კოდორის ხეობაში პრეზიდენტის ყოფილი რწმუნებულისთვის 12 წლიანი პატიმრობის მისჯას, საზოგადოებაში არაერთგვაროვანი რეაქცია მოჰყვა, თუმცა ყველა თანხმდება, რომ სასჯელი ზედმეტად მძიმეა.
ბევრი საუბრობს მიზეზებზეც, მაგრამ მტკიცებით ფორმაში ვერავინ ვერაფერს ამბობს, ვარაუდები კი ძირითადად ყოფილი ხელისუფლების პოლიტიკურ ინტერესებამდე მიდის. ასევე, საუბარია საქმის ხელახალი გამოძიებისას შექმნილ პრობლემებზეც – საპარლამენტო უმრავლესობის წევრ სოსო ჯაჭვლიანის თქმით, "გამოძიებით ახლაც ის სამართალდამცავები იყვნენ დაკავებულები, ვინც ამ საქმეს ადრე "კერავდნენ".
განსხვავებულ მიზეზსა და აქამდე გაუჟღერებელ კავშირზე საუბრობს "გურია ნიუსის" წყარო, რომელიც წინა ხელისუფლების დროს ერთ-ერთ მაღალ თანამდებობას იკავებდა.
იგი კვიციანისთვის 12 წლიანი პატიმრობის მისჯას, ხუდონჰესის მშენებლობას უკავშირებს.
როგორც წყარო აღნიშნავს, თავად კვიციანს და მის ოჯახს აღნიშნული პროექტის მიმართ ნეგატიური დამოკიდებულება ჰქონდა, ემზარ კვიციანი თავისუფლების შემთხვევაში თავისი ავტორიტეტით და რესურსით შეძლებდა სერიოზულად შეეშალა ხელი ჰესის მშენებლობისთვის, ეს კი ხელისუფლებისთვის მისაღები არ იყო, რადგან ხუდონსჰესის მშენებლობა ამერიკული პროექტია და მთავრობას აქვს ვალდებულება ის შეასრულოს. სწორედ ამიტომ გახდა კვიციანის იზოლირება საჭირო.
შეგახსენებთ, რომ ხუდონჰესის მშენებლობის წინააღმდეგ არაერთი აქცია გაიმართა. აქციის მონაწილეები ხშირ შემთხვევაში ჰესის მშენებლობაზე უარის თქმას, ზოგჯერ კი მორატორიუმის გამოცხადებას მოითხოვდნენ.
თავის დროზე, ხაიშელებმა (ჰესი სოფ. ხაიშში უნდა აშენდეს) ხატზეც კი დაიფიცეს, რომ მთავრობას პროექტის განხორციელების უფლებას არ მისცემდნენ.
ფიცის ტექსტი შემდეგნაირად ჟღერდა: "ვფიცავ, არ დავიშურებ ძალ-ღონეს და ჭკუა-გონებას, რომ ხაიშის წმინდა გიორგის სახელობის ტაძარი, სოფელი და სასაფლაოები წყალქვეშ არ მოექცეს. ფიცის სინამდვილეს ვადასტურებ ხელმოწერით".
მაშინ, როგორც ადგილობრივები ამბობდნენ, მათ კომპენსაციებსაც სთავაზობდნენ, რაზეც კატეგორიული უარი განაცხადეს.
მიუხედავად იმისა, რომ ჰესის მშენებლობის შემთხვევაში რამდენიმე სოფელს, მათ შორის სალოცავებსა და სასაფლაოებს დატბორვა ემუქრებათ, ენერგეტიკის მინისტრი აცხადებას, რომ ჰესი უნდა აშენდეს.
"გურია ნიუსმა" ხუდონჰესის მშენებლობასა და ემზარ კვიციანისთვის 12 წლიანი პატიმრობის მისჯას შორის შესაძლო კავშირებზე კითხვით, კოდორის ხეობაში პრეზიდენტის ყოფილი რწმუნებულის დას, ნორა კვიციანს მიმართა, რომელიც ჩვენთან საუბარში აღნიშნავს, რომ ძმასთან – ემზარ კვიციანთან, მას ამ თემაზე საუბარი არ ჰქონია, ამიტომ ვერაფერს იტყვის.
თუმცა იქვე დასძენს, რომ თუ პრობლემა – კვიციანისთვის მაღალი სასჯელის შეფარდება, მალე არ მოგვარდება, "გაგიჟებული ხალხი სასწაულებს ჩაიდენს".
"თუ ამას დროზე არ მოაგვარებენ, ხუდონჰესის აქციები კი არა, ეს გაგიჟებული ხალხი სასწაულს ჩაიდენს."
კვიციანის ადვოკატი რეზო კახნიაური კი, "გურია ნიუსთან" ამბობს, რომ მსჯავრდებულისთვის 12 წლიან სასჯელსა და ხუდონჰესის მშენებლობას შორის შესაძლო კავშირს, ვერც დაადასტურებს და ვერც უარყოფს.
"ვერც დავადასტურებ და ვერც ვუარყოფ. თუმცა, ავღნიშნავ, რომ როგორც ძველი მთავრობა ებრძოდა ავტორიტეტებს, ახლაც ისე გრძელდება.
ჩვენ ვაპირებთ, დამდგარი განაჩენი სააპელაციო სასამართლოში გავასაჩივროთ, რადგან ემზარი ქვეყანასთან, ხალხთან, ღმერთთან და კანონთან მართალია."
"ყოფილი პოლიტპატიმრები ადამიანის უფლებებისთვის" თავმჯდომარე ნანა კაკაბაძე მიიჩნევს, რომ ეს შეიძლება კვიციანისთვის მაღალი სასჯელის შეფარდების ერთ-ერთი მიზეზი ყოფილიყო, თუმც არა ერთადერთი.
"ემზარ კვიციანი, რაც ვიცი, მთელი ცხოვრების მანძილზე კოდორის ხეობის ინტერესებს იცავდა, აქედან გამომდინარე, საქართველოს ტერიტორიულ მთლიანობას. მგონია რომ ეს შეიძლება ერთ-ერთი საკითხი იყოს, მაგრამ არა ერთადერთი.
მას და მის ოჯახს სერიოზული ავტორიტეტი აქვს დღესაც, ახლა უფრო მეტი, ვიდრე აქამდე, ამიტომ, არაა გამორიცხული მთავრობას შეშინებოდა".
კოდორის ხეობაში პრეზიდენტის ყოფილი რწმუნებულისთვის 12 წლიანი პატიმრობის მისჯა რომ გარკვეულ კითხვებს აჩენს, ამას არ უარყოფს საპარლამენტო უმრავლესობის წარმომადგენელი სოსო ჯაჭვლიანიც, თუმცა გამოტანილ განაჩენს, ხუდონჰესთან – რომ თავისუფლების შემთხვევაში ემზარ კვიციანი შეძლებდა ამ პროექტის განხორციელებისთვის სერიოზულად შეეშალა ხელი, კავშირს ვერ ხედავს – "ამაზე მეცინება, სად ერეკლე და სად ჩემი ყურებიანი ქუდიო", – ამბობს ჯაჭვლიანი.
ცნობისთვის, როგორც "გურია ნიუსს" ემზარ კვიციანი დამ, ნორა კვიციანმა განუცხადა, ხვალ 2 საათზე, თბილისში, პარლამენტის შენობის წინ აქცია გაიმართება. ხოლო, 5 საათზე გმირთა მოედანზე, მემორიალთან, ბრიფინგი.
"სამშობლოს სიყვარულმა და სამშობლოს დაცვამ გამოიწვია ემზარისთვის ამხელა პატიმრობის მისჯა. ეს არის პროვოკაცია ხელისუფლების მიმართ, რომ ხალხი დაუპირისპირდეს მათ. ამდენი წელია იცავდა საქართველოს და დღეს მას უმაღლესი სასჯელი გამოუტანეს. ეს იყო ჩემთვის მეხის დაცემა, განადგურებული ვარ.
ეს მარტო ჩვენი საფიქრალი არაა, ესა ყველა გულანთებული ვაჟკაცის საფიქრალი. კითხვის ნიშანი დაესვა ამით სამშობლოს დაცვას და მთლიანობას. რომელი ვაჟკაცი დადებს ფიცს, რომელი ვაჟკაცი დაიცავს თავის სამშობლოს, როცა ემზარს ამხელა სასჯელი გამოუტანეს?
ველოდებოდით დარბაზიდან გათავისუფლებას და მივიღეთ უმაღლესი სასჯელი. არადა მას თავდებში 32 პარლამენტარი უდგებოდა, ნდობას უცხადებდა 37 გენერალი, მთელი კოდორის ხეობა და საზოგადოების დიდი ნაწილი.
ჩვენ ხვალ 5 საათზე გვაქვს ბრიფინგი გმირთა მოედანზე, მემორიალთან, ხვალვე, თბილისში, 2 საათზე, პარლამენტის შენობასთან გავმართავთ აქციას.
უკან დახევას არ ვაპირებ. თუ უპირობოდ არ გაანთავისუფლებენ, დავჯდები მოშიმშილეებთან ერთად.
სტრასბურგის სასამართლოში გასაჩივრებას რაც შეეხება, მანამდე მე არ ვაპირებ მის ციხეში ყოფნას."
