ოზურგეთის მუნიციპალიტეტის ოფიციალურ ვებგვერდზე გამოქვეყნებული ინფორმაციის თანახმად, "ქ. ოზურგეთის მუნიციპალიტეტის საკრებულოს რიგგიანი ბიუროს სხდომა ნაცვლად 24 ნოემბრისა ჩატარდება მიმდინარე წლის 28 ნოემბერს 15:00 საათზე, საკრებულოს თავმჯდომრის სამუშაო ოთახში".
ტერმინი _ "რიგგიანი ბიურო" პირველად გავიგეთ. შესაბამისად, მისი გადამოწმება ოზურგეთის მუნიციპალიტეტის საკრებულოს თავმჯდომარესთან, დავით დარჩიასთან ვცადეთ:
_ ბატონო დავით, მუნიციპალიტეტის ოფიციალურ გვერდზე გამოქვეყნებულ ინფორმაციაში აღნიშნულია, რომ "რიგგიანი ბიუროს" სხდომა ჩატარდება. იქნებ აგვიხსნათ რას ნიშნავს "რიგგიანი ბიურო"?
_ მეც პირველად მესმის. არ ვიცი რას ნიშნავს. ვეცდები გავარკვიო, _ გვითხრა დარჩიამ.
როგორც მოგვიანებით დარჩიამ აგვიხსნა, ეს ინფორმაცია ქალაქის საკრებულოს თხოვნით გამოქვეყნდა:
_ ქალაქის საკრებულოს არა აქვს ვებგვერდი, ჩვენ გვთხოვეს და გამოვუქვეყნეთ ინფორმაცია, _ დაგვიზუსტა დარჩიამ და დასძინა, რომ ქალაქის საკრებულო მათი ვებგვერდით ხშირად სარგებლობს.
არადა, 2014 წლის 29 სექტემბერს ქალაქ ოზურგეთის მერს, ბეგლარ სიორიძესა და ფიზიკურ პირ გიორგი კუნჭულიას შორის გაფორმებული #34 ხელშეკრულების ფარგლებში მერიისა და საკრებულოსთვის ვებგვერდი დაამზადეს და 4500 ლარიც გადაიხადეს. მერიაში ამბობენ, რომ ვებ გვერდი, სადაც ამ დრომდე მხოლოდ მერის და მისი ადმინისტრაციის შესახებ იძებნება ინფორმაცია საკრებულოსაც ეკუთვნის.
ქალაქ ოზურგეთის საკრებულოს თავმჯდომარე, გელა კობალაძე ამბობს, რომ ახალ ვებგვერდზე მათი ინფორმაციები მალე გამოქვეყნდება:
_ ბატონო გელა, ოზურგეთის მუნიციპალიტეტის ვებგვერდზე თქვენი ინფორმაციაა გამოქვეყნებული, რომელშიც წერია, რომ "რიგგიანი ბიუროს" სხდომა გაიმართება. რას ნიშნავს რიგგიანი ბიურო?
_ რიგგიანი ბიურო ის არის, რომ რიგგიანი საკრებულო უნდა ჩატარდეს ორშაბათს და იმის წინ ბიურო უნდა იყოს.
_ რიგგიანი? რაიმე ახალი ტერმინია?
_ ეს ვინ დაარქვა და რატომ გამიჯნეს ასე არ ვიცი. ყოველშემთხვევაში რიგგიანი ბიურო ჰქვია მაგას.
_ ბატონო გელა, ეს განაცხადება ოზურგეთის მუნიციპალიტეტის ვებგვერდზეა გამოქვეყნებული… თქვენ ხომ 4500 ლარიანი ვებგვერდი დაამზადეთ?
_ ვებგვერდი, რომელიც მერიამ დაამზადებინა დასრულებული არ არის.
_ საკრებულო და მერია უნდა გაიმიჯნოს და როგორც მითხრეს ეს მალე გაკეთდება. იმიტომ ვსარგებლობდით ოზურგეთის მუნიციპალიტეტის ვებგვერდით, რომ ჩვენი არ გვქონდა, _ გვითხრა კობალაძემ.
მისივე თქმით, ჩვენ მიერ გამოქვეყნებული სტატიის შემდეგ თემით დაინტერესდა:
_ მე არ მიკითხავს ვებგვერდის ფასები, არ ვიცი. მერია ამზადებდა მაგ გვერდს და ჩვენ ცალკე გამოყოფილი არ გვჭირდებოდა. როგორც მეუბნებიან დაიხვეწება და ვისარგებლებთ. მართლა ვერ ვერკვევი დამზადებაში, ხარისხებში, ფასებში. ერთი რამ ვიცი _ საკრებულოს ინფორმაციას ვტვირთავდით მუნიციპალიტეტის ვებგვერდზე. ახლა, თქვენი სტატიის შემდეგ რომ მოვიკითხე რა ხდებოდა, მითხრეს რომ მერიაზე მეტად საკრებულოს სჭირდება, დაიხვეწება და ვისარგებლებთ. ამის მეტი მართლა არაფერი ვიცი. ყოველ შემთხვევაში თუ მასეთი პრობლემა შეიქმნება, ცალკე გავაკეთებინებთ საკრებულოსთვის, თუმცა არა დიდფასიანს.
_ სხვათაშორის, ბოლნისის მუნიციპალიტეტმა, რომელსაც შეიძება ითქვას, რომ ყველაზე დიდი ბიუჯეტი აქვს თვითმმართველობებში ,1500 ლარი გადაიხადა ვებგვერდის დამზადებაში…
_ როცა თქვენი სტატია წავიკითხე და ვნახე ფაქტები, მერს ვკითხე თუ რატომ გადავიხადეთ ამხელა თანხა. ამაზე მიპასუხა, რომ სხვა ქალაქებს უფრო მეტი აქვთ გადახდილი. ასევე, მერის განმარტებით ეს არის ხარისხზე, დიზაინზე, სიჩქარეზე დამოკიდებული. მართალი რომ გითხრათ არ ვიცი. მე ვერ ვერკვევი ამ დეტალებში. შეიძლება უფრო იაფად დაამზადებინო, ან ვიღაცამ უფასოდაც გააკეთოს. ესეც შეიძლება მოხდეს. რათქმაუნდა იქნება დაინტერესება და იქნება კითხვები თუ რატომ გადავიხადეთ ძვირი. აუცილებლად დავინტერესდები ამ თემით, _ გვითხრა კობალაძემ.
აღსანიშნავია, რომ ტერმინი _ "რიგგიანი ბიურო" უცხო და გაუგებარი აღმოჩნდა იურისტებისთვისაც:
_ "მორიგი" სხდომა გამიგია, "რიგგარეშე" სხდომაც, მაგრამ ეს ''რიგ(გ)იანი" ბიუროს სხდომა რა ჯანდაბაა, მომკალით და, არ მესმის. ქალაქ ოზურგეთის მუნიციპალიტეტის საკრებულო "გვეკაიფება" თუ რა ხდება?! _ აღნიშნავს საქართველოს დემოკრატიული განვითარების კავშირის იურისტი ირაკლი პაპავა.
