რამდენად მართებულად მიგაჩნიათ დღევანდელი აქცია? რომელ ხელისუფლებას მიუძღვის ყველაზე დიდი ბრალი ტერიტორიების დაკარგვაში და რომელმა ხელისუფლებამ გააკეთა ყველაზე მეტი ამ ტერიტორიების დასაბრუნებლად? _ ამ კითხვებით “ გურია ნიუსმა“ ოზურგეთის ქუჩებში გამოკითხვა ჩაატარა.
ილია რუსიეშვილი: _ აქცია არის "ნაციონალების" მორიგი ხრიკი, მაგათ უნდათ, რომ დანაშაული ჩაიდინოს ახლანდელმა ხელისუფლებამ, ამით ჩვენ უფრო გავაღიზიანებთ რუსეთს და უარესს იზამს. ტერიტორიების დასაბრუნებლად ენით ყველამ ყველაფერი გააკეთა, სააკაშვილმა კი სამუდამოდ მოსპო მაგაზე ფიქრი. იმას იძახიან სტალინმა და ბერიამ ხალხი დახვრიტაო და მან რომ 7 ნოემბერს და 26 მაისს უდანაშაულო ხალხი ამოწყვიტა, ის, თურმე, არაფერი არ ყოფილა, სისხლიანი მთავრობა იყო!
ტატიანა რიჟევსკაია: _ მე ვფიქრობ, რომ აქცია არის მართებული, რადგან ეს არ არის პოლიტიკური, პირიქით ჩვენ გამოვხატავთ ჩვენი დამოკიდებულებას რუსეთის ანექსიის წინააღმდეგ, რაც შეეხება ტერიტორიების დაკარგვას, ამაში ბრალი ყველას მიუძღვის.
ნია მექვაბიშვილი: _ არ ვეთანხმები ამ აქციას, ტერიტორიების დასაბრუნებლად არც ერთი ხელისუფლებას მკვეთრი ნაბიჯი არ გადაუდგამს, დაკარგვაში კი რა თქმა უნდა "ნაციონალებს" მიუძღვის ყველაზე დიდი ბრალი!
ზურაბ კვირკველია: _ აქცია მართებულია, რადგან ყველას აქვს უფლება გამოხატოს თავისი დამოკიდებულება თუ აზრი, დანარჩენში არ ვარ კომპეტენტური.
ნინო სალუქვაძე: _ არ არის სწორი ამ აქციის გამართვა, დანარჩენს ვერ გეტყვით.
ვლადიმერ გოგიბერიძე: _ მართებულია. რა თქმა უნდა იმიტომ, რომ უნდა შევაჩეროთ რუსეთის ანექსია. ტერიტორიების დასაბრუნებლად არა მგონია, რომელიმე ხელისუფლებას რაიმე გაეკეთებინა და დაკარგვაში კი ყველაზე დიდი ბრალი შევარდნაძეს მიუძღვის!
ავთანდილ ვაშაყმაძე: _ დღევანდელი აქცია? " ნაციონალებს" რომ აქვთ? რა ვიცი, ალბათ, "პაკაზუხობენ“. ბრალი ტერიტორიების დაკარგვაში მაინც სააკაშვილს მიუძღვის, დასაბრუნებლად კი ვერანაირ ნაბიჯებს ვერ ვხედავ!
