პროკურატურის მიერ, რამდენიმე სამინისტროს საქმიანობაზე მოკვლევის დაწყებას, შესაძლოა, მინისტრების პასუხისმგებლობის საკითხის დაყენება მოჰყვეს, _ ასეთ შეფასებას აძლევს ანალიტიკოსთა ნაწილი ქვეყანაში მიმდინარე პროცესებს. თუმცა, მათივე თქმით, გამოძიებები გაცილებით ადრე დაიწყებოდა საბიუჯეტო თანხების კონტროლის მექანიზმი გამართული რომ იყოს.
ანალიტიკოსი დემურ გიორხელიძე ფიქრობს, რომ ქვეყანაში სახელმწიფო საბიუჯეტო ხარჯების კონტროლის მექანიზმი მოშლილია და სახელმწიფო აუდიტის სამსახური, რომლის მიხედვითაც პარლამენტი საბიუჯეტო თანხების ხარჯვას აკონტროლებს, სათანადოდ ვერ მუშაობს.
"ქვეყანაში არსებობს უბადრუკი სამსახური, რომელსაც სახელმწიფო აუდიტის სამსახური ჰქვია. ის არ აკეთებს თავის საქმეს, წინააღმდეგ შემთხვევაში, ირაკლი ალასანიასთან დაკავშირებით და სხვა მინისტრებზეც, გაცილებით ადრე დადგებოდა პასუხისმგებლობის საკითხი.
ამ მარიონეტული სამსახურის შექმნის შემდეგ ქვეყანაში ფაქტიურად, სახელმწიფო ფინანსების კონტროლის მექანიზმი მთლიანად მოშლილია. გადახედეთ 2002 წლამდე რა შედეგებს დებდა კონტროლის პალატა და მიხვდებით, რა დიდი ძალა აქვს ამ სამსახურს. დღეს რომ ფინანსური შემოწმება დაიწყოს, კატასტროფის წინაშე აღმოჩნდებიან ყოფილი მმართველები, რომლებსაც 30-წლიანი ციხეები არ აცდებათ. ჩავატაროთ ექსპერიმენტი, ჩემი თანამშრომლებით შემიშვით ნებისმიერ უწყებაში და გაჩვენებთ, როგორ კატასტროფულად იხარჯება სახელმწიფო ბიუჯეტი. ეს იცის უკონტროლობამ. სახელმწიფო ბიუჯეტის კონტროლის სისტემა უნდა აღდგეს ცივილურად, ეს კონტროლი მუდმივი უნდა იყოს და პარლამენტს წელიწადში ორჯერ წარედგინოს ანგარიშები“, _ აცხადებს გიორხელიძე "გურია ნიუსთან“ საუბრისას.
მისივე თქმით, "ირაკლი ალასანიას მიმართ ხელისუფლებამ ისედაც დაუშვა შეცდომა, როცა ერთი წლით ადრე არ გადააყენა ის და არ მისცა მსვლელობა კორუფციულ ფაქტებს, რომელიც თავდაცვის სამინისტროში ხდებოდა“.
"იმ ფაქტებზე მაქვს საუბარი, რაზეც ახლა მიდის ძიება. ტენდერების საკითხი ისევ ბნელით არის მოცული და სააკაშვილის ხელდასმული ბიზნესმენები და ხელისუფლებასთან დაახლოებული პირები იგებენ მას. ეს არის საერთოდ დახურული სისტემა, რომელიც უნდა შეიცვალოს“, _ ამბობს გიორხელიძე.
მოსალოდნელია თუ არა სხვა მინისტრების პასუხისმგებლობის საკითხებიც დადგეს, გიორხელიძე აცხადებს, რომ "თუ პროკურატურა ისევ ისე იმუშავებს და რევერანსებს გააკეთებს, როგორც სოფლის მეურნეობის სამინისტროსთან მიმართებაში გააკეთა, ანუ პოლიტიკურმა მოსაზრებებმა და კარნახმა აიძულა ის თაღლითობის საქმეზე ბოდიში მოეხადა, მაშინ იგივე შედეგს მივიღებთ. მინდა, სამართლებრივი რეფორმა განხორციელდეს ქვეყანაში და საგამოძიებო და პროკურატურის საქმიანობა პოლიტიკურ კონიუნქტურასთან არ იყოს მიბმული“, _ აცხადებს გიორხელიძე.
პოლიტილოგ სოსო ცისკარიშვილს კი მიაჩნია, რომ მთავარი პროკურატურის მიერ გამოძიების დაწყების მიუხედავად, შერჩევითი სამართლის ნიშნები მაინც არსებობს.
"მიზეზი ისევ არის, რომ შერჩევით სამართალზე ვისაუბროთ. პრაქტიკულად დევნა დაიწყო თავდაცვის სამინისტროს მაღალჩინოსნების წინააღმდეგ და ეს თავად პროკურატურამ დაადასტურა, როდესაც არ მისცა ადვოკატების საშუალება გაცნობოდნენ საქმეს და საკუთარი ვალდებულება განეხორციელებინათ. სხვა სამინისტროებზე რომც დაიწყოს რაიმე ტიპის ძიება, დარწმუნებული ვარ, არც საქემეები გასაიდუმლოვდება და წინასწარ პატიმრობაშიც არავის გაამწესებენ. რასაკვირველია, ეკონომიკური დანაშაული უნდა განსხვავდებოდეს იმ დანაშაულისგან, რომელიც სიცოცხლის ხელყოფის ტოლფასია, ამის შესახებ არაერთხელ მოგვისმენია ახალი ხელისუფლების მოსვლამდე, თუმცა რაიმე პროგრესს ამ კუთხით ვერ ვაფიქსირებ“, _ ამბობს ცისკარიშვილი "გურია ნიუსთან“ საუბრისას.
პოლიტოლოგი არც იმას გამორიცხავს, რომ აუდიტის სამსახურის მიერ საკითხის ახლა გამჟღავნება გენერალური აუდიტორის მიერ თანამდებობის შესანარჩუნებლად პრევენცია იყოს.
"აუდიტთუხუცესის, ბატონი თორდიას მხრიდან, ეს, შესაძლოა, წინდახედული ნაბიჯიც იყოს. მისი სამსახურის მიმართ რაიმე ტიპის უკმაყოფილება, ახლა ამ ინსტიტუტზე ზეწოლად იქნება აღქმული, იმის გამო, რომ არაერთი სახელმწიფო სტრუქტურაა მოხსენიებული კანონდამრღვევად. ამიტომ შესაძლოა, მან თავი დაიცვა“, _ აღნიშნავს ცისკარიშვილი.
ამასთან, ცისკარიშვილი აღნიშნავს, რომ "შფოთიანი გამოძიების პროცესები“ თავდაცვის სამინისტროს თემის გადასაფარადაა დაწყებული.
"ჩვენი ხელისუფლება მიხვდა, რომ საჯაროდ თავის მოჭრა იქნებოდა მხოლოდ ირაკლი ალასანიას თემით ყოფილიყო ისევ წარმოდგენილი. მაგრამ თავიდათავი მაინც ის რეალობაა, რომელიც ტენდერების გამოცხადება და რეალიზაცია ჰქვია. სრულიად აფსურდული კანონია, მხოლოდ სახელმწიფო დაწესებულებების საწვალებლად. როდესაც შემთხვევით გატეხილი ფინჯანის ყიდვა, დაკავშირებულია თვეების მანძილზე გაწელილ ტენდერომანიის პროცესზე, მხოლოდ იმიტომ, რომ სახელმწიფო მოხელეების და მაღალი თანამდებობის პირების წინააღმდეგ ამოქმედდეს სრულიად თითიდან გამოწოვილი პირობები და იყოს იურიდიული საუძველი ამა თუ იმ მაღალჩინოსნის შანტაჟისათვის.
ეს არის უბრალოდ შირმა. დაიწყება ვითომდა შფოთიანი გამოძიების პროცესები, მაგრამ შედეგი მკაფიოა, რომ დარტყმისთვის მხოლოდ თავდაცვის სამინისტროა განწირული. ერთი კითხვა მინდა ხელისუფლებას დავუსვა, თუ თავდაცვის მინისტრია პასუხისმგებელი ჯარისკაცების მოწამვლაზე, მაშინ, 2013 წლის განმავლობაში მომხდარ დანაშაულებებზე – ძარცვები, ქონებების მიტაცებები და ა.შ. მაშინდელი მინისტრი და ახლანდელი პრემიერი ხომ არ უნდა იყოს პასუხისმგებელი? ზედმეტი მოსდის ხელისუფლებას, როცა მინისტრის ტანამდებობას და სამეურნეო სამსახურის ხელმძღვანელის უფლებამოვალეობებს ერთმანეთში ურევს და მინისტრს ისე ექცევა, როგორც სამი წლით დაქირავებულ მუშას“, _ აცხადებს "გურია ნიუსთან“ საუბრისას სოსო ცისკარიშვილი.
"გურია ნიუსი“ აუდიტის სამსახურის კომენტარს მოგვიანებით შემოგთავაზებთ.
