"გურია ნიუსის" ინფორმაციით, ოჯახური ძალადობის მსხვერპლთა სარეაბილიტაციო ცენტრი "აისი", რომელიც 2013 წელს ევროკავშირის ფინანსური მხარდაჭერით, გურიის აგრობიზნესცენტრის მიერ გაიხსნა, ფინანსური პრობლემების გამო, შესაძლოა, დაიხუროს.
_ ოჯახური ძალადობა ფართოდ გავრცელებული სოციალური პრობლემაა, რომელიც საფრთხეს უქმნის, როგორც ოჯახის თითოეულ წევრს, ასევე, მთლიანად საზოგადოებას, _ ამბობს ჩვენთან საუბრის დროს გურიის აგრობიზნესცენტრის გამგეობის თავმჯდომარე თამარ ხომერიკი, _ ამიტომ, აუცილებელია ისეთი სერვისების არსებობა, რომელიც, ერთი მხრივ, ხელს შეუწყობს ძალადობის ფაქტების პრევენციას და ამავდროულად, გაზრდის საზოგადოების პასუხისმგებლობას ამ პრობლემასთან მიმართებაში; მეორე მხრივ, კი უზრუნველყოფს მსხვერპლს ადეკვატური დახმარებით. საჭიროა, გაერთიანდეს სამთავრობო და არასამთავრობო სექტორი და ერთობლივი ძალისხმევით მოხდეს ბრძოლა პრობლემის წინააღმდეგ. აუცილებელია, ფართო საინფორმაციო კამპანიის წარმოება, რათა საზოგადოების ცნობიერება ამაღლდეს აღნიშნულ საკითხზე და პრობლემა არ განიხილებოდეს, როგორც მხოლოდ "ოჯახის საქმე". ეს ყველაფერი კი ხელს შეუწყობს ძალადობის პრევენციას და ადამიანის უფლებების დაცვას ჩვენს საზოგადოებაში. უპირველესად, აღსანიშნავია, რომ მსგავსი ტიპის ოჯახური ძალადობის ცენტრში, რომელიც ახორციელებს სარეაბილიტაციო პროგრამებს, ამავდროულად, მსხვერპლი უზრუნველყოფილია თავშესაფრით, არ ფუნქციონირებს დასავლეთ საქართველოში.
საქართველოში ამერიკის საელჩოს დაფინანსებით, დღეისთვის, ცენტრი ახორციელებს მოკლევადიან პროექტს _ "იგრძენი თავი დაცულად", რომლის ფარგლებშიც დაგეგმილია სხვადასხვა სახის თემატური შეხვედრების ჩატარება მშობლების, პედაგოგების, ბავშვების, ადგილობრივი ხელისუფლების წარმომადგენელთა მონაწილეობით. ჩატარდება გასვლითი საინფორმაციო შეხვედრები მოსახლეობაში; ჩატარდება ანტიძალადობრივი კამპანიები და ფორუმ თეატრი ძალადობის თემაზე; ბენეფიციართათვის ჩატარდება უფასო სასწავლო კურსები: კომპიუტერი, კულინარია, ჭრა-კერვა, თექა; დაიბეჭდება და გავრცელდება საინფორმაციო მასალები.
აღნიშნული პროექტის ფარგლებში, არ არის გათვალისწინებული ცენტრის თავშესაფრის მუშაობა. პროექტის დასრულების შემდეგ, ცენტრი იძულებული არის შეწყვიტოს ფუნქციონირება, _ გვითხრა თამარ ხომერიკმა.
მისივე თქმით, 25-მდე ბენეფიციარმა ისარგებლა ცენტრის თავშესაფრით (2013 წლის იანვრიდან 2014 წლის აპრილამდე) _ თოთხმეტმა ქალმა, ერთმა მამაკაცმა, ათმა არასრულწლოვანმა. ცენტრში განთავსების ვადები აღნიშნულ შემთხვევებში იყო 1 დღიდან 40 დღემდე. ბენეფიციარები იყვნენ, როგორც გურიიდან, ასევე, სამეგრელოდან და აჭარიდან.
