საქართველოს განათლებისა და მეცნიერების მინისტრი, თამარ სანიკიძე "გურია ნიუსთან" საუბრისას ამბობს, რომ განათლების სიტემაში ძირეული რეფორმების გახორციელება იწყება. მისივე თქმით, აქცენტი სკოლის საფეხურების გადახედვაზე კეთდება. სანიკიძე ამბობს, რომ სამინისტროსთვის მაღალმთიანი სკოლები პრიორიტეტულია და ამ ეტაპზე 80 სკოლაზე ტიპიური პროექტის შემუშავება მიმდინარეობს:
_ ზოგადად, სასკოლო ინფრასტრუქტურა პრობლემას წარმოადგენს. ჩვენ ძალიან ინტენსიურად ვმუშაობთ, მაგრამ ეს ძალიან დიდი დროის მანძილზე დაგროვილი პრობლემაა. იმედი მაქვს, რომ თუ ტემპი არ დაიკლებს და პრიორიტეტები თუ არ შეიცვლება, მოვახერხებთ და ნელ-ნელა ყველა სკოლას მივაქცევთ ყურადღებას. ზოგადად დადგენილია და მსოფლიოში ცნობილია, რომ სასწავლო შედეგების გაუმჯობესების 20-25 პროცენტი დამოკიდებულია სასკოლო ინფრასტრუქტურაზე, _ ამბობს თამარ სანიკიძე "გურია ნიუსისთვის" მიცემულ ექსკლუზიურ ინტერვიუში.
_ ქალბატონო თამარ, ჩოხატაურში სტუმრობისას, როცა ახალი სკოლა გახსენით წიფნარში, გუთურის საჯარო სკოლის მოსწავლეებმა საკმაოდ ორიგინალური მეთოდით გთხოვეს ახალი სკოლის აშენება. აღნიშნულ სკოლას მართლაც ბევრი პრობლემა აქვს, იქ სწავლა საშიშია _ რამდენიმე წლის წინ მოაჯირი მოწყდა კიბეს და ბავშვს დაეცა. საბედნიეროდ, შემთხვევას ტრაგედია არ მოჰყოლია, თუმცა სამომავლოდ მაინც სიფრთხილეა საჭირო… რამდენად არის სამინისტროსთვის აღნიშნული სკოლა პრიორიტეტული და თუ დგას დღის წესრიგში სკოლის რემონტი, სადაც ამ ეტაპზე 83 მოსწავლე სწავლობს?
_ დღის წესრიგში დგას დაახლოებით 80 სკოლის რეაბილიტაციის საკითხი. ეს არის გათვლილი დროში. ჩვენ დავიწყეთ ხუთწლიანი გეგმით და ორი წელი უკვე გავიდა. შესაბამისად, მომდევნო სამი წელი არის ზუსტად ამ სკოლების რეაბილიტაციის პერიოდი. ოთხმოცივე სკოლა მცირეკონტიგენტიანია. ეს სკოლები სოფლებშია, განსაკუთრებით მაღალმთიან სოფლებში. იქიდან გამომდინარე, რომ ჩვენი და სახელმწიფოს გადაწყვეტილებაა, ასეთი სკოლები უნდა შეინარჩუნოს, მათი რეაბილიტაცია აუცილებლად გახორციელდება, რადგან სკოლა მხოლოდ სკოლის ფუნქციას არ ასრულებს ასეთ სოფლებში _ მიგრაციის და კიდევ ბევრი საკითხია ამაზე დამოკიდებული. ეს ყველაფერი კი კარგი სასკოლო ინფრასტრუქტურით შეიძლება გამოსწორდეს. ამიტომ, ამ 80 სკოლაზე ახლა მიმდინარეობს ტიპიური პროექტის შემუშავება ჩვენი სამშენებლო სააგენტოს ფარგლებში და ფასთა ანალიზი.
_ განათლების პროფკავშირმა რამდენიმე დღის წინ გაავრცელა განცხადება, რომელშიც ნათქვამია, რომ ბევრ სკოლას ამ დრომდე არ მიუღია სახელმძღვანელოები, მიღებული სახელმძღვანელოების უმეტესობა კი დაზიანებულია… თქვენ ამ დრომდე არ გაგიკეთებიათ ამ თემაზე კომენტარი.
_ დღემდე ჩვენთვის არავის არაფერი უკითხავს. სკოლაში წიგნებთან, კომპიუტერებთან, ჟურნალებთან დაკავშირებით, და ა.შ, რასაც ჩვენ ვუმზადებთ და ვაწვდით სკოლებს, მიდის ყოველდღიური მონიტორინგი. ეს ინფორმაცია გროვდება, რომლის მიხედვითაც ინფორმაცია მიდის რესურსცენტრში, რესურსცენტრიდან _ სამინისტროში. ის, რომ ბევრ სკოლაში ასეთი რამ ხდება, არ ფიქსირდება. ამიტომ უნდა დააკონკრეტონ, რომელ სკოლაზე საუბრობენ.
_ თქვენ იცით კონკრეტული სკოლა, სადაც წიგნები არ დარიგდა?
_ ასეთი ინფორმაცია მე არ მაქვს. თავდაპირველად, როცა სწავლა დაიწყო, პირველი თვის განმავლობაში რა თქმა უნდა, მოდიოდა შეტყობინებები გარკვეულ დანაკლისთან დაკავშრებით და არა იმაზე, რომ სადმე წიგნი არ დარიგდა. ისინი დახარისხდა, გადანაწილდა და დღესდღეობით ასეთი პრობლემა არ ფიგურირებს. კიდევ ერთხელ ვიტყვი, რომ თუ რომელიმე კონკრეტულ სკოლას აქვს პრობლემა, მათ იციან, როგორ უნდა მოგვმართონ და შესაბამისად, მივაქცევთ ყურადღებას.
_ პროფკავშირების განცხადებაში აღნიშნულია, რომ სამინისტროდან დირექტორებს ამ თემაზე საუბარს უკრძალავენ, რომლებიც, თავის მხრივ, მშობლებს აფრთხილებენ, რომ არაფერი თქვან…
_ მგონი, აბსურდამდე მივდივართ. არც ერთი დირექტორი, არც ერთი მასწავლებელი დღეს არანაირ ზეწოლის არ განიცდის და ძალიან კარგად იცის ყველამ, რომ ვისაც სათქმელი აქვს გამოდის და ამბობს. საკითხში, რომელიც ახლოს არის რეალობასთან და საჭიროებს ჩვენს ჩართულობას, ყოველთვის ვერთვებით და დროულად ვაგვარებთ პრობლემებს. კომუნიკაცია ჩვენსა და სკოლებს შორის არის ძალიან მაღალ დონეზე და გვაქვს ძალიან ხშირი კომუნიკაცია. არ მგონია, რომ ჩვენ შუამავლები გვჭირდებოდეს ერთმანეთთან ურთიერთობაში. თუ რომელიმე კონკრეტულ სკოლაზე აქვს ვინმეს რაიმე მითითება, აუცილებლად უნდა გვითხრას და მივაქცევთ ყურადღებას. ნებისმიერი დირექტორი, ნებისმიერ საკითხზე საუბარში თავისუფალია _ ფაქტებსაც ხედავთ, რომ ყველა საკუთარ აზრს გამოთქვამს და მოქმედებს, იმის შესაბამისად რაც სწორად მიაჩნია. ჩვენი მიზანია, არ გამოვიდეთ კანონიერების ჩარჩოებიდან, სკოლაში იყოს წესრიგი და მიმდინარეობდეს სასწავლო პროცესი.
_ სკოლებში რამდენად არის დაცული უსაფრთხოების ნორმები? ცოტა ხნის წინ, ჩოხატაურის მუნიციპალიტეტის სოფელ ქვენობნის საჯარო სკოლის დარბაზში გისოსი ჩამოვარდა და ბავშვს დაეცა. ბოლო დროს ხშირად ხდება მსგავსი შემთხვევები…
_ ნამდვილად ვერ ვიტყვით, რომ ასეთი პრობლემები მასობრივია _ არის ერთეული შემთხვევები. სკოლა დამოუკიდებელი ერთეულია, ჰყავს ადმინისტრაცია და ასეთ ვთქვათ, მსგავს წვრილ-წვრილ თემებს თავად უნდა ხედავდნენ. ჩვენი მაქსიმალური ყურადღება იქეთ არის მიმართული, სადაც ავარიული მდგომარეობაა. ასეთ სკოლებზე ჩვენ მუდმივად ვახორციელებთ მონიტორინგს და თუ გადაუდებელი სამუშაოების ჩატარების საჭიროება ხდება, ამასაც ვატარებთ. ახლა მთავარი პრიორიტეტი არის, რომ დროულად, სადაც საშუალება არის, დავამთავროთ გათბობის სისტემების მონტაჟი და დროულად ჩავრთოთ გათბობა.
_ კვებაზე თუ ახორციელებთ მონიტორინგს?
_ კვების მონიტორინგს ახორციელებს სურსათი უვნებლობის სააგენტო ჩვენთან ერთდ. მონიტორინგი ჩატარდა 2013 წელს და ახლაც მიმდინარეობს. მონიტორინგს თავისი განრიგი აქვს, რომელიც შეთანხმებულია ჯანდაცვის სამინისტროსთან და სურსათის უვნებლობის სააგენტოსთან. იყო რამდენიმე შემთხვევა, სადაც ჩარევა გახდა საჭირო, რადგან გარკვეული ნორმები არ იყო დაცული. ასეთებზე მივიღეთ შესაბამისი ზომები. ჩვეულებრივ სამუშაო პროცესში ვართ.
_ რა სიახლეებს გეგმავს უახლოეს ხანში განათლების სამინისტრო?
_ არ არის მარტივი, ჩამოთვალო ორი-სამი სიახლე, რადგან ასე არ მუშაობს სისტემა. დაგეგმილია რამდენიმე სისტემური ცვლილება, რომლის შესახებ ჩვენ ამ დღეებში ვისაუბრებთ კონფერენციაზე. ექსკლუზიურად გეტყვით, რომ საუბარი და აქცენტია სკოლის საფეხურების გადახედვაზე _ საწყის, საბაზო და საშუალო საფეხურებზე, ხარისხის მონიტორინგზე და უმაღლესი განათლების ხარისხის გაუმჯობესებაზე. ასევე ავტორიზაცია/აკრედიტაციის საკითხებზე და, რა თქმა უნდა, მეცნიერების ორგანიზებაზე ქვეყნის მასშტაბით. ნამდვილად დაგეგმილია ძირეული სისტემური ცვლილებები. ჩვენ ძალიან მაშტაბურ რეფორმას შევეჭიდეთ.
არის პედაგოგებთან დაკავშირებული სიახლეებიც _ დიდი სისტემა ჩამოვაყალიბეთ და, შესაბამისად, კანონში შედის ცვლილებები. ვფიქრობ, რომ დამტკიცდება კანონი, რადგან პარლამენტში მეორე მოსმენით უკვე მიღებულია. დარჩა მესამე მოსმენა, რომელიც რედაქციული ხასიათისაა. 2015 წლიდან ჩვენ ამ სქემის გახორციელებასაც ვიწყებთ.
_ ქალბატონო თამარ, კანონში შესატან ცვლილებებს განხილვებიც მოჰყვა და ბევრი შეკითხვა დაისვა. პარლამენტის სხდომაზე, უმცირესობის წევრი, სერგო რატიანი დაინტერესდა, რამდენ ხანს შეიძლება იყოს მასწავლებელი სერტიფიცირებული. რატომ არ ხდება ამის დაკონკრეტება?
_ სერგო რატიანის შეკითხვები, რაღაც კონტექსტში, ცოტა აზრს არის ხოლმე მოკლებული. მე მას ბევრჯერ ვთხოვე და ველაპარაკე _ შეკითხვები თუ გაქვთ, მობრძანდით, გავიაროთ, რომ უკეთესი წარმოდგენა შეგექმნას, რა პროცესები მიმდინარეობს განათლების სამინისტროში,-მეთქი, მაგრამ ჯერჯერობით ეს "ბედნიერება არ გვეღირსა" და არ მობრძანდა ბატონი სერგო. რამდენ ხანს შეიძლება იყოს მასწავლებელი სერტიფიცირებული, ალოგიკურად დასმული შეკითხვაა. ამდენ ხანს, მასწავლებლის სერტიფიცირება განისაზღვრებოდა ტესტის ჩაბარებით, ახლა კი პროფესიული განვითარების ახალი სისტემა შემოდის. ასე რომ, შეიძლება შეკითხვა დაისვას ასე _ რამდენი ხანი დასჭირდება მასწავლებელს, რომ განვითარდეს და მივიდეს ისეთ დონემდე, რომელიც გააუმჯობესებს სწავლის შემდეგებს?
_ და რამდენი ხანი დასჭირდება?
_ საფეხურებს შორის სამწლიანი ციკლია. ეს არის სტანდარტული ციკლი, მაგრამ იქნება, ასევე, მოკლე ციკლი, ანუ მოკლე კარიერული, სასწრაფო განვითარების გზა, რომელსაც მასწავლებელი აირჩევს. მას შეუძლია ერთ წელიწადში მიაღწიოს იმ შედეგებს, რომელიც ზოგადად სამწლიან ციკლზე არის გათვლილი. აქედან გამოდინარე, შეკითხვის დასმა ასე უფრო ლოგიკურია. ის კითხვა ძველ პერიოდს შეეხება და როგორ ჩანს, კიდევ არ სჯერა ბატონ სერგოს, რომ რაღაცეები შეიცვალა მას შემდეგ. კიდევ თუ იქნება შეკითხვები, დიდი სიამოვნებით ვუპასუხებ სერგო რატიანსაც და ნებისმიერ სხვა ადამიანს.
_ ცოტა ხნის წინ გავრცელდა ინფორმაცია, რომლის თანახმადაც მამათქვენის კომპანია ბევრ ტენდერს იგებს. მათ შორის, ყველაზე მეტად შინაგან საქმეთა სამინისტროს მიერ გამოცხადებულ ტენდერებს… დაიწერა ისიც, რომ ამ თემაზე თქვენ კომენტარი არ გააკეთეთ…
_ თუ არ ვცდები, მამაჩემს კომპანია 2000 წლიდან აქვს. ეს არ არის დიდი და მაშტაბური ბიზნესი _ პატარა ფირმა აქვს, რომლითაც მონაწილეობს სხვადასხვა ტენდერებში. როგორც გითხარით, მამაჩემი ამას აკეთებს 2000 წლიდან და რაიმე ახალი და განსხვავებული, როგორც ჩემთვის ცნობილია, მის ცხოვრებაში არაფერი ხდება, ასე რომ, ეს ყველაფერი ძველი თემებია.
