მუსიკოსმა ანდრეი მაკარევიჩმა მოიგო სასამართლო სარჩელი, რომელიც ეხებოდა გაზეთ "იზვესტიას" და მწერალ ალექსანდრე პროხანოვის მიერ მაკარევიჩის სახელის რეპუტაციის შებღალვას.
მოსკოვის სასამართლომ მიიჩნია, რომ პუბლიკაცია _ "მომღერლები და ნაძირლები" შეიცავდა შეურაცხმყოფელ მონაცემებს. სასამართლოს გადაწყვეტილებით, პროხანოვმა მაკარევიჩს ნახევარი მილიონი რუბლი უნდა გადაუხადოს.
მომღერალს პრეტენზიები "იზვესტიას" და მისი მესვეტის _ პროხანოვის მიმართ გაზეთში გამოქვეყნებული სტატიის გამო გაუჩნდა _ სტატია მაკარევიჩის უკრაინაში ვიზიტს ეხებოდა.
პროხანოვის თქმით, მაკარევიჩმა "ჩაატარა კონცერტი სლავიანსკში, უკრიანის ჯარების დისლოკაციის ადგილზე, სადაც ნანგრევებს ჯერ კიდევ ასდიოდა ბოლი და სადაც ჯერ კიდევ ესხა აჯანყებულების სისხლი." პროხანოვი წერდა, რომ "მაშინა ვრემენის" ლიდერის მუსიკა "ფრთებს ასხამდა უკრაინელ მეომრებს, რომლებიც კონცერტის შემდეგ მიდიოდნენ, რათა ნაწილ-ნაწილ დაეგლიჯათ დონეცკელი გოგონები", კონცერტი კი გერმანული ეს-ეს-ის დივიზიის კონცერტებს შეადარა.
სასამართლოში მაკარევიჩის წარმომადგენელმა ანასტასია რასტორგუევამ განაცხადა, რომ ვერსია, თითქოს მაკარევიჩი სლავიანსკში, უკრაინელი მეომრების წინაშე მღეროდა, სიმართლეს არ შეესაბამება _ მომღერალი გამოდიოდა სვიატიგორსკში, ლტოლვილებთან და იმ მომენტში საომარი მოქმედებები არ მიმდინარეობდა.
რასტორგუევას თქმით, ფაქტების დამახინჯებამ ზიანი მიაყენა მაკარევიჩის რეპუტაციას და მუსიკოსი მრისხანე კრიტიკის ქარცეცხლში გაეხვია.
პროხანოვის ადვოკატების მტკიცებით, წერილის ავტორმა მხოლოდ საკუთარი მოსაზრებები დააფიქსირა და მას აქვს მეტაფორის გამოყენების უფლება. ადვოკატები ამბობდნენ, რომ მაკარევიჩი მართლაც იმყოფებოდა სლავიანსკში, თუმცა, კონცერტის იქ გამართვა ვერ დაადასტურეს და აღნიშნეს, რომ მნიშვნელობა არ აქვს, სად ჩატარდა კონცერტი და საომარი მოქმედებების დროს პროხანოვის ეს უზუსტობა დასაშვებია.
მოსამართლე ბოორის უდოვმა არ გაითვალისწინა პროხანოვის ადვოკატების მოსაზრებები და მაკარევიჩის სარჩელი დააკმაყოფილა.
სასამართლოს გადაწყვეტილებით, პროხანოვმა მაკარევიჩს ნახევარი მილიონი რუბლი უნდა გადაუხადოს, "იზვესტიამ" გამოაქვეყნოს აღნიშნული სტატიის უარმყოფელი წერილი, სასამართლოს ხარჯები კი ორივემ უნდა გადაიხადოს.
"იზვესტიის" და პროხანოვის წარმომადგენლებმა განაცხადეს, რომ გადაწყვეტილებას გაასაჩივრებენ, მაკარევიჩი კი აპირებს, ეს ნახევარი მილონი რუბლი აღმოსავლეთ უკრაინაში დაშავებული ბავშვების სამკურნალოდ გაიღოს.
