო მოქალაქე" "საპატიო ოზურგეთელისაგან". მისივე განცხადებით ის მოქმედებდა კანონით მინიჭებული უფლების ფარგლებში, ამასთანავე აქცენტი გააკეთა ტერმინთა განმარტებაზე "საპატიო ოზურგეთელზე" და "საპატიო მოქალაქეზე".
ოზურგეთის მერის მოსაზრებების მართებულობას საფუძველს აცლის ადგილობრივი თვითმმართველობის კოდექსის 24-ე მუხლის პირველი ნაწილის ა.დ.) პუქნტი, რომლის მიხედვით – "მუნიციპალიტეტის საკრებულოს უფლებამოსილებებს განეკუთვნება მუნიციპალიტეტის საპატიო წოდებებისა და ჯილდოების შემოღებისა და მინიჭების წესების დადგენა"
შესაბამისად, თუ კი მერის მიერ მინიჭებული წოდება მუნიციპალიტეტის მიერაა შემოღებული და ასევე თუ კი წოდება საპატიოა, მაშინ მისი მინიჭების წესები უნდა დაადგინოს საკრებულომ. თუ კი მერი აცხადებს, რომ მას წოდების მინიჭების უფლება საკრებულოს გარეშეც ჰქონდა მაშინ გამოდის, რომ ეს წოდებები არც მუნიციპალიტეტისა და არც საპატიოა. რადგანაც მერიას უფლება არა აქვს დადგენილი ნორმების გვერდის ავლით განახორციელოს რაიმე ქმედება, მათ შორის დროებითი სამუშაო ჯგუფის შექმნი გზით.
მერიის მოქმედებებს სრულიად ბუნდოვნად ხდის მერის მხრიდან ტერმინთა განმარტებისა და გამიჯვნის მცდელობა, რომელთა მიხედვითაც წოდება მინიჭებულები "საპატიო მოქალაქეები" კი არა "საპატიო ოზურგეთელები" არიან, რადგანაც ორივე შემთხვევაში წოდება საპატიოა და მისი მინიჭება მოხდა მუნიციპალიტეტის მიერ დაფინანსებულ ღონისძიებაზე.
აქვე ვაცხადებთ, რომ ეს არ გახლავთ ოზურგეთის მერის პირველი მოქმედება, რომელიც ვერ ჩაეტია მოქმედი კანონმდებლობის ფარგლებში. საზოგადოებას შევახსენებთ, რომ უკანონოდ და უფლებამოსილების გადაჭარბებით თანამდებობიდან იქნა განთავისუფლებული ოზურგეთის მუნიციპალური სტადიონისა და კულტურის პარკის დირექტორები; ასევე უკანონო და სრულიად გაურკვეველი იყო მერიის მოქმედებები საკრებულოს იგნორირებით საზოგადოებრივი დარბაზის შექმნისას, ადგილი ჰქონდა საკრებულოს და საზოგადოებრივი აზრის იგნორირებას მთელ რიგ შემთხვევებში, რის შედეგადაც ოზურგეთის მერიის თანამდებობის პირების ნებასურვილი მუნიციპალიტეტის გადაწყვეტილებად იქცა.
ძალიან სამწუხაროა, რომ ოზურგეთელებმა "ქართული ოცნების" ადგილობრივ ხელისუფლებაში მოსვლის შედეგად დავკარგეთ თვითმმართველობის ის ელემენტებიც კი რომელიც აქამდე გაგვაჩნდა. არა თუ თვითმმართველობა ოზურგეთელებს ჩვენს ქალაქში სანატრელი გაგვიჩნდა ზოგადად სამოქალაქო ხელისუფლება, ვინაიდან თვითმმართველობის ორგანოებს შორის კომპენტენციათა აღრევისა და მთლიანობაში ამ სფეროში არსებული განუკითხაობის გამო სულ სხვა კომპეტენციის ორგანოები ნებით თუ უნებლიეთ იძულებულნი არიან მნიშვნელოვნად ჩაერიონ თანამდებობის პირთა მრავალფეროვანი სურვილების დაოკებაში, გადაწყვეტილებების მიღებაში ან კიდევ უკვე მიღებული გადაწყვეტილებების "გაპრავებაში", _ აღნიშნულია ოფიციალურ განცხადებაში.
