2011 წლის 7-8 ოქტომბერს, ყირგიზეთში, ისიკ-კულის სანაპიროზე, ჩატარდა პირველი საერთაშორისო კონფერენცია: “ფინანსური განათლება და ეკონომიკური ჟურნალისტიკა, როგორც სტაბილურობის ფაქტორი და სიღარიბესთან ბრძოლის მექანიზმი”.
კონფერენციაში მონაწილეობდნენ ყირგიზეთის, ტაჯიკეთის, რუსეთის, უკრაინის, საქართველოს, აზერბაიჯანის, ბელორუსიის წარმომადგენლები და დამკვირვებლები: ეკონომიკური თანამშრომლობისა და განვითარების ორგანიზაცია (საფრანგეთი) და მსოფლიო ბანკი (ჩეხეთი). სულ _ 112 წარმომადგენელი სხვადასხვა ქვეყნიდან.
განსაკუთრებით მნიშვნელოვანი იყო ის ფაქტორი, რომ კონფერენციის მონაწილეები წარმოადგენდნენ როგორც სახელისუფლებო წრეებს, ასევე სამოქალაქო საზოგადოებას, არასამთავრობო ორგანიზაციებსა და მასმედიას. განსაკუთრებული ყურადღება დაეთმო მედიის როლსა და მნიშვნელობას ეკონომიკური საკითხების გაშუქების თვალსაზრისით; ჟურნალ-გაზეთების სარედაქციო პოლიტიკასა და ეკონომიკის სფეროში მომუშავე ჟურნალისტების პროფესიონალიზმს.
ჯგუფური მუშაობის პროცესში განხილული იქნა სხვადასხვა ქვეყნის მაგალითები და განსაკუთრებული ყურადღება დაეთმო საქართველოში მიმდინარე ეკონომიკურ რეფორმებსა და მედიის როლს საგანმანათლებლო თვალსაზრისით. ასევე, საზოგადოების ჩართულობას (მედიის დახმარებით) მიმდინარე ეკონომიკური რეფორმების პროცესებში.
სხვადასხვა ქვეყნების წარმომადგენლებს აინტერესებდათ, ნამდვილად არის თუ არა ჩვენთვის საჯარო ინფორმაცია ხელმისაწვდომი და რამდენად გამჭვირვალეა ბიუჯეტი ქართული მედიის წარმომადგენელთათვის.
გაიმართა დებატები იმასთან დაკავშირებით, როგორი უნდა იყოს სარედაქციო პოლიტიკა ეკონომიკის სფეროში მომუშავე ჟურნალისტებისთვის და რამდენად სჭირდებათ მათ გადამზადება სხვადასხვა ტრენინგებისა და სემინარების საშუალებით.
ასევე, ინტერესი გამოიჩინეს ქართულ მედიაში დანერგილი ჟურნალისტური გამოძიების პრაქტიკით, რის მეშვეობითაც ჟურნალისტი მკითხველს საშუალებას აძლევს, გარკვეულწილად აკონტროლოს ბიუჯეტიდან გამოყოფილი თანხების მიზნობრივ ხარჯვა.
სხვადასხვა ქვეყნის წარმომადგენლებს საკმაოდ საინტერესო კვლევები ჰქონდათ ეკონომიკურ ჟურნალისტიკასა და მის როლზე.
მედიის წარმომადგენელთათვის, ერთ-ერთი უმნიშვნელოვანესი ფაქტორი გახლდათ ახალი კონტაქტების შეძენა და სამომავლო თანამშრომლობის დაგეგმვა, როგორც ინფორმაციის, ასევე გამოცდილების გაცვლის თვალსაზრისითაც.
კონფერენციაში ოთხი ქართველი ჟურნალისტის _ შორენა ღლონტის, თამარ ლეფსვერიძის, ნონა ქვლივიძის და რეზო საყევარიშვილის, მონაწილეობა ფონდ “ღია საზოგადოება საქართველომ” დააფინანსა.
